Ուաշինկթըն Պաքուն Զգուաշուցած Է Լայնածաւալ Ռազմափորձերուն Գծով, Սակայն․․․

0
378

ՈՒԱՇԻՆԿԹԸՆ․- Ամերիկայի Հայ Դատի յանձնախումբը կը տեղեկացնէ, թէ Միացեալ Նահանգներու արտաքին գործոց նախարարութեան «Սպառազինութիւններու վերահսկողութեան մասին» տարեկան զեկուցումին մէջ կը նշուի, թէ Ուաշինկթըն արդէն անցեալ Օգոստոսին Պաքուն զգուաշուցած էր լայնածաւալ ռազմափորձերուն գծով եւ յաւելեալ թափանցիկ ըլլալու կոչ ըրած էր։

«Ըստ Վիեննայի համաձայնագիրին, Ատրպէյճան պարտաւոր էր տեղեակ պահել նման ռազմափորձերու մասին, սակայն անիկա այդ բանը չէ կատարած», կը նշուի նշեալ զեկուցումին մէջ։

Նշենք, որ այս տարուան 18-22 Մայիսին, Ատրպէյճանի մէջ կատարուած լայնածաւալ եւ յարձակողական բնոյթի ռազմափորձերէն ետք, Քոնկրեսի Հայկական համախմբումը դիմած էր արտաքին գործոց նախարարութեան՝ մտագոհութիւն յայտնելով յատկապէս Պաքուին 120 միլիոն տոլարի ամերիկեան ռազմական աջակցութեան գծով, ինչ որ համախմբումը եւ Հայ Դատը Քոնկրեսին կողմէ 1992-ին վաւերացուած «Ազատութեան աջակցութեան» որոշումին թիւ 907-րդ յօդուածին յստակ խախտում կը նկատեն։

Սակայն, արտաքին գործոց նախարարութիւնը Արցախի տագնապին խաղաղ լուծում մը ապահովելու նպատակով, Պաքուին ռազմական աջակցութիւնները սահմանափակող այդ յաւելուածին խախտում մը չէր նկատած ռազմական աջակցութիւնները՝ պնդելով, որ Պաքու խոստացած է յարձակողապաշտ նպատակներու համար չօգտագործել զանոնք։

Գալով Մայիսի ռազմափորձերուն, արտաքին գործոց նախարարութիւնը հաղորդեց, թէ բաւարար փաստեր չունի, որ անոնք լայնածաւալ էին․․․

LEAVE A REPLY

Please enter your comment!
Please enter your name here