Տնտեսական Վատթարացող Կացութեան Եւ Սղաճին Դէմ Բողոքի Ցոյցերը Վերսկսան

0
222

Երկրին մէջ հետզհետէ շեշտուող տնտեսական տագնապին, սղաճին եւ ամերիկեան տոլարին դիմաց լիբանանեան դրամանիշի արժեզրկումին դէմ իբրեւ բողոքի արտայայտութիւն` երէկ երեկոյեան լիբանանեան տարբեր շրջաններուն մէջ արձանագրուեցան ցոյցեր, որոնց ընթացքին ցուցարարները հրկիզեցին անիւներ եւ կոչ ուղղեցին ժողովուրդին, որ իսկոյն փողոց իջնեն եւ ցոյցեր կատարեն, իսկ Ռինկի կամուրջին վրայ արձանագրուեցան բախումներ` ցուցարարներուն եւ ապահովութեան ուժերուն միջեւ:

Արձանագրուեցան վիրաւորներ:

Համրայի մէջ, Կեդրոնական դրամատան դիմաց, ցուցարարները կատարեցին բողոքի ցոյց մը, որուն ընթացքին բախումներ կամ խափանարարական արարքներ չարձանագրուեցան:

Ժողովրդային շարժումի ցուցարարները հրկիզուած անիւներով փակեցին նաեւ Սելիմ Սլամի կամուրջը, Ժունիէի, Արամանի եւ Ժիէի մայրուղիները, Այն Մրայսէն, Քորնիշ Մազրաան, Տահր Պայտար միջազգային ճամբան եւ այլ շրջաններ:

Թրիփոլիի մայրուղին, Նուր հրապարակը, Ժապալ Մըհսենի եւ Թըպպանէի բոլոր ճամբաները եւս փակուեցան:

Նապաթիէի եւ Սուրի հրապարակները ողողուեցան ցուցարարներով: Նոյնն էր պարագան նաեւ Սայտայի Էլիա հրապարակին:

Պեքաայի Շանէյ, Պհամտուն, Զահլէ, Շթորա, Ժտիթա, Սաատնայէլ շրջանները տանող ճամբաները փակուեցան:

Գիշերուան ժամը 11:00-ին ցուցարարներ անիւներ հրկիզեցին Ժունիէի սերային դիմաց` մերժելով Քաղաքացիական ընկերութեան գործիչի մը հետ կատարուած հարցաքննութիւնը:

LEAVE A REPLY

Please enter your comment!
Please enter your name here