ԿՈՉ` Պուրճ Համուտի Բնակիչներուն Ու Լրատուամիջոցներուն

0
303

«Քորոնա» համաճարակը` հայրենիքին ու ժողովուրդին դիմագրաւած մարտահրաւէրներուն ու ճգնաժամերուն վրայ աւելնալով, վատթարացուց առողջապահական, տնտեսական, դրամական ու ապրուստի պայմանները:

Թէեւ լրատուական արշաւներուն շնորհիւ բարձրացաւ ընդհանուր գիտակցութիւնը, ինչ որ որոշ չափով նպաստեց կասեցնելու համաճարակի տարածումը, հարկ է շնորհակալութիւն յայտնել լրատուական միջոցներուն եւ լրագրողներուն, գիտակցութիւն եւ յանձնառարութիւն ցուցաբերած քաղաքացիներուն, ինչպէս նաեւ մեծ ճիգ ի գործ դրած պետական կառոյցներուն ու միութիւններու, սակայն վերջին շրջանին ակնբախ դարձաւ «Քորոնա»-ի կապուած այլ, բայց նոյնքան մտահոգիչ երեւոյթ մը`  վարակուած անձերուն դէմ մեղադրական եւ խայտառակելու արշաւները` ընկերային ցանցերու ճամբով ու այլ միջոցներով: Այս ծիրին մէջ նաեւ նկատելի դարձաւ վարակակիրներուն  միջավայրը գրգռելու երեւոյթը, որ պատճառ դարձաւ հարազատներու եւ դրացիներու միջեւ հարցերու:

Ուստի այս կոչը կ՛ուղղենք բոլորին` անհրաժեշտ զգուշութիւններու դիմելու, իսկ հիւանդներուն,  շուտափոյթ ապաքինումի մաղթանքով,  մեկուսանալու:

Յատկապէս կոչ կ՛ուղղենք մեր ընկերութեան` հասկացողութիւն ցուցաբերելու վարակուածներուն նկատմամբ, որովհետեւ համաճարակը կը սպառնայ բոլորիս անխտիր.  հարկ է հրաժարիլ խայտառակելու, մեղադրելու ոճէն, որովհետեւ վարակուածը զոհ է, եւ այսպիսի ընթացք կ՛աւելցնէ անոր ունեցած հոգեկան եւ ընկերային ճնշումները, որոնց կ՛ենթարկուին վարակուածը, անոր պարագաները եւ ընդհանուր միջավայրը:

Իսկ ինչ կը վերաբերի լրատուական միջոցներուն ու լրագրողներուն, ապա, բարձր գնահատելով հանդերձ անոնց արշաւներուն շնորհիւ ընդհանուր գիտակցութեան բարձրացումն ու զգուշութիւններու դիմելու հրաւէրը, կոչ կ՛ուղղենք անոնց` հարկ եղած ուշադրութիւնը դարձնելու այս երեւոյթին եւ շեշտը դնելու մարդկային ու բարոյական արժէքներուն վրայ` վարակակիրներու հետ վերաբերումի ընթացքին, ի շահ հաւաքականութեան կայունութեան:

Շնորհակալութիւն յայտնելով բոլորին` իրենց գործակցութեան համար, կը վերահաստատեմ համոզումս, թէ փոխադարձ զօրակցութեամբ ու գործակցութեամբ պիտի յաղթահարենք այս ճգնաժամը:

ՊՈՒՐՃ ՀԱՄՈՒՏԻ ՔԱՂԱՔԱՊԵՏ
ՄԱՐՏԻԿ ՊՕՂՈՍԵԱՆ

LEAVE A REPLY

Please enter your comment!
Please enter your name here