Հաղորդագրութիւն. Արամ Ա. Վեհափառ Հայրապետը Իր Հայրական Օրհնութիւնը Տուաւ Լիբանանահայ Օժանդակութեան Պէզիքեան Ծրագիրի Գործադիր Վարչութեան

0
195

Քանի մը օր առաջ, պաշտօնական հաղորդագրութեամբ, Մեծի Տանն Կիլիկիոյ կաթողիկոսութիւնը գոհունակութեամբ յայտարարեց, թէ ՆՍՕՏՏ Արամ Ա. վեհափառ հայրապետի գահակալութեան 25-ամեակին առիթով, ազգային բարերարներ տէր եւ տիկին Ալեքքօ եւ Անի Պէզիքեաններ, լիբանանահայ կարիքաւոր ընտանիքներու զօրակցութեան համար կը տրամադրեն մէկ միլիոն ամերիկեան տոլար:

Ուստի, կու գանք տեղեկացնելու, որ արդիւնաւոր կերպով իրականացնելու համար Պէզիքեան ամոլին կողմէ կատարուած իշխանավայել այս նուիրատուութեամբ նախատեսուած լիբանանահայ կարիքաւոր ընտանիքներու օժանդակութեան աշխատանքը, Ազգային առաջնորդարանին գլխաւորութեամբ արդէն իսկ կազմուած է Լիբանանահայ օժանդակութեան Պէզիքեան ծրագիրի գործադիր վարչութիւնը, որ աշխատանքի լծուելէ առաջ, պատշաճ նկատեց ստանալ վեհափառ հայրապետին օրհնութիւնը եւ այնուհետեւ անցնիլ հինգ ամիսներու վրայ տարածուող օժանդակութեան գործին:

Ուստի, երեքշաբթի, 30 յունիս 2020-ի երեկոյեան, Լիբանանի հայոց թեմի կաթողիկոսական փոխանորդ Շահէ եպս. Փանոսեանի գլխաւորութեամբ, Լիբանանահայ օժանդակութեան Պէզիքեան ծրագիրի գործադիր վարչութիւնը պաշտօնապէս այցելեց ՆՍՕՏՏ Արամ Ա. վեհափառ հայրապետին եւ ստացաւ անոր հայրական օրհնութիւնը:

Պիքֆայայի Ս. Աստուածածին վանքի վեհարանին մէջ, վեհափառ հայրապետը ընդունելով Լիբանանահայ օժանդակութեան Պէզիքեան ծրագիրի գործադիր վարչութիւնը, նախ տեղեկացաւ ցարդ տարուած նախապատրաստական աշխատանքներուն մասին եւ իր օրհնութեան խօսքին ու յաջողութեան մաղթանքներուն ընդմէջէն կարեւորութեամբ յիշեցուց, թէ Մեծի Տանն Կիլիկիոյ կաթողիկոսութեան խողովակով, Պէզիքեան ամոլը շարունակաբար եղած է մեր եկեղեցւոյ կողքին ու լիբանանահայութեան հետ: Այսօր, լիբանանեան կեանքի տագնապալի պայմաններուն մէջ, ըսաւ վեհափառ հայրապետը, միեւնոյն վստահութեամբ ու կեցուածքով, Պէզիքեան ամոլը դարձեալ կը յայտնուի մեր եկեղեցւոյ կողքին` իշխանավայել օժանդակութեամբ աջակցելու համար լիբանանահայութեան օժանդակութեան գործին: Այնուհետեւ, յոյս յայտնելով, որ տագնապալի այս պայմանները շուտով կը հեռանան մեր կեանքէն, վեհափառ հայրապետը յաջողութիւն մաղթեց յանձնախումբին եւ յիշեցուց, որ իբրեւ եկեղեցի, կառոյցներ ու պատասխանատուներ, մեր ծառայութիւններով ու նուիրումով մենք պէտք է շարունակաբար ըլլանք մեր ժողովուրդի բոլոր զաւակներուն կողքին, որպէսզի ազգովին մնանք կանգուն ու կենդանի:

ԴԻՒԱՆ ԱԶԳԱՅԻՆ ԱՌԱՋՆՈՐԴԱՐԱՆԻ

LEAVE A REPLY

Please enter your comment!
Please enter your name here