Հայկական Երեսփոխանական Պլոքը Խումբ Մը Փաստաբաններու Ընկերակցութեամբ Այսօր Կ՛այցելէ Մըլհեմ Խալաֆի

0
425

Հայկական երեսփոխանական պլոքը, նախագահութեամբ ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունիի եւ ընկերակցութեամբ պլոքի անդամ երեսփոխաններ Յակոբ Թերզեանի եւ Ալեքսանտր Մաթոսեանի, այսօր` 16 յունիս 2020-ին, առաւօտեան ժամը 10:00-ին, Իրաւաբաններու սենտիքային մէջ հանդիպում մը պիտի ունենան Իրաւաբաններու սենտիքայի նախագահ Մըլհեմ Խալաֆի հետ:

Հայկական երեսփոխանական պլոքին պիտի ընկերակցին նաեւ խումբ մը փաստաբաններ:

Հանդիպումէն ետք պատուիրակութիւնը հանդէս պիտի գայ յայտարարութեամբ մը:

Միւս կողմէ, երեսփոխան Յակոբ Թերզեան երէկ ներկայացաւ ընդհանուր դատախազ Ղասսան Օուէյտաթին եւ զայն պաշտօնապէս իրազեկ դարձուց ինքզինք Մերտինցիներու արաբական-լիբանանեան միութեան նախագահը յորջորջող Մունիր Հասանի մասին` հայութեան դէմ անոր արձակած վարկաբեկիչ արտայայտութիւններուն եւ Օսմանեան կայսրութեան կողմէ գործուած Հայոց ցեղասպանութիւնը գովաբանելուն համար:

Ազգային Կուսակցութիւններու Համախմբումը Կը Դատապարտէ
Լիբանանահայութեան Դէմ Հրահրուած Գրգռութիւնները

Նշենք, որ երէկ լիբանանեան ազգային կուսակցութիւններու եւ անձնաւորութիւններու համախմբումը, որուն վարչութեան անդամ է ՀՅԴ-ի ներկայացուցիչ Պարոյր Տէր Ղուկասեան, գումարեց կեդրոնական նիստ մը, որուն ընթացքին խստիւ դատապարտեց լիբանանեան ներքին հարցերուն մէջ թրքական միջամտութիւնները, որոնք կը դրսեւորուին կարգ մը քանդիչ խմբաւորումներու կողմէ համայնքային սադրանքներու նախապատրաստութեամբ:

Համախմբումը կտրականապէս մերժեց շրջանառութեան մէջ դրուած բոլոր տեսանիւթերը, որոնք համայնքային սադրանքներ կը սերմանեն եւ լիբանանահայութեան դէմ գրգռութիւններ կը հրահրեն:

Համախմբումը ապահովական կառոյցներէն եւ դատական իշխանութենէն պահանջեց կտրուկ եւ խիստ միջոցառումներ որդեգրել Լիբանանի քաղաքացիական անվտանգութեան եւ ապահովական կայունութեան սպառնացող այդ խմբաւորումներուն դէմ:

LEAVE A REPLY

Please enter your comment!
Please enter your name here