Լիբանանի Մէջ «Քորոնա» Ժահրով Վարակուածներուն Թիւը Հասաւ 3750-ի, Մահուան Պարագաներունը` 51-ի, Իսկ Ապաքինածներունը` 1692-ի

0
227
Պաշտպանութեան Գերագոյն Խորհուրդը Վաղը Պիտի Գումարէ Նիստ Մը` Քննարկելու Համար Աւելի  Խիստ Նախազգուշութիւններ Որդեգրելու Կարելիութիւնները:

«Քորոնա» համաճարակին «ուժգնութիւն»-ը սկսած է մտահոգիչ դառնալ լիբանանեան պետութեան եւ լիբանանցիներուն համար: Սակայն մտահոգուելով հանդերձ, լիբանանցին հարիւր առ հարիւր չի գործադրեր նախազգուշական միջոցառումները, յատկապէս` քթակապի գործածութիւնը:

Այս շրջագիծին մէջ «Քորոնա» ժահրով վարակուածներուն թիւը հետզհետէ կ՛աւելնայ, եւ հակակշիռէ դուրս ելած է վարակման աղբիւրը ճշդելու կարողութիւնը, որ հիմնական միջոցն էր` համաճարակը հակակշիռի տակ առնելու:

Վարակումի պարագաները հասան մինչեւ պետական շրջանակներ:

Հզօր հանրապետութիւն պլոքի երեսփոխան Ժորժ Օքէյս յայտնեց, որ ինք վարակուած է «Քորոնա» ժահրով եւ առողջական մեկուսացումի մէջ կը գտնուի:

Փոխվարչապետ, պաշտպանութեան նախարար Զէյնա Աքր ընդգծեց, որ իր դուստրը եւս վարակուած է:

Խորհրդարանի նախագահ Նեպիհ Պըրրիի մօտիկ աղբիւրներ նշեցին, որ Պըրրի ենթարկուած է «Քորոնա» ժահրը ախտորոշող «Փի. Սի. Ար.»-ի քննութեան, որուն արդիւնքը եղած է ժխտական:

Նոյն աղբիւրները հաստատեցին, որ խորհրդարանի բոլոր անդամները պիտի ենթարկուին «Փի. Սի. Ար.»-ի քննութեան:

Աւելի ուշ յայտարարուեցաւ նաեւ, որ Լիբանանեան Կարմիր խաչի Զահլէի կեդրոնին մէջ ծառայող 17 կամաւորներ վարակուած են «Քորոնա» ժահրով:

Պաշտպանութեան գերագոյն խորհուրդը երեքշաբթի առաւօտեան ժամը 9:30-ին, նախագահական պալատին մէջ պիտի գումարէ նիստ մը, որուն պիտի յաջորդէ կառավարութեան նիստը` ժամը 11:00-ին:

Պաշտպանութեան գերագոյն խորհուրդը պիտի քննարկէ երկրին ապահովական իրավիճակը, ինչպէս նաեւ «Քորոնա» ժահրին տարածումին դէմ պայքարելու միջոցները խստացնելու կարելիութիւնները:

Նշենք, որ խորհրդարանական մնայուն յանձնախումբերու այսօրուան եւ վաղուան բոլոր նիստերը ջնջուած են, իսկ դատարանները պիտի փակեն իրենց դռները:

Պէյրութի իրաւաբաններու սենտիքան եւս յայտարարեց, որ չորս օրուան համար սենտիքան փակ պիտի մնայ:

Առողջապահութեան նախարարութեան տեղեկութիւններուն համաձայն, երէկ Լիբանանի մէջ «Քորոնա» ժահրով վարակուածներուն թիւը հասաւ 3750-ի` վերջին 24 ժամուան ընթացքին արձանագրելով 168 նոր վարակուածներ, որոնցմէ 152-ը` տեղացիներ, իսկ 16-ը` Պէյրութ վերադարձած քաղաքայիններ:

Նախարարութիւնը յայտնեց, որ ցարդ «Քորոնա» ժահրով վարակուած 51 պարագաներ մահացած են, իսկ 1692 ուրիշներ` ապաքինած:

Վարչապետ Հասսան Տիապի առողջապահական հարցերու խորհրդատու Փեթրա Խուրի յայտնեց, որ Լիբանան կը գտնուի վտանգաւոր կացութեան մէջ` աւելցնելով, որ «Քորոնա» ժահրը շատ արագ կերպով կը տարածուի լիբանանեան հասարակութեան մէջ:

«Մօտիկ ապագային մեր հիւանդանոցներուն մէջ պիտի սկսինք ահաւոր պատկերներ վկայել, ինչպէս էր պարագան այլ երկիրներու: Մենք կը գտնուինք շատ վտանգաւոր փուլի մը մէջ», հաստատեց ան:

Առողջապահութեան նախարար Համատ Հասան յայտնեց, որ նախազգուշութիւններուն նկատմամբ ցուցաբերուած ոչ յանձնառու մօտեցումին եւ վարուելակերպին պատճառով, «Քորոնա» ժահրը տարածուած է լիբանանեան բոլոր շրջաններուն մէջ:

«Մենք արդէն իսկ կը գտնուինք չորրորդ փուլին մէջ, ուր լիբանանեան բոլոր շրջաններուն մէջ վարակուածներ կան», ընդգծեց Համատ Հասան:

Ներքին գործոց եւ քաղաքապետութիւններու հարցերու նախարար Մոհամետ Ֆահմի յայտնեց, որ եթէ մինչեւ 15 օգոստոս «Քորոնա» ժահրով վարակուածներուն թիւը այս թափով շարունակուի բարձրանալ, ապա ոչ մէկ հիւանդանոց կարողութիւն պիտի ունենայ նոր պարագաներ ընդունելու:

Ֆահմի ընդգծեց, որ երկիրը դարձեալ փակելը ամէնէն դիւրին որոշումն է` աւելցնելով սակայն, որ տնտեսական եւ առողջապահական մարզերը պէտք է անպայման հաւասարակշռել:

Արձանագրուած այս վարակումներուն ծիրին մէջ, Պէյրութի կառավարական հիւանդանոցի տնօրէն Ֆիրաս Ապիատ երէկուան իր յայտարարութեան մէջ շեշտեց, որ հասած են այնպիսի մակարդակի մը, որ կրնան «Քորոնա» ժահրի տարածման վրայ իրենց հակակշիռը կորսնցնել:

Ապիատ յայտնեց, որ լիբանանեան իշխանութիւնները պէտք է խստացնեն որդեգրուած նախազգուշութիւնները կամ փակեն ամբողջ երկիրը, որպէսզի կարելի ըլլայ դարձեալ հակակշռել վարակումի թափը:

LEAVE A REPLY

Please enter your comment!
Please enter your name here