Հրդեհի հետեւանքով ոչնչացած է Ազգային գրադարանի թուային դիւանը, բայց բարեբախտաբար…

0
304
Մինչ Հայաստանի Ազգային գրադարանի ընթերցողները  9 Մայիսէն ի վեր չեն յաջողիր մուտք գործել գրադարանի կայք, ընկերային ցանցերու մէջ ալ սկսած էին շրջիլ լուրեր, ըստ որոնց՝ Ազգային գրադարանի համակարգչային բաժնին մէջ հրդեհ ծագած է ու փճացած է թուային դիւանը, որու կազմութիւնը տարիներու աշխատանք պահանջած է եւ ինչպէս կարելի է կռահել՝ կը ներկայացնէ անգնահատելի արժէք։ Այսպէս, ՀՀ Հայոց ցեղասպանութեան թանգարան-հիմնարկի նախկին տնօրէն Հայկ Դեմոյեան ալ Դիմագիրքի իր էջին գրած էր, որ Հայոց ցեղասպանութեան սկզբնաղբիւրային նշանակութեան նիւթերը ածխացած են քանի մը ժամուան մէջ։
Երկա՜ր լռութենէ միայն օրեր ետք հաստատուեցաւ լուրը։ Պատասխանելով «Ազատութեան» հարցումին՝ Կրթութեան, գիտութեան, մշակոյթի եւ մարզանքի փոխնախարարուհի Նարինէ Խաչատուրեան յայտնեց, որ՝ այո՛, հրդեհի հետեւանքով ոչնչացած է Ազգային գրադարանի թուային դիւանը։
“Ցաւօք սրտի, այրուել է թուային արխիւը։ Այս պահին հետաքննութիւն է իրականացւում՝ սերվերների այրման պատճառը պարզելու համար։ Բարեբախտաբար, կորուստը միայն նիւթական է”, նշեց ան։
Ըստ անոր՝ թուային արխիւի բնօրինակներէն բացի, Ազգային գրադարանը նաեւ այդ թուային դիւանի կրկնօրինակները ունի, սակայն ընթերցողները որոշ ժամանակ պիտի չկարենան օգտուիլ անոնցմէ, քանի որ պէտք է վերականգնել համակարգչային դրութիւնը, ու մա՛նաւանդ՝ պէտք է վերստին համակարգել բոլոր նիւթերը։
Մինչ այդ, Ազգային գրադարանի տնօրէնի պաշտօնակատար Հրաչեայ Սարիբէկեան եւս մտահոգութիւնները փարատելու նպատակով՝ հաւաստած էր, որ բոլոր նիւթերու կրկնօրինակները պահուած են շարժուն կրիչներու վրայ, բացատրած էր, թէ ի՞նչ կրնայ պատահած ըլլալ, բայց չէր հաստատած հրդեհի եւ դիւանի ոչնչացման լուրերը։ ■

LEAVE A REPLY

Please enter your comment!
Please enter your name here