Հաղորդագրութիւն

0
311

Մերձաւոր Արեւելքի մէջ Արցախի Հանրապետութեան մշտական ներկայացուցչութենէն պատուիրակութիւն մը այսօր այցելեց լիբանանահայ յարանուանութեանց երեք պետերուն` Լիբանանի հայոց թեմի կաթողիկոսական փոխանորդ Շահէ եպս. Փանոսեանի, Տանն Կիլիկիոյ Կաթողիկէ Հայոց ամենապատիւ եւ գերերջանիկ տէր Գրիգոր Պետրոս Ի. կաթողիկոս պատրիարքի, Մերձաւոր Արեւելքի Հայ աւետարանական եկեղեցիներու միութեան նախագահ վեր. Մկրտիչ Գարակէօզեանի եւ Մերձաւոր Արեւելքի Հայ աւետարանական եկեղեցիներու միութեան կեդրոնական մարմինի ատենապետ վեր. դոկտ. Փոլ Հայտոսթեանի, եւ անոնց յանձնեց Արցախի Հանրապետութեան նախագահ Արայիկ Յարութիւնեանի յանձնարարականով եւ Արցախի Հանրապետութեան արտաքին գործոց նախարար Մասիս Մայիլեանի գործադրութեամբ` Լիբանանի հայ գաղութին յատկացուած օժանդակութիւնը:

Լիբանանի այս ճգնաժամային օրերուն, Արցախը օգնութեան ձեռք երկարելով լիբանանահայ իր եղբայրներուն եւ քոյրերուն` թեթեւցնելու համար անոնց առօրեայ մտահոգութիւնները, Արցախի Հանրապետութեան պետական պիւտճէէն Լիբանանի հայ գաղութին յատկացուց 10 միլիոն հայկական դրամ, որ պիտի տրամադրուի իւրաքանչիւր համայնքի զաւակներուն դեղորայքի եւ սննդեղէնի պէտքերուն:

«Հայութեան բարոյական պարտականութիւնն է կանգուն պահել Լիբանանի հայ գաղութը, որ միշտ տուած է եւ հասած է հոն, ուր պէտք եղած է հասնիլ», նշեց Մերձաւոր Արեւելքի մէջ Արցախի Հանրապետութեան մշտական ներկայացուցիչ Կարօ Քէպապճեան եւ աւելցուց. «Արցախը միշտ երախտապարտ եղած է եւ կը մնայ լիբանանահայ գաղութին` չմոռնալով անոր մեզի տուած անգին օժանդակութիւնը: Մեր մաղթանքն է, որ գաղութը եւ երկիրը շուտ դուրս գան այս կրկնակի ճգնաժամէն, եւ շուտով հանդիպինք ազատ Արցախի մէջ»:

Հոգեւոր պետերը իրենց կարգին շատ բարձր գնահատեցին Արցախի պետութեան կողմէ տրուած այս օժանդակութիւնը, յատկապէս ըսելով, որ բարոյական եւ խորհրդանշական մեծ արժէք ունենալով` յատկացուած գումարը շա՛տ աւելին է, քան ինչ որ կ՛ըսեն թիւերը:

Անոնք յոյս յայտնեցին, որ միասնաբար շուտով դուրս պիտի գանք այս ճգնաժամէն, եւ Հայաստանի ու Արցախի երկինքներուն մաղթեցին խաղաղութիւն ու կայունութիւն:

LEAVE A REPLY

Please enter your comment!
Please enter your name here