Կառավարութիւնը Ընդգծեց Խաղաղ Ցոյցեր Կատարելու Իրաւունքը Եւ Նշանակումները Յետաձգեց Յառաջիկայ Շաբթուան

0
213

Վարչապետ Հասսան Տիապ երէկ վարչապետարանին մէջ նախագահեց կառավարութեան ընթացիկ նիստին, որմէ ետք տեղեկատուութեան նախարար Մանալ Ապտել Սամատ յայտնեց, որ նախարարաց խորհուրդը հետապնդեց ուժանիւթի նախարարութեան կողմէ Պըսրիի ամբարտակին աշխատանքներուն վերաբերող մանրամասնութիւնները եւ կոչ ուղղեց բոլոր անոնց, յատկապէս քաղաքացիական ընկերութեան ներկայացուցիչներուն, որոնք այս հարցով առաջարկ ունին, ներկայանալու տեղեկատուութեան նախարարութեան կազմակերպած խորհրդակցական հանդիպումին:

Ապտել Սամատ ըսաւ, թէ նիստին ընթացքին վարչապետ Տիապ հաստատած է, որ շուկային մէջ պիտի ճշդուի սննդեղէնի շուրջ 30 տեսակ, որոնք մատչելի սակերով պիտի ըլլան:

«Ան աւելցուց նաեւ, որ լումայափոխները այսօր պիտի վերսկսին աշխատանքի` վերջ տալով իրենց գործադուլին», դիտել տուաւ Ապտել Սամատ:

Տեղեկատուութեան նախարարը ընդգծեց խաղաղ ցոյցեր կատարելու իրաւունքը:

«Ցոյցեր կատարելը իրաւունք է, սակայն մեր մաղթանքն է նաեւ, որ անոնք կատարուին օրէնքի համաձայն, որպէսզի ո՛չ ժողովուրդը վնասուի, եւ ո՛չ ալ ապահովութեան ուժերը», յայտնեց ան:

Ապտել Սամատ նշեց նաեւ, որ նշանակումները յետաձգուած են յառաջիկայ շաբթուան:

Ներքին գործոց եւ քաղաքապետութեանց հարցերու նախարար Մոհամետ Ֆահմի նիստէն ետք յայտնեց, որ ինքնաշարժներուն զոյգ եւ անզոյգ թիւերով երթեւեկելու օրէնքին գործադրութիւնը պիտի շարունակուի` աւելցնելով, որ այդ օրէնքը կառավարութեան որոշումով պարտադրուած է:

Անդրադառնալով ցոյցերուն` Ֆահմի յայտնեց, որ խաղաղ ցոյցը արտօնելի է, սակայն ընդվզումներ յառաջացնելն ու ճամբաները փակելը արգիլուած են: «Եթէ ժողովրդային շարժումի ցոյցերը խաղաղ են, ապա դուք զիս այդ ցոյցերուն առաջնագիծին վրայ պիտի գտնէք», ըսաւ ան:

Ֆահմի նշեց, որ Պաշտպանութեան գերագոյն խորհուրդը իր նիստը պիտի գումարէ յառաջիկայ շաբաթավերջին` քննարկելու համար ընդհանուր զօրաշարժը:

Ներքին գործոց նախարարը ընդգծեց, որ կարմիր մոմով փակուած 90 լումայափոխներուն վաճառատուները այսօր իրենց դռները պիտի վերաբանան:

Վարչապետ Տիապ ընդունեց նաեւ վառելանիւթի կայարաններու սեփականատէրերու սենտիքայի մէկ պատուիրակութիւնը, գլխաւորութեամբ` սենտիքայի նախագահ Սամի Պրաքսի:

Հանդիպումէն ետք Պրաքս յայտարարեց, որ վառելանիւթի տագնապ չկայ` հաստատելով, որ այսօրուընէ սկսեալ վառելանիւթի բաշխումը պիտի բարելաւուի:

LEAVE A REPLY

Please enter your comment!
Please enter your name here