Պէյրութի Միջազգային Օդակայանը Պիտի Վերաբացուի 1 Յուլիսին

0
442
Newly-assigned Lebanese Prime Minister, Hassan Diab, speaks to journalists after his meeting with Lebanese President Michel Aoun at the presidential palace, in Baabda, east of Beirut, Lebanon, Thursday, Dec. 19, 2019. Aoun named Diab as prime minister after a day of consultations with lawmakers in which he gained a simple majority of the 128-member parliament. Sixty-nine lawmakers, including the parliamentary bloc of the Shiite Hezbollah and Amal movements as well as lawmakers affiliated with President Michel Aoun gave him their votes. (AP Photo/Hussein Malla)
Լիբանանի Մէջ «Քորոնա» Ժահրով Վարակուածներուն Թիւը
Հասաւ 1422-ի, Մահուան Պարագաներունը` 31-ի,
Իսկ Ապաքինածներունը` 853-ի

Առողջապահութեան նախարարութեան տեղեկութիւններուն համաձայն, երէկ Լիբանանի մէջ «Քորոնա» ժահրով վարակուածներուն թիւը հասաւ 1422-ի` վերջին 24 ժամուան ընթացքին արձանագրելով 20 նոր վարակուածներ, որոնցմէ 13-ը տեղացիներ են, իսկ 7-ն` Պէյրութ ժամանած արտերկրի լիբանանցիներ:

Նախարարութիւնը յայտնեց, որ ցարդ «Քորոնա» ժահրով 31 վարակուած պարագաներ մահացած են, իսկ 853 ուրիշներ ապաքինած:

Միւս կողմէ, վարչապետ Հասսան Տիապ երէկ երեկոյեան նախագահեց նիստի մը, որուն ներկայ գտնուեցան փոխվարչապետ, պաշտպանութեան նախարար Զէյնա Աքըր, արտաքին գործոց եւ արտերկրի լիբանանցիներու հարցերու նախարար Նասիֆ Հըթթի, ներքին գործոց եւ քաղաքապետութեանց հարցերու նախարար Մոհամետ Ֆահմի, առողջապահութեան նախարար Համատ Հասան, ընկերային հարցերու եւ զբօսաշրջութեան նախարար Ռամզի Մշարրաֆիէ, Պաշտպանութեան գերագոյն խորհուրդի ընդհանուր քարտուղար հազարապետ-զօրավար Մահմուտ Ասմար, վարչապետ Տիապի առողջապահական հարցերու խորհրդատու Փեթրա Խուրի, արտաքին գործոց նախարարութեան քաղաքական հարցերու տնօրէն Ղատի Խուրի եւ նախարարաց խորհուրդի ընդհանուր քարտուղար, դատախազ Մահմուտ Մաքքիէ:

Հանդիպումին ընթացքին համաձայնութիւն գոյացաւ Պէյրութի միջազգային օդակայանը վերաբանալու 1 յուլիս 2020-ին, պայմանաւ որ օդակայանը իր աշխատանքի կարողութեան 10 առ հարիւրով գործէ միայն:

Որոշուեցաւ նաեւ, որ անձնական օդանաւային թռիչքները վերսկսին 24 յունիսին, իսկ մնացեալ թռիչքներուն պարագային Լիբանան ժամանող բոլոր ճամբորդները պիտի ենթարկուին «Քորոնա» ժահրի ախտաճանաչման «Փի. Սի. Ար.» քննութեան, որուն արդիւնքը պիտի իմանան 24 ժամուան ընթացքին: Ճամբորդները 72 ժամ ետք դարձեալ «Փի. Սի. Ար.» քննութեան պէտք է ենթարկուին: Եթէ քննութեան արդիւնքը դրական ըլլայ, ապա ան առողջապահական մեկուսացումի մէջ պիտի մնայ եւ պիտի հետեւի առողջապահութեան նախարարութեան ցուցմունքներուն` մինչեւ խնդրոյ առարկային ապաքինումը:

Նախարարական յանձնախումբը որոշեց նաեւ, որ «Փի. Սի. Ար.» քննութեան ենթարկուած իւրաքանչիւր ճամբորդ դարձեալ պիտի ենթարկուի նոյն քննութեան` աւելցնելով, որ Պէյրութ ժամանող օտար քաղաքացիները պէտք է առողջապահական ապահովագրութիւն ունենան, որպէսզի կարենան հոգալ «Քորոնա»-է բուժուելու ծախսերը, եթէ պատահի, որ անոնք այդ ժահրով վարակուին:

Նախարարական յանձնախումբը ընդգծեց, որ այս ծառայութիւնը առկայ պիտի ըլլայ նաեւ Լիբանանի մէջ գործող ապահովագրութեան ընկերութիւններուն կողմէ:

Նշենք, որ առողջապահութեան նախարարութիւնը երէկ ընկերային ցանցերուն վրայ տեղադրեց յայտարարութիւն մը, որուն մէջ հաստատուեցաւ, որ ոեւէ քաղաքացի իրաւունք ունի անմիջապէս եւ ուղղակի հիւանդանոց մուտք գործելու` որեւէ շտապ վիճակի պարագային, պայմանաւ որ ան աւելի ուշ նախարարութենէն հաւանութիւն ստանայ:

LEAVE A REPLY

Please enter your comment!
Please enter your name here