«Ազդակ»-Ի Առցանց Լսարան. Ամատունի Վիրապեան. «Հրատարակութեան Կը Յանձնուի Հայաստանի Հանրապետութեան Սպայակոյտի Մասին Հանրագիտարանը»

0
339

Երէկ երեկոյեան Պէյրութի ժամանակացոյցով ժամը 17:00-ին տեղի ունեցած «Ազդակ»-ի առցանց լսարանը կազմակերպուած էր Հայաստանի Հանրապետութեան հիմնադրութեան 102-ամեակին առիթով: Զեկուցողն էր Ազգային արխիւի տնօրէն Ամատունի Վիրապեան: Զեկուցման նիւթն էր «Հայաստանի Ա. Հանրապետութեան վերաբերող արխիւները»: Զրոյցը վարեց «Ազդակ»-ի ելեկտրոնային բաժնի աշխատակից Մինաս Հանս Քէհեան:

Փրոֆ. Վիրապեան արխիւներու յղումներով ներկայացուց 1918-1921 ճակատագրորոշ իրադարձութիւններու ժամանակագրութիւնը եւ ապա զեկուցեց այդ բոլորին վերաբերող եւ պետական համապատասխան հիմնարկին մէջ պահպանուող արխիւներու ընդհանուր պատկերին մասին: Ամատունի Վիրապեան յայտնեց նաեւ, որ Ազգային արխիւը հրատարակութեան կը պատրաստէ Հայաստանի Ա. Հանրապետութեան սպայակազմի մասին հանրագիտարանը:

Տարբեր երկիրներէ լսարանին մասնակցողները հարցումներ յղեցին արխիւներու օգտագործման, Սեւրի համաձայնագիրին, Արցախի օրուան կարգավիճակին, Փետրուարեան ապստամբութեան եւ միջպետական յարաբերութիւններու վերաբերող արխիւներուն մասին:

Ներկաները առիթ ունեցան նաեւ դիտելու Սեւրի դաշնագիրին Հայաստանին վերաբերող եւ օրին կատարուած նկարահանումի տեսերիզը, որ տրամադրած էր փրոֆ. Վիրապեան:

Քննարկումի ընթացքին շեշտը դրուեցաւ յատկապէս Սեւրին եւ Ուիլսընի իրաւարար վճիռին վերաբերող արխիւներու թուայնացուած օրինակներու հանրայնացման եւ անոնց 100-ամեակին առիթով տարբեր քաղաքական շրջանակներու մէջ արծարծման հրամայականին վրայ:

LEAVE A REPLY

Please enter your comment!
Please enter your name here