Թրքական գաղտնի գործակալութեան Գերմանիոյ մէջ ծաւալած գործունէութեան մասին ցնցիչ տեղեկութիւններ

0
523
Գերմանիոյ հեռատեսիլի պետական ZDF կայանը Յունիս 3-ի երեկոյեան «Zoom» խորագրեալ իր յայտագիրը նուիրած է թրքական գաղտնի գործակալութեան՝ MIT-ի Գերմանիոյ մէջ ծաւալած գործունէութեան։
ZDF-ի հաղորդման համաձայն՝ այդ երկրին մէջ կը գործեն MIT-ի ոչ նուազ քան 8000 գործակալներ։ Ըստ գերմանական կայանին՝ նշեալ գործունէութեան մէջ կարեւոր դեր կը խաղան նաեւ Թրքական կրօնական գործերու իսլամական միութեան (DITIB) կապուած 900 մզկիթները։
Հաղորդման ընթացքին նշուած է, թէ այդ մզկիթներուն մէջ պաշտօնավարող իմամները գործիչ Քիւրտերու կամ Էրտողանի ընդդիմադիրներուն մասին անմիջապէս զեկուցումներ կը կատարեն թրքական հիւպատոսարաններուն կամ դեսպանատուներուն։ Այդ իմամներէն ոմանց դէմ 2017-ին դատ բացուած է, բայց դատական այդ հետապնդումները բարձի թողի եղած են։
Յայտագրի ընթացքին խօսուած է նաեւ Թուրքիայէն Գերմանիա ապաստանած այլախոհ հայ լրագրող Հայկօ Պաղտատի դէմ մահափորձի ծրագրի մը, ինչպէս նաեւ Թուրքիոյ քրտամէտ HDP կուսակցութեան նախկին երեսփոխան Թուրկութ Էօքէրի դէմ Թուրքիոյ մէջ բացուած դատին մասին։ Վերջինիս դէմ, Գերմանիայէն MIT-ի գործակալի մը հաղորդած տեղեկութիւններու հիման վրայ դատ բացուած է։ Յայտագրի ընթացքին բացատրուած է, թէ բազմաթիւ Քիւրտերու եւ Էրտողանի ընդդիմադիրներու դէմ Թուրքիոյ մէջ դատեր կը բացուին եւ որոնցմէ ոմանք բանտարկութեան կը դատապարտուին, նոյնպէս՝ MIT-ի Գերմանիոյ մէջ գործող գործակալներու հաղորդած տեղեկութիւններու հիման վրայ։
Հաղորդման մասնակցած քաղաքական դէմքեր եւ փորձագէտներ յատուկ ուշադրութեամբ ընդգծած են, որ Գերմանիոյ մէջ՝ թրքական պետութեան կողմէ մարդոց այսպիսի մատնութիւն կամ ցանկագրում ծանր յանցանք է։
Հետախուզութեան գերման մասնագէտ Էրիք Շմիթ-Էնպոմ նշած է, թէ MIT-ը Գերմանիոյ մէջ ամէնէն մեծ թիւով գործակալներ ունեցող գաղտնի գործակալութիւնն է։ Ան խստօրէն դատապարտած է գերմանական դաշնակցային կառավարութեան կրաւորականութիւնը այս կացութեան դիմաց։ Որոշ տուեալներ նշելով՝ ան նաեւ պնդած է, որ 2013 Յունուար 9-ին Փարիզի մէջ քիւրտ երեք գործիչ կիներու սպանութիւնն ալ MIT-ի գործն էր։
Եզրափակելու եւ թրքական գաղտնի գործակալութեան՝ գերմանական հողին վրայ տարած գործունէութեան մասին աւելի յստակ գաղափար մը տալու համար նշենք հետեւեալը. Գերմանիոյ ներքին հետախուզութեան ալ պատասխանատու՝ Սահմանադրութեան պաշտպանութեան կազմակերպութիւնը 2018-էն ի վեր ներքին հետախուզական իր զեկուցումներուն մէջ յատուկ գլուխ մը բացած է MIT-ի գործունէութեան համար։ ■

LEAVE A REPLY

Please enter your comment!
Please enter your name here