Համատ Հասան. «Առողջապահութեան Նախարարութիւնը Կը Պատրաստուի Յառաջիկայ Աշնան Դիմակայել «Քորոնա»-ի Համաճարակին Բ. Ալիքը»

0
212
Լիբանանի Մէջ «Քորոնա» Ժահրով Վարակուածներուն Թիւը Հասաւ
1603-
ի, Մահուան Պարագաներունը` 32-ի, Իսկ Ապաքինածներունը` 1077-ի

Առողջապահութեան նախարարութեան տեղեկութիւններուն համաձայն, երէկ Լիբանանի մէջ «Քորոնա» ժահրով վարակուածներուն թիւը հասաւ 1603-ի` վերջին 24 ժամուան ընթացքին արձանագրելով 16 նոր վարակուածներ, որոնցմէ 11-ն տեղացիներ են, իսկ 5-ը` արտերկրի լիբանանցիներ:

Նախարարութիւնը յայտնեց, որ ցարդ «Քորոնա» ժահրով 32 վարակուած պարագաներ մահացած են, իսկ 1077 ուրիշներ` ապաքինած:

Առողջապահութեան նախարար Համատ Հասան երէկ հանդիպում մը ունեցաւ զբօսաշրջական ընկերութիւններու համախմբումը ներկայացնող պատուիրակութեան մը հետ:

Հանդիպումին ընթացքին Հասան յայտնեց, որ «Քորոնա»-ի համաճարակի դէմ պայքարի ազգային շտապը մօտիկ ապագային պիտի հրապարակէ նախազգուշութիւններու ցանկ մը, որ պէտք է որդեգրուի զբօսաշրջիկներուն կողմէ` պաշտպանելու համար երկրին առողջապահական կայունութիւնը` տնտեսական զարգացում իրականացնելու զուգահեռ:

Համատ Հասան հաստատեց, որ դիմակներ կրելը անհրաժեշտութիւն մըն է, որմէ կարելի չէ խուսափիլ: Ան աւելցուց, որ առողջապահութեան նախարարութիւնը, տեղեկատուութեան եւ զբօսաշրջութեան նախարարութիւններուն հետ գործակցաբար, պէտք է պանդոկներու եւ ճամբորդական գրասենեակներու համար նախազգուշական վարժանիստեր կազմակերպէ աշխատանքային անձնակազմերն ու զբօսաշրջիկները վարակումէն պաշտպանելու նպատակով:

«Քորոնա» համաճարակին դէմ պայքարին մէջ համաշխարհային մակարդակի վրայ Լիբանանի արձանագրած դրական արդիւնքները առիթ կը ստեղծեն զբօսաշրջական ներդրում կատարելու եւ ուղղուելու Լիբանան», ըսաւ ան` աւելցնելով, որ պէտք է պատրաստուիլ այդ իրականութեան:

Հասան շեշտեց նաեւ, որ առողջապահութեան նախարարութիւնը կը պատրաստուի յառաջիկայ աշնան դիմակայել «Քորոնա»-ի համաճարակին երկրորդ ալիքը, եթէ մօտիկ ապագային անոր պատուաստը կարելի չըլլայ ստեղծել:

Նշենք, որ «Քորոնա»-ի համաճարակի դէմ պայքարի ազգային շտապի պետ հազարապետ-զօրավար Մահմուտ Ասմար յայտնեց, որ «Քորոնա» ժահրով վարակուածներուն թիւը հետզհետէ աճ կ՛արձանագրէ, որովհետեւ վարակումը կանխարգիլելու նպատակով որդեգրելի միջոցառումներուն յանձնառու մնալու իմաստով թուլութիւն կայ քաղաքացիներուն կողմէ:

Ասմար շեշտեց, որ «Քորոնա» ժահրով վարակուած պարագաները պէտք է անպայման առողջապահական մեկուսացումի ենթարկուին, որպէսզի չվարակեն իրենց շուրջինները:

Այս շրջագիծին մէջ ան կոչ ուղղեց Լիբանան ժամանած արտերկրի լիբանանցիներուն` յանձնառու մնալու որդեգրուած այդ միջոցառումներուն:

Ասմար ընդգծեց, որ Պէյրութի միջազգային օդակայանի վերաբացումը բոլորին համար քննութիւն է` աւելցնելով, որ համաճարակի տարածումին եւ այդ միջոցառումներուն յանձնառու չմնալու պարագային պիտի որդեգրուին աւելի խիստ միջոցառումներ, ինչպէս որ է պարագան շատ մը երկիրներու մէջ:

Միւս կողմէ, ներքին գործոց եւ քաղաքապետութեանց հարցերու նախարար Մոհամետ Ֆահմի երէկ ընդունեց Հզօր Լիբանան համախմբումի երեսփոխան Էլիաս Պու Սաապը, որուն հետ քննարկեց քաղաքացիներուն կողմէ լիբանանեան պետութեան նեցուկ կանգնելու կարեւորութիւնը` դիմագրաւելու համար Լիբանանի դէմ ծառացող տագնապները:

Պու Սաապ յայտնեց, որ ներկայիս Լիբանան կը գտնուի նոր կացութեան մը դիմաց, որուն ընթացքին «Քորոնա» ժահրով վարակուածներուն թիւերը հետզհետէ աճ կ՛արձանագրեն: «Հաւանաբար մենք «Քորոնա»-ի համաճարակի երկրորդ ալիքի մը դէմ յանդիման գտնուինք սեպտեմբեր ամսուան ընթացքին, եւ Լիբանանեան-քանատական հիւանդանոցը, որ առողջապահութեան նախարարութեան տրամադրութեան տակ դրած էինք, կարելի է օգտագործել, իբրեւ Բ. ծրագիր», յայտնեց Պու Սաապ:

LEAVE A REPLY

Please enter your comment!
Please enter your name here