Պուսթրոս Պալատին Մէջ. «Ցաւալի Այս Դէպքին Էջը Փակեցինք, Որպէսզի Բոլորս Կեդրոնանանք Իսկական Տագնապի Լուծման Վրայ» Շեշտեց Միացեալ Նահանգներու Դեսպանը

0
151

Արտաքին գործոց եւ արտերկրի լիբանանցիներու հարցերու նախարար Նասիֆ Հըթթի երէկ նախարարութեան կեդրոնին մէջ ընդունեց Լիբանանի մէջ Միացեալ Նահանգներու դեսպան Տորըթի Շիան, որուն հետ քննարկեց անոր հաշուոյն արձակուած դատական վճիռը, որուն հեղինակն էր Սուրի մէջ հրատապ հարցերու դատաւոր Մոհամետ Մազեհը:

Հանդիպումին ընթացքին Հըթթի ընդգծեց, որ խօսքի ու մամլոյ ազատութիւնը սուրբ իրաւունք է: Ան դեսպանին հետ քննարկեց լիբանանեան իրադարձութիւնները, լիբանանեան-ամերիկեան երկկողմանի յարաբերութիւնները` ընդգծելով Լիբանանի եւ Միացեալ Նահանգներու կառավարութիւններուն միջեւ բոլոր մարզերուն պարագային գործակցութիւնը ամրապնդելու անհրաժեշտութիւնը` Լիբանանը իր դիմագրաւած տագնապէն դուրս բերել կարենալու համար:

Հանդիպումէն ետք Շիա յայտնեց, որ արտաքին գործոց նախարարին հետ հանդիպումը դրական էր` նշելով, որ այդ հանդիպումին ընդգծուեցաւ լիբանանեան-ամերիկեան երկկողմանի յարաբերութիւններուն կարեւորութիւնը թէ՛ Լիբանանի եւ թէ՛ Միացեալ Նահանգներուն համար:

«Հիմնական հարցը, որ քննարկեցինք իմ հաշուոյս արձակուած դատական վճիռն էր: Ցաւալի այս դէպքին էջը փակեցինք, որպէսզի բոլորս կեդրոնանանք իսկական տագնապին` Լիբանանի տնտեսական տագնապին լուծման վրայ», ըսաւ Շիա:

Ան հաստատեց, որ Միացեալ Նահանգներ պիտի շարունակեն օժանդակել Լիբանանին, այնքան ատեն որ կառավարութիւնը տագնապին դրդապատճառները լուծելու քայլերու կը դիմէ:

Շիա ընդգծեց, որ Ուաշինկթըն կը գնահատէ լիբանանեւամերիկեան փոխադարձ գործակցութիւնն ու միացեալ շահերն ու նպատակները պահպանելու ջանքերը, յատկապէս այս դժուար պայմաններուն ընթացքին:

«Կը հաստատեմ, որ մեր յարաբերութիւնը միացեալ եւ ամուր յարաբերութիւն մըն է, որ պիտի շարունակէ ծառայել յօգուտ լիբանանցիներուն եւ ամերիկացիներուն», շեշտեց ան:

Երեկոյեան Լիբանանի մէջ ամերիկեան դեսպանատունը հրապարակեց հաղորդագրութիւն մը, որուն մէջ նշուեցան Պուսթրոս պալատին մէջ Շիայի կատարած վերոնշեալ յայտարարութիւնները:

Միւս կողմէ, դատաւոր Մազեհ այսօր պիտի հրաժարէր իր պաշտօնէն` պաշտպանելով Դատական իշխանութեան գերագոյն խորհուրդի արժանապատուութիւնը, սակայն երէկ երեկոյեան կարգ մը վստահելի աղբիւրներ հաստատեցին, որ Դատական իշխանութեան գերագոյն խորհուրդը դատաւոր Մազեհի դէմ պատժական տնօրինում պիտի չորդեգրէ, եւ ան պիտի շարունակէ իր աշխատանքը դատական իշխանութեան մէջ:

LEAVE A REPLY

Please enter your comment!
Please enter your name here