«Նախագահ Աուն Կը Զօրակցի Երիտասարդական Քաղաքականութեան Աշխուժացման» Շեշտեց Նախարար Օհանեան-Գէորգեան

0
235

Երիտասարդութեան եւ մարմնակրթութեան նախարար Վարդինէ Օհանեան-Գէորգեան երէկ այցելեց հանրապետութեան նախագահ զօր. Միշել Աունի, որուն հետ քննարկեց նախարարութեան վերաբերող հարցերն ու Լիբանանի երիտասարդութիւնը յուզող խնդիրները, յատկապէս նկատի ունենալով, որ նախարարութիւնը կը գործակցի միջազգային կազմակերպութիւններու հետ` երիտասարդական ծրագիրներ մշակելու նպատակով:

Հանդիպումէն ետք նախարար Օհանեան-Գէորգեան յայտնեց, որ ներկայիս կը կազմակերպուին հանդիպումներ լիբանանցի երիտասարդներու հետ, ըլլան անոնք քաղաքական ուժերու երիտասարդական եւ ուսանողական թեւեր, քաղաքացիական ընկերութեան ներկայացուցիչներ, տարբեր միութիւններու եւ կազմակերպութիւններու մէջ գործող կամաւոր տղաք:

Նախարար Օհանեան-Գէորգեան նշեց, որ «Զում»-ի միջոցով կը կազմակերպուին նաեւ քննարկումներ` երիտասարդական քաղաքականութեան վերաբերող յանձնարարութիւններուն` թիւով 136, ինչպէս նաեւ անոնց առաջնահերթութիւններուն մասին խորհրդակցելու նպատակով:

«Նախագահ Աունի մօտ շօշափեցինք զօրակցութիւն եւ ընդառաջում այս ծրագիրներուն: Ան կը զօրակցի երիտասարդական քաղաքականութեան աշխուժացման` յատկապէս նկատի ունենալով, որ լիբանանցի երիտասարդներու մեծ համեմատութիւն մը կը տառապի անգործութենէ», շեշտեց նախարար Օհանեան-Գէորգեան` աւելցնելով, որ ինք համապատասխան նախարարութիւններու հետ պիտի գործակցի` երիտասարդական քաղաքականութիւնը աշխուժացնելու ի խնդիր:

LEAVE A REPLY

Please enter your comment!
Please enter your name here