Ուազնի Նախագահեց Դրամատուներու Քննչական Յատուկ Յանձնախումբի Նիստին

0
4

Ելեւմուտքի նախարար Ղազի Ուազնի երէկ նախարարութեան կեդրոնին մէջ նախագահեց դրամատուներու քննչական յատուկ յանձնախումբի նիստին` ներկայութեամբ յանձնախումբի նախագահ Մայա Տապպաղի եւ յանձնախումբի անդամներ Մարուան Մխայէլի, Քամել Ուազնիի, Ատել Տրէյքի եւ Ժոզեֆ Հատտատի:

Նիստին ընթացքին Ուազնի յաջողութիւն մաղթեց յանձնախումբին` անոր ստանձնած դժուար աշխատանքին առումով, ինչպէս նաեւ հաստատեց, որ յառաջիկայ փուլին անոր տալիք որոշումները դժուար պիտի ըլլան, որովհետեւ անոնք ուղղակիօրէն կապուած պիտի ըլլան դրամատնային մարզի ճակատագիրին, տնտեսական կացութեան, ելեւմտական համակարգին, ինչպէս նաեւ երկրին ճակատագիրին:

Ուազնի ընդգծեց, որ յանձնախումբին վստահուած պատասխանատուութիւնը մեծ է, եւ բոլորը կը սպասեն տեսնելու համար, թէ յանձնախումբը ի՛նչ արժեւորում պիտի տայ դրամատնային աշխատանքին:

Միւս կողմէ, Ուազնի հանդիպում մը ունեցաւ նաեւ Կեդրոնական դրամատան մէջ կառավարութեան ներկայացուցիչ Քրիսթել Ուաքիմի հետ:

Հանդիպումին ընթացքին ան դրուատեց Ուաքիմի դերակատարութիւնը եւ յանձնառութիւնը` Կեդրոնական դրամատան մէջ օրէնքի գործադրութեան եւ հաշուական գործառնութեան հսկողութեան առումով:

Նշենք, որ Ուազնիի գրասենեակը հրապարակեց հաղորդագրութիւն մը, որ կը նշէ, թէ ելեւմուտքի նախարարին տեղեկատուական գրասենեակը կը հաստատէ, որ նախարարութեան եւ Միջազգային դրամական ֆոնտին միջեւ բանակցութիւնները կը շարունակուին:

Նոյն հաղորդագրութեան մէջ նշուեցաւ, որ Միջազգային դրամական ֆոնտը բանակցող լիբանանեան պատուիրակութենէն պահանջեց իրեն ներկայացուած թիւերը նոյնացնել եւ պահանջուած բարեկարգումները գործադրել:

LEAVE A REPLY

Please enter your comment!
Please enter your name here