Հաստատուած Են «Քորոնա» Ժահրի Վարակման 397 Նոր Պարագաներ. Մահացած Են 16 Անձեր

0
423

ԵՐԵՒԱՆ, «Սիվիլնէթ».- 15 Յունիսի դրութեամբ՝ Հայաստանի մէջ հաստատուած են «Քորոնա» ժահրի 397 նոր պարագաներ, ապաքինած են 62 անձեր եւ մահացած՝ 16 ուրիշներ:

Հայաստանի մէջ հաստատուած պարագաներուն ընդհանուր թիւը հասաւ 17.064ի, ապաքինածներունը՝ 6276-ի, բուժուածներունը՝ 10.409ի, ընդհանուր քննութիւններունը՝ 83.600ի, իսկ մահերունը՝ 285-ի։

Հայաստանի վարչապետը յայտնեց, որ Հայաստանի կառավարութիւնը կը քննարկէ, թէ հարկադրանքի ի՛նչ այլ միջոցներ կրնան կիրարկուիլ՝ հասարակութեան մէջ անվտանգութեան կանոնները պահպանելու համար: «Ամէն դէպքում, դա կը լինի վարչական մեթոդով, հարկադիր, թէ ոչ-հարկադիր, մինչեւ մենք այդ կանոնը չպահենք, միեւնոյն է` այս խնդիրը չենք յաղթահարելու: Կամ յաղթահարելու ենք հետեւեալ տարբերակով` ով պիտի մահանար, մահանայ, մնան նրանք, ովքեր թեթեւ կը տանեն: Թէպէտ, երիտասարդացում է գնում, հետեւաբար` ոչ ոք երաշխաւորուած չէ: Այսօր թուերում կար, որ 42 տարեկան մահուան դէպք ենք ունեցել», ըսաւ Նիկոլ Փաշինեան:

Գործնական առումով, Հայաստանի մէջ «Քորոնա» համաճարակին դէմ պայքարող բժիշկներուն աջակցելու համար, Հայաստան եկած ֆրանսացի բժիշկները արդէն սկսան աշխոյժ աշխատանքի: Անոնք յատկապէս քննեցին ծանր եւ ծայրայեղ ծանր հիւանդներու պարագաները՝ բուժման վերաբերող քննարկում կատարելով հայաստանցի բժիշկներուն հետ։

Ներգրաւման առաջին նման նախաձեռնութեամբ Հայաստան եկած ֆրանսացի բժիշկներուն հետագային պիտի միանան այլ օտար մասնագէտներ: Այս ծրագիրը իրականութիւն դարձաւ Սփիւռքի գլխաւոր յանձնակատարի գրասենեակին, USAID-ի եւ առողջապահութեան նախարարութեան սերտ համագործակցութեամբ:

LEAVE A REPLY

Please enter your comment!
Please enter your name here