Հաղորդագրութիւն Թիւ 22. «Քորոնա»-ի Ճգնաժամային Շտապի Գործունէութիւնը

0
249

«Քորոնա»-ի ճգնաժամային Շտապը առկայ համաճարակի ստեղծած տագնապին ի տես, իր ընթացիկ աշխատանքները կը շարունակէ:

Առ այդ, կը յայտնենք հետեւեալները.

1) «Փի.Սի.Ար.»-ի քննութիւններ

Պուրճ Համուտի, Այնճարի եւ Անթիլիասի մէջ շարունակուեցան «Քորոնա»-ի «Փի.Սի.Ար.»-ի քննութիւնները` որոնց թիւը հասաւ 1210-ի: Այս քննութիւնները կը կատարուին առողջապահութեան նախարարութեան, Լիբանանեան կարմիր խաչին, «Հարիրի» հիւանդանոցին եւ ԼՕԽ-ի հետ գործակցաբար:

2) Դեղորայքի օժանդակութիւն

«Շաղզոյեան» կեդրոնին մէջ հաստատուած դեղորայքի օժանդակութեան բաժանմունքը շարունակեց իր աշխատանքները` ցարդ օգտակար հանդիսանալով 781 պարագայի:

Աշխատանքը նոր դասաւորումով պիտի շարունակուի Երեսփոխանական գրասենեակին միջոցով:

3) Սննդամթերքի բաշխում

Նկատի ունենալով ժողովուրդի կարիքներուն բարձրացումը, Շտապը անցնող 2 շաբաթներուն պատրաստեց եւ բաշխեց սննդամթերքի յաւելեալ 1200 ծրար` շրջաններու ակումբներուն եւ Երեսփոխանական գրասենեակին միջոցով:

Նոյն ատեն, Ազգային առաջնորդարանը, գործակցութեամբ Շտապին, թաղականութեանց միջոցով բաժնեց սննդամթերքի 2000 ծրար:

4) Պետական օժանդակութիւններ

Երեսփոխանական գրասենեակի եւ Շտապի ջանքերով, կարելիութիւն ստեղծուեցաւ Պէյրութի քաղաքապետութենէն 800 անհատներու ապահովել 200.000 լ.ո. արժողութեամբ կտրօններ: Նոյն ձեւով, կարելի եղաւ ապահովել բանակի միջոցով բաժնուած 400.000 լ.ո. գումար 370 պարագաներու: Այս աշխատանքը կը շարունակուի:

Կարեւոր է նշել միաժամանակ, որ թէ՛ Պուրճ Համուտի եւ թէ՛ այլ շրջաններու քաղաքապետութիւններ, մեր միջամտութեամբ սննդամթերքի ծրարներ կամ կտրօններ բաշխեցին շրջանի հայորդիներու:

5) Դիմակներու ցրուում

Անցնող շաբթուան ընթացքին շուկաներու աստիճանական բացումով, ԼԵՄ-ական ընկերներ Պուրճ Համուտի մէջ կատարեցին 4500 դիմակի բաշխում: Տագնապի սկիզբէն այսօր բաժնուած է 48.000 դիմակ:

Շտապը կը շարունակէ իր աշխատանքները:

«Քորոնա»-ի այժմէական տագնապի աստիճանական լուծումը սակայն չի թեթեւցներ լիբանանցիին ցաւը: Տնտեսական-ելեւմտական տագնապը կը շարունակէ մնալ, որուն համար ներկայիս քննարկումի մէջ են այլ ծրագիրներ:

«ՔՈՐՈՆԱ»-Ի ՃԳՆԱԺԱՄԱՅԻՆ ՇՏԱՊ

LEAVE A REPLY

Please enter your comment!
Please enter your name here