«Քորոնա» Ժահրին Դէմ Պայքարի Միջոցները Կը Խստանան. Լիբանան Չորսօրեայ Դրութեամբ Փակ Կը Մնայ` Երկու Փուլով

0
174
Լիբանանի Մէջ «Քորոնա» Ժահրով Վարակուածներուն Թիւը Հասաւ 2933-ի, Մահուան Պարագաներունը` 51-ի, Իսկ Ապաքինածներունը` 946-ի

«Քորոնա» համաճարակի դէմ պայքարի Լիբանանի ազգային խորհուրդը երէկ, նախագահութեամբ վարչապետ Հասսան Տիապի, գումարեց նիստ մը, որուն լոյսին տակ տրուեցան կարգ մը որոշումներ, որոնք յայտարարեց ներքին գործոց եւ քաղաքապետութեանց հարցերու նախարար Մոհամետ Ֆահմին:

Ան նշեց, որ այսօրուընէ` երեքշաբթի, 28 յուլիս 2020-էն սկսեալ մինչեւ 10 օգոստոս 2020, փակ պիտի մնան մարզասրահները, մարզադաշտերը, մարզական ակումբները, խորհրդաժողովներու յատուկ սրահները, հանրային պարտէզները, խաղավայրերը, ժողովրդային շուկաները, ծովեզերքի քալելու յատուկ մայթերը, լողափները, լողաւազանները, եկեղեցիներն ու մզկիթները, թատերասրահներն ու շարժապատկերի սրահները:

Ան հաստատեց, որ պիտի ջնջուին կրօնական բոլոր առիթները, մարզական մրցումները, իսկ ճաշարաններն ու սրճարանները, ինչպէս նաեւ հանրութեան երթեւեկի մարզին մէջ գործող ինքնաշարժները իրենց կարողութեան միայն 50 առ հարիւրին հիման վրայ պիտի աշխատին:

Ֆահմի յայտնեց, որ ուրբաթ, 31 յուլիս 2020-էն սկսեալ Լիբանանի սահմաններուն վրայ Լիբանան մուտք գործել փափաքողները ստիպուած են ցոյց տալ իրենց «Փի. Սի. Ար.»-ի քննութեան արդիւնքը` այն պայմանով, որ անիկա ճամբորդութենէն միայն 4 օր առաջ կատարուած ըլլայ:

Ֆահմի շեշտեց, որ այսօրուընէ` երեքշաբթի, 28 յուլիս 2020-էն սկսեալ Լիբանան ժամանող բոլոր քաղաքայինները «Փի. Սի. Ար.»-ի քննութեան պիտի ենթարկուին եւ 48 ժամուան բնակարանային մեկուսացումի մէջ պիտի մնան` մինչեւ արդիւնքներուն յստակացումը:

Ան նշեց, որ հինգշաբթի, 30 յուլիս 2020-էն մինչեւ երկուշաբթի, 3 օգոստոս 2020, ինչպէս նաեւ հինգշաբթի, 6 օգոստոս 2020-էն երկուշաբթի, 10 օգոստոս 2020 Լիբանանի մէջ փակ պիտի մնան բոլոր անձնական հաստատութիւնները, առեւտրական կեդրոնները, շուկաներն ու ընկերութիւնները, կրթական ու դրամատնային մարզը եւ պիտի արգիլուին ամէն տեսակի համախմբումներ:

Այս որոշումէն զերծ կը կացուցուին առողջապահական եւ բժշկական, սննդեղէնի յատուկ, զինուորական, դեղորայքի, ճարտարարուեստի, երկրագործութեան, տեղեկատուութեան հաստատութիւններն ու նաւահանգիստները եւ օդակայանը, պետական հաստատութիւններն ու քաղաքապետարանները:

Միւս կողմէ, այսօր Պաշտպանութեան գերագոյն խորհուրդը առաւօտեան ժամը 9:30-ին, Պաապտայի մէջ, հանրապետութեան նախագահ զօր. Միշել Աունի նախագահութեամբ, պիտի գումարէ արտակարգ նիստ մը, որուն ընթացքին արժեւորումը պիտի կատարէ երկրին մէջ տիրող առողջապահական վտանգաւոր կացութեան եւ համապատասխան յանձնարարութիւններով դուրս պիտի գայ:

Կը նախատեսուի, որ Պաշտպանութեան գերագոյն խորհուրդը կառավարութեան առաջարկէ խստացնել «Քորոնա» ժահրին դէմ պայքարի միջոցառումները:

Առողջապահութեան նախարարութեան տեղեկութիւններուն համաձայն, երէկ Լիբանանի մէջ «Քորոնա» ժահրով վարակուածներուն թիւը հասաւ 2933-ի` վերջին 24 ժամուան ընթացքին արձանագրելով 132 նոր վարակուածներ, որոնցմէ 120-ը` տեղացիներ, իսկ 12-ը` Պէյրութ ժամանած քաղաքայիններ:

Նախարարութիւնը յայտնեց, որ ցարդ «Քորոնա» ժահրով 51 վարակուած պարագաներ մահացած են, իսկ 946 ուրիշներ` ապաքինած:

Առողջապահութեան նախարար Համատ Հասան հաստատեց, որ Լիբանան պիտի մերժէ ընդունիլ Պէյրութ ժամանող քաղաքայիններ, որոնք «Քորոնա» ժահրի ախտորոշման «Փի. Սի. Ար.»-ի քննութիւն չեն կատարած` աւելցնելով, որ ընկերային ապահովագրութիւն (տաման) չունեցող լիբանանցի քաղաքացիները առողջապահութեան նախարարութեան հաշուոյն պիտի բուժուին` «Քորոնա» ժահրով վարակուելու պարագային:

Ան հաստատեց, որ անընդունելի է, որ որեւէ կառավարական հիւանդանոց մերժէ հիւանդ ընդունիլ. «կը հասկնամ, որ դժուար կացութեան մէջ ենք, սակայն մեր կարելին պէտք է ընենք», հաստատեց ան:

LEAVE A REPLY

Please enter your comment!
Please enter your name here