«Ազդակ»-ի 14-րդ Առցանց Լսարան. «Առցանց Թէ Ֆիզիքական Ներկայութեամբ Ստեղծել Միջավայրեր, Ուր Արեւմտահայերէնը Կը Գործածուի Ինքնաբերաբար» Հաստատեց Դոկտ. Ռազմիկ Փանոսեան

0
306

«Ազդակ»-ի 14-րդ առցանց լսարանի զեկուցողն էր «Գալուստ Կիւլպէնկեան» հիմնարկի Հայկական բաժանմունքի տնօրէն դոկտ. Ռազմիկ Փանոսեան, որ զեկուցեց «Արեւմտահայերէնի աշխատանքները եւ Լիբանանի ռազմավարութիւնը. սկզբունքներ, ծրագիրներ եւ մանկավարժական մօտեցումներ» նիւթին մասին:

Զեկուցումը կը բաղկանար երեք մասէ: Սկզբունքներ գլխուն տակ դասախօսը խօսեցաւ աշխատանքներու ազդեցիկ ըլլալու հրամայականին, հայերէնի եւ հայեցիի տարբերութեան, արեւմտահայերէնը մայրենի կամ երկրորդական լեզու դասելուն, համասփիւռքեան մօտեցումի անկարելիութեան, աշակերտակեդրոն ըլլալու եւ լեզուն հաճելի ու հրապուրիչ դարձնելու անհրաժեշտութեան մասին:

Ապա դոկտ. Փանոսեան կեդրոնացաւ Լիբանանի համար որդեգրուած ռազմավարութեան վրայ, ուր նկատի առնուած իբրեւ ընդհանուր կէտեր բանաձեւեց` կրթական կառոյցի բովանդակութեան պատրաստութեան, Միջին Արեւելքի մէջ գործունեայ մնալու կամ չմնալու, լեզուի կենսունակութեան ոչ յարատեւութեան, ռազմավարութեան պատրաստութեան նախորդած աշխատանքներուն եւ երկրի կայունութեան երեւոյթները:

Այս ծիրին մէջ ան հաստատեց լեզուի ժառանգական հանգամանքը եւ շեշտեց առցանց թէ ֆիզիքական առումներով լեզուի բնական եւ ինքնաբերաբար գործածութեան համար միջավայրեր ստեղծելու հրամայականը:

Ռազմավարութեան 5 հիմնասիւները ներկայացնելով` դոկտ. Ռազմիկ Փանոսեան անդրադարձաւ Լիբանանի հայկական վարժարաններուն հետ գործակցութեան պատկերին, ուսուցչական ասպարէզին մէջ մասնագիտանալ փափաքող ուսանողներու կրթաթոշակներու կարելիութեան, արեւմտահայերէնի կենսունականացման համար տրուող օժանդակութիւններուն եւ ուսումնական յատուկ կարիքներ ունեցող աշակերտներուն համար կրթութիւն ապահովելու ծրագիրին:

Առաջադրանքը, ըստ «Գալուստ Կիւլպէնկեան»-ի Հայկական բաժանմունքի տնօրէնին, պիտի ըլլայ կրթական մարզը օժտել մասնագիտական եւ արհեստավարժ մարդուժով:

Դոկտ. Ռազմիկ Փանոսեան հաստատեց, որ յառաջիկայ տասնամեակին մարդուժի առումով պատրաստելը 200 հոգի, որոնց առաջնային գործը պիտի ըլլայ արեւմտահայերէնի զարգացումը, կարելի է համարել գլխաւոր առաջադրանք:

Բազմաթիւ երկիրներէ «Ազդակ»-ի առցանց լսարանին (զոր վարեց թերթի ելեկտրոնային բաժնի աշխատակից Մինաս Հանս Քէհեան) մասնակցեցան 61 անձեր: Բազմաթիւ հարցումներ եւ տեսակէտներ յաջորդեցին տեղեկատուական եւ վերլուծական ընդգծումներ կատարող զեկուցումին:

LEAVE A REPLY

Please enter your comment!
Please enter your name here