Մենք շարունակում ենք ձեզ տեղեկացնել հայ-ադրբեջանական սահմանային իրավիճակի մասին

0
296

Յարգելի հայրենակիցներ,

Մենք կը շարունակենք ձեզ տեղեկացնել հայ-ատրպէճանական սահմանային իրավիճակի
մասին։ Ձեզի կ’ուղարկենք մինչ այս ժամը կատարուած իրադարձութիւններուն
մասին քառալեզու (արեւելահայերէն, արեւմտահայերէն, անգլերէն, ռուսերէն)
տեղեկանքը։ Արտակարգ դրութեան այս օրերուն մենք կ’աշխատինք արտակարգ
պայմաններու մէջ, որպէսզի իրազեկենք սփիւռքի մեր հայրենակիցներուն տեղի
ունեցող իրադարձութիւններուն մասին՝ տալով ճշգրիտ տեղեկութիւն։

ՀՀ վարչապետի աշխատակազմի
«Հանրային կապերու եւ տեղեկատուութեան կեդրոն» ՊՈԱԿ-ի
Սփիւռքի բաժին

Ատրպէճանը կը շարունակէ նախայարձակումը. կանխուած է աւելի քան 100 հոգինոց խոտորման ներթափանցման փորձ

 

Յուլիս 15-ի լոյս 16-ի գիշերը՝ ժամը 03:40-ի սահմաններուն, հայ-ատրպէճանական պետական սահմանագօտիին հիւսիսարեւելեան հատուածին վրայ ՀՀ ԶՈՒ դիրքապահները նկատած են հակառակորդի շարժ։ Հայկական ստորաբաժանումներն անցած են շրջանաձեւ պաշտպանութեան եւ կանխած են հակառակորդին աւելի քան 100 հոգինոց կազմով խոտորման ներթափանցման փորձը։

Թէժ մարտէն ետք հակառակորդը կորուստներ կրած է եւ յետ շպրտուած է: Հայկական կողմը զոհեր չունի։

Անյաջող խոտորումէն ետք, հակառակորդը ժամը 05:20-էն ականանետերով եւ «Դ-30 հովիցէր»-ով հրետակոծած է Այգեպար եւ Մովսէս գիւղերը: Հայկական ստորաբաժանումները խոցած են հակառակորդի թնդանօթ, հրետանային եւ ականանետային մարտկոցներու կրակային դիրքեր, որոնցմէ կը հրետակոծուէին մեր բնակավայրերն ու դիրքերը:

Կառավարութեան  նիստին վարչապետ Նիկոլ Փաշինեան նշած է, որ զուգահեռ գրոհներ ձեռնարկուած են «Անվախ» դիրքին հարեւան դիրքերուն ուղղութեամբ, սակայն Հայաստանի Զինուած ուժերը բոլոր գրոհները վստահօրէն յետ մղած են եւ իրավիճակն առած են լիակատար վերահսկողութեան տակ։

Հայաստանի Արտաքին գործոց նախարարութիւնը յայտարարած է, որ ատրպէճանական յարձակողականութիւնը տեղի ունեցած է մարտական գործողութիւններու դադարեցման վերաբերեալ առաւել վաղ ձեռք բերուած պայմանաւորուածութեան խախտմամբ:

«Ատրպէճանի ռազմաքաղաքական ղեկավարութիւնն իր անհեռատես քաղաքականութեամբ յայտնուած է փակուղային իրավիճակի մէջ եւ կը ձեռնարկէ արկածախնդիր եւ ոչ կշռադատուած քայլեր, որոնց համար պատասխան պիտի տայ իր իսկ ժողովուրդին առջեւ», – ըսուած է յայտարարութեան մէջ:

ՀՀ Պաշտպանութեան նախարար Դաւիթ Տոնոյեան ԵԱՀԿ գործող նախագահի անձնական ներկայացուցիչ, դեսպան Անճէյ Քասփրչիկին ներկայացուցած է պետական սահմանին վրայ ստեղծուած իրավիճակը: Նախարարը նշած է, որ ատրպէճանական կողմն ունի բազմաթիւ վիրաւորներ եւ զոհեր։ Պաշտպանութեան նախարարը տեղեկացուցած է, որ Հայաստանի Հանրապետութեան սահմաններուն նկատմամբ Ատրպէճանի ոտնձգութիւնները բոլոր ուժերով եւ միջոցներով կը տապալին։

Դեռեւս երէկ Ճգնաժամային տեղեկատուական կեդրոնէն ներս տեղի ունեցած ճեպազրոյցի ընթացքին Մարդու իրաւունքներու պաշտպան Արման Թաթոյեան յայտնած է, որ հակառակորդի կողմէն հրետակոծութիւններուն պատճառած վնասներէն մեծ մասը հասցուած է Տաւուշի մարզի Այգեպար համայնքին։ «Այգեպար գիւղին մէջ դիտարկուած է 11 քաղաքացիական տուն, որոնք պարզապէս ենթարկուած են հրետակոծութեան։ Բնակիչներուն հետ մեր առանձնազրոյցները, քննարկումները կը ցուցանեն, որ խօսքն այնպիսի հրետանային արկերու մասին է, որ ներսէն կը պայթին եւ բեկորներու կը վերածուին։ Այդ բեկորներն այնպիսին են, որ կրնան ակնյայտ կեանքի եւ առողջութեան վնաս հասցնել»,- ըսաւ Թաթոյեան։ ՄԻՊ-ի այս պահի վերլուծութիւնները կը վկայեն այն մասին, որ խօսքը քաղաքացիական բնակչութեան վնաս հասցնելու մտադրութեան մասին է։

Արման Թաթոյեան նշած է, որ Բերդ քաղաքին մէջ հրետակոծուած էր «Տաւուշ տեքստիլ»-ը, ինչպէս նաեւ Երեւանի կոնեակի գործարանի մասնաճիւղը։ «Ասիկա յատկապէս մտահոգիչ է եւ խիստ դատապարտելի, որովհետեւ «Տաւուշ տեքստիլ»-ը կ’արտադրէ բժշկական դիմակներ, այն ալ թագաժահրի պայմաններուն մէջ։ Խօսքը կը վերաբերի ակնյայտ մարդասիրական հարցի մասին եւ, բնականաբար, միջազգային մարդասիրական իրաւունքի կանոններու խախտման մասին »,- ընդգծած է Թաթոյեան։

ՀՀ Արտաքին գործոց նախարար Զօհրապ Մնացականեան «ալ-Ճազիրա»-ին տուած հարցազրոյցին մէջ անգամ մը եւս ամրագրած է, որ Հայաստանն ունի պաշտպանուելու կարողութիւն եւ կը հանդիսանայ Արցախի անվտանգութեան երաշխաւորը:

ԱՄՆ պետական քարտուղար Մայք Փոմփէո յուլիս 15-ի մամլոյ ասուլիսին մէջ մասնաւորապէս նշած է. «ԱՄՆ-ը խորապէս անհանգստացած է Հայաստանի եւ Ատրպէճանի միջազգային սահմանի մահաբեր բռնութեամբ: Մենք կը ցաւակցինք բոլոր զոհերու հարազատներուն եւ կոչ կ’ուղղենք կողմերուն անյապաղ կասեցնել տեղաշարժը, վերսկսիլ բովանդակային երկխօսութիւնն ու պահպանել հրադադարը, որպէսզի Մինսկի խումբի համանախագահութեան ներքոյ սկսին բանակցութիւնները»,- ըսած է Փոմփէո:

LEAVE A REPLY

Please enter your comment!
Please enter your name here