Կազմուեցաւ Արցախ-Կիպրոս Բարեկամութեան Շրջանակը

0
394

ԵՐԵՒԱՆ.- Արցախի Ազգային ժողովի նախագահ Արթուր Թովմասեան 10 Յունիսին, Ազգային ժողովի մնայուն յանձնաժողովներու եւ խմբակցութիւններու ղեկավարներուն մասնակցութեամբ՝ հրաւիրեց աշխատանքային խորհրդակցութեան` «Արցախ-Կիպրոս» բարեկամութեան շրջանակ կազմելու նպատակով: Խորհրդակցութեան հրաւիրուեցաւ նաեւ արտաքին գործոց փոխնախարար Արմինէ Ալեքսանեան:

Խորհրդակցութեան բացումը կատարելով՝ Թովմասեան նշեց, որ 6 Մարտին, Կիպրոսի մէջ յայտարարուած էր Արցախի հետ բարեկամութեան շրջանակ կամելու մասին: Շրջանակին կ՛անդամակցին Կիպրոսի խորհրդարանի, քաղաքապետական խորհուրդի անդամներ, յայտնի քաղաքական գործիչներ եւ գիտնականներ:

«Շրջանակի հետ համագործակցութիւնը գործնական դաշտ տեղափոխելու նատակով` անհրաժեշտ եմ համարում Արցախի խորհրդարանի հովանու ներքոյ կազմաւորել Արցախում Կիպրոսի հետ բարեկամութեան շրջանակ», ընդգծեց Արթուր Թովմասեան:

Հրապարակելով Արցախ-Կիպրոս բարեկամութեան շրջանակի կազմը` խորհրդարանի ղեկավարը յոյս յայտնեց, որ անիկա կ’ընդլայնի եւ իր գործունէութեամբ կը նպաստէ թէ՛ Արցախի միջազգային ճանաչման եւ թէ Արցախի եւ Կիպրոսի միջեւ գործնական յարաբերութիւններու սերտացման:

«Արցախ-Կիպրոս» բարեկամութեան շրջանակի անդամներն են՝ Արթուր Թովմասեան (շրջանակի նախագահ, Արցախի Հանրապետութեան ԱԺ նախագահ), Արմինէ Ալեքսանեան (ընդհանուր քարտուղար), Աշոտ Ղուլեան (6րդ գումարման ԱԺ նախագահ), Գեղամ Ստեփանեան («Արցախի ժողովրդավարական կուսակցութիւն» խմբակցութիւն), Արթուր Մոսիյեան եւ Վահրամ Բալայեան («Հայ Յեղափոխական Դաշնակցութիւն» խմբակցութիւն), Դաւիթ Գալստեան (Արցախի «Արդարութիւն» խմբակցութիւն), Սէյրան Հայրապետեան եւ Գոհար Սարգսեան («Միասնական Հայրենիք» խմբակցութիւն), Արթուր Յարութիւնեան, Արամ Գրիգորեան եւ Արմէն Յակոբեան («Ազատ Հայրենիք» խմբակցութիւն), Լեռնիկ Յովհաննիսեան (Արցախի պետական համալսարանի դասախօս), Ռոբերտ Ղահրամանեան (ԱԺ աշխատակազմի ղեկավար), Սիրանուշ Սարգսեան (ԱԺ գիտութեան, կրթութեան, մշակոյթի, երիտասարդութեան եւ մարմնակրթութեան հարցերու մնայուն յանձնաժողով), Սոֆի Իւանիտիս (Արցախի յունական համայնքի ներկայացուցիչ), Բարեկամութեան շրջանակի քարտուղար` Լիլիթ Ասրեան (ԱԺ լրատուութեան եւ հանրութեան հետ կապերու բաժինի վարիչ):

Ամփոփելով խորհրդակցութեան արդիւնքները` Ազգային ժողովի նախագահը գոհունակութեան եւ երախտիքի խօսք ուղղեց Արցախի Հանրապետութեան Ազգային ժողովին, արտաքին գործոց նախարարութեան եւ ՀՅԴ Հայ Դատի Եւրոպայի եւ Կիպրոսի յանձնախումբերուն` Կիպրոսի մէջ շրջանակի կազմութեան ուղղութեամբ ցուցաբերած անգնահատելի աջակցութեան համար:

Այս մասին «Ապառաժ»ի հետ ունեցած զրոյցին ընթացքին Ազգային ժողովի Արտաքին յարաբերութիւններու յանձնաժողովի նախագահ, ՀՅԴ Արցախի Կեդրոնական կոմիտէի անդամ Վահրամ Բալայեան նշեց, որ ՀՅԴ կառոյցները հետեւողական աշխատանք կը տանին, որպէսզի Արցախի բարեկամներու շրջանակը օրէ օր ընդարձակուի։ Ան շեշտեց, որ ՀՅԴ Հայ Դատի Եւրոպայի եւ Կիպրոսի յանձնախումբերու ջանքերուն շնորհիւ 6 Մարտին, Կիպրոսի մէջ կազմուած էր Արցախի հետ բարեկամութեան շրջանակը, որուն մաս կը կազմեն պատգամաւորներ, հասարակական-քաղաքական գործիչներ եւ մտաւորականներ:

Յանձնախումբի կազմութեան մէջ Վահրամ Բալայեան կարեւոր նկատեց երկկողմ այցելութիւնները եւ համատեղ աշխատանքը:

«Բարեկամութեան շրջանակների ընդլայնումը նպաստաւոր պայմաններ է ստեղծում Արցախի միջազգային ճանաչման համար, լոբբիստական աշխատանք է կատարւում` դրանով իսկ թոյլ չտալով, որպէսզի իրականութեան դառնան Ադրբեջանի հակահայկական ծրագրերը», շեշտեց Վահրամ Բալայեան։

LEAVE A REPLY

Please enter your comment!
Please enter your name here