Պրիւքսելի Դ. Խորհրդաժողովին. «Լիբանանը Պէտք Է Զերծ Կացուցել Սուրիացիներուն Դէմ Որդեգրուելիք Պատժամիջոցներուն Հետեւանքներէն, Յատկապէս` «Սիզըր» Ամերիկեան Պատժամիջոցին» Շեշտեց Վարչապետ Տիապ

0
90

Վարչապետ Հասսան Տիապ երէկ ելեկտրոնային կապով  մասնակցեցաւ «Սուրիոյ եւ շրջանի ապագային զօրակցութեան» Պրիւքսելի Դ. խորհրդաժողովին, որուն ընթացքին իր արտասանած խօսքին մէջ շեշտեց, որ Լիբանան պիտի շարունակէ գործակցիլ` ի խնդիր սուրիացի տեղահանուածներուն տառապանքին մեղմացման, ինչպէս նաեւ հիւրընկալ երկիրներու կարողութիւններուն ամրապնդումին:

Վարչապետ Տիապ յայտնեց, որ «Քորոնա»-ի համաճարակին եւ Սուրիոյ տագնապի քաղաքական լուծման բացակայութեան լոյսին տակ ամէնէն աւելի տուժողները կ՛ըլլան սուրիացի տեղահանուածները:

Ան շեշտեց, թէ Լիբանանի կառավարութիւնը կ՛աշխատի փրկել երկիրը, որ լուրջ տագնապներու մէջ է, եւ այդ տագնապներուն պատճառով ալ անոր քաղաքացիներուն մեծ մասը վերածուած են տկար հասարակութեան:

«Լիբանանը պէտք է զերծ կացուցել սուրիացիներուն դէմ որդեգրուելիք պատժամիջոցներուն հետեւանքներէն, յատկապէս «Սիզըր» ամերիկեան պատժամիջոցին», շեշտեց վարչապետ Տիապ` աւելցնելով, որ սուրիացի տեղահանուածներուն թղթածրարի լուծումը կը կայանայ անոնց ապահով տունդարձին մէջ, եւ ընդգծեց, որ Սուրիոյ տագնապին քաղաքական լուծում ապահովելը պէտք չէ կապել տեղահանուածներուն տունդարձին հետ:

Միւս կողմէ, վարչապետ Տիապին որոշումով, պետական հաստատութիւններուն, վարչութիւններուն, քաղաքապետարաններուն եւ քաղաքապետական համադաշնակցութիւններուն մէջ յաւելեալ ժամեր աշխատելու դրութիւնը այսօրուընէ սկսեալ վերջ պիտի գտնէ:

Նշենք,թէ վարչապետարանի տեղեկատուական գրասենեակը երէկ յայտնեց, որ վարչապետ Տիապ երէկ ՄԱԿ-ի մէջ լիբանանեան ներկայացուցչութեան կողմէ` արտաքին գործոց նախարարութեան միջոցով տեղեակ պահուած է, թէ Լիբանան ընտրուած է ՄԱԿ-ի 75-րդ ընդհանուր ժողովին փոխնախագահներէն մէկը:

LEAVE A REPLY

Please enter your comment!
Please enter your name here