Վարչապետ Տիապ. «Այսօր Սկսաւ Փտածութեան Դէմ Պատերազմը»

0
232

Վարչապետ Հասսան Տիապ երէկ երեկոյեան վարչապետարանին մէջ նախագահեց Պէյրութի եւ Թրիփոլիի մէջ արձանագրուած քանդումներուն վերաբերող յատուկ նիստի մը, որուն ընթացքին շեշտեց, որ Պէյրութի առեւտրական կեդրոնին շուրջ բարոյական ու ապահովական գօտի պիտի հաստատուի:

Ան ընդգծեց, որ պետական թէ սեփական կալուածները քանդած իւրաքանչիւր անհատ պէտք է արգելափակուի:

Վարչապետ Տիապ նախագահեց նաեւ քննչական խորհուրդներու նիստի մը, որուն ընթացքին ըսաւ. «Կառավարութիւնը ամբաստանուած է ոչինչ կատարելու յանցանքով, եւ այդ ամբաստանութիւնը հերքելը առաջնահերթութեան առաջնահերթութիւնն է: Այսօր սկսաւ փտածութեան դէմ պատերազմը, որ երկարատեւ եւ դժուար պիտի ըլլայ: Այդ պատերազմին ընթացքին մենք պիտի ենթարկուինք քաղաքական սուր արշաւներու, դաւաճան ըլլալու ամբաստանութիւններու եւ լուտանքներու: Ոչի՛նչ, կառավարութեան կազմութեան առաջին օրէն իսկ վարժ դարձանք այդ վերաբերումին»:

Վարչապետ Տիապ կոչ ուղղեց քննչական խորհուրդներուն գործելու իրենց խիղճին համաձայն:

Վարչապետ Տիապ նախագահեց Դատական գերագոյն խորհուրդի նիստին` ներկայութեամբ արդարութեան նախարար Մարի Քլոտ Նաժըմի:

Նիստին ընթացքին վարչապետ Տիապ հաստատեց, որ դատական իշխանութիւնը իր աշխատանքը կատարելու համար քաղաքական որոշումի չի կարօտիր:

«Եթէ կայ ոճիր մը, ապա դատական իշխանութեան պարտականութիւնն է հետաքննութիւն բանալ եւ բացայայտել անոր ծալքերը` ինչ տեսակի ոճիր որ ալ ըլլայ ան», ըսաւ ան:

Վարչապետ Տիապ նշեց, որ դատական իշխանութիւնները իրենց լիիրաւ դերակատարութիւնը պէտք է ունենան` առանց այս կամ այն կողմը գոհացնելու միտումներ ունենալու: «Կարելի չէ արտօնել, որ լիբանանցիները զգան, թէ իրենց պետութիւնը զիրենք չի պաշտպաներ, եւ դատական իշխանութիւններուն նկատմամբ իրենց վստահութիւնը կորսնցնեն», շեշտեց Տիապ:

Առաւօտեան Տիապ նախագահեց ելեւմտական-ապահովական նիստի մը, որուն ընթացքին որոշուեցաւ Ընդհանուր ապահովութեան ընդհանուր տնօրէնութեան կից ստեղծել գործողութիւններու սենեակ մը, որուն պարտականութիւնը պիտի ըլլայ ամերիկեան տոլարին դիմաց լիբանանեան դրամանիշի պաշտօնական սակին հսկողութիւնը:

Այս նիստին ընթացքին վարչապետ Տիապ հաստատեց, որ երկիրը քանդող խուլիկաններուն բնական տեղը բանտն է` կոչ ուղղելով, որ խափանարարական արարքներուն մեղսակցած իւրաքանչիւր յանցագործ ձերբակալուի:

Ան հաստատեց, որ իրենց պատասխանատուութիւնն է պաշտպանել քաղաքացիներուն ամսական աշխատավարձերն ու անոնց ապրուստը:

Նշենք, որ Տիապ երէկ ընդունեց Պէյրութի ամերիկեան համալսարանի նախագահ Ֆատլօ Խուրին, որուն հետ քննարկեց համալսարանին վերաբերող հարցեր:

LEAVE A REPLY

Please enter your comment!
Please enter your name here