«Նախարարաց Խորհուրդին Մէջ Կը Ներկայացնեմ Երիտասարդութեան Ձայնը, Իսկ Լիբանանցի Երիտասարդներուն Կ՛ըսեմ. Լիբանանը Ձեզի Կը Պատկանի» Շեշտեց Նախարար Օհանեան-Գէորգեան

0
96

Երիտասարդութեան եւ մարմնակրթութեան նախարար Վարդինէ Օհանեան-Գէորգեան կիրակի, 2 օգոստոս 2020-ին «Օ. Թի. Վի.» պատկերասփիւռի կայանէն հարցազրոյցի մը ընթացքին անդրադարձաւ «Քորոնա»-ի համաճարակին տարածումը կանխարգիլելու իմաստով երկիրը փակելու կառավարութեան որոշումին, նախարարութեան վերաբերող հարցերուն, ինչպէս նաեւ Լիբանանի մէջ տիրող ներկայ ընդհանուր իրավիճակին:

Նախարար Օհանեան-Գէորգեան մաղթեց, որ բոլոր մարզերը յանձնառու կը մնան ընդհանուր զօրաշարժին ենթարկուելու որոշումին` գիտնալով հանդերձ, որ բոլոր մարզերը փակ պահելով երկրին տնտեսութիւնը եւ քաղաքացիին ապրուստը կը վտանգուին:

«Ճի՛շդ է, որ «Քորոնա»-ի ժահրի տարածման սկզբնական փուլին կառավարութիւնը կրցաւ իր որոշումներով կացութիւնը հակակշռել, եւ կը յուսանք, որ այս փուլին եւս` նոյնքան եւ աւելի պատասխանատուութեամբ պիտի փորձենք ապահովել քաղաքացիներուն առողջութիւնը: Ներկայ փուլը վտանգաւոր է` այն իմաստով, որ մենք կը խօսինք կենաց մահու մասին, հետեւաբար բոլորէն կը խնդրեմ հետեւիլ կառավարութեան որոշումներուն եւ նախանձախնդրութիւն ցուցաբերել ընդհանուր զօրաշարժին հետեւելու, որպէսզի կարենանք ապահովել լիբանանցիներուն բարօրութիւնը», ըսաւ ան:

Նախարար Օհանեան-Գէորգեան յայտնեց, որ ընդհանուր զօրաշարժ յայտարարելու իմաստով կառավարութեան նիստին ընթացքին արձանագրուած են տարբեր կեցուածքներ` աւելցնելով, որ կարելի չէ ատիկա նախարարներուն միջեւ բանավէճ կոչել, «այլ` բնական խորհրդակցութիւն եւ տարբեր կեցուածքներու արտայայտութիւն, որ առողջ է եւ ժողովրդավարական: Կառավարութեան նիստերուն ընթացքին խորհրդակցութիւնը միշտ առկայ է, իսկ խնդրոյ առարկայ նախարարին կարծիքը միշտ յարգելի` նկատի ունենալով, որ կացութիւնը ուղղակի որոշ նախարարութեան կը վերաբերի: Ես անձամբ համաձայն եմ, որ ընդհանուր զօրաշարժ յայտարարուի եւ երկիրը փակուի, որովհետեւ խոցելի փուլի մը մէջ ենք: Պէտք է յստակ ըլլայ բոլորին համար, որ մենք քաղաքացին չենք փափաքիր խեղդել, այլ` կ՛ուզենք լիբանանցիներուն առողջութիւնը պահպանել», յայտնեց ան:

Երիտասարդութեան վերաբերող հարցերուն մասին հարցումի մը պատասխանելով` նախարար Օհանեան-Գէորգեան հաստատեց, որ այսօր լիբանանցի երիտասարդները ունին բազմաթիւ մտահոգութիւններ եւ մտավախութիւններ, որոնք տեղին են: Ան նշեց, որ կառավարութիւնը պէտք է պատասխանէ երիտասարդութիւնը մտահոգող հարցումներուն, իսկ կառավարութիւնը իր որդեգրելիք բարեկարգումներով ճիշդ ուղիին վրայ կը գտնուի` լուծելու համար երկրին հարցերը եւ յոյս ներշնչելու Լիբանանի երիտասարդութեան:

«Պէտք է լաւ ըմբռնել այն իրականութիւնը, որ երիտասարդութեան հարցերը միայն մէկ նախարարութեամբ չեն սահմանափակուիր, որովհետեւ լիբանանցի երիտասարդին կարիքները կը վերաբերին բոլոր նախարարութիւններուն, որոնք իրենց կարգին պէտք է տէր կանգնին լիբանանցի երիտասարդներուն», հաստատեց ան:

Նախարար Օհանեան-Գէորգեան նշեց, որ լիբանանեան պետութիւնը նախորդ երկու տասնամեակներուն ընթացքին երիտասարդութեան եւ մարմնակրթութեան նախարարութեան նկատմամբ ցուցաբերած է «գոհացումի» նախարարութիւն մը ըլլալու մօտեցումը, «մինչդեռ այս նախարարութիւնը «ուժային» նախարարութիւն մըն է, աւելի ճիշդ` կարեւորագոյն նախարարութիւնը: Լիբանանեան պետութիւնը պէտք է իր տեսակէտը փոխէ այս իմաստով, ուշադրութիւն դարձնէ այս նախարարութեան եւ վերացնէ անոր աշխատանքը խոչընդոտող բոլոր արգելքները` սկսելով անոր պիւտճէէն: Նախարարութեան պիւտճէն պետութեան ամավարկին 0.09 առ հարիւրի համեմատութիւնը ունի, այսինքն` անոր նկատմամբ կը ցուցաբերուի այն վարուելակերպը, որ այդ նախարարութիւնը կարծէք գոյութիւն չունի` իրաւասութիւններու, մարդուժի, կարողութիւններու իմաստով: Կը կարծեմ, որ լիբանանցի երիտասարդներուն

պահանջը այս է իրենց պետութենէն, մանաւանդ որ իրենք են Լիբանանի ապագան», ըսաւ նախարար Օհանեան-Գէորգեան:

Նախարարութեան աշխատանքներուն մասին հարցումի մը պատասխանելով` նախարար Օհանեան-Գէորգեան հաստատեց, որ տեղի կ՛ունենայ օրէնսդրական հսկայական աշխատանք, ինչպէս նաեւ կը կատարուի նախարարութեան կանոնագիրի բարեփոխում, նախարարութեան կազմաւորումի արդիականացում, որպէսզի նախարարութիւնը գետնի վրայ աշխատանք կարենայ տանիլ: «Այսօրուան դրութեամբ նախարարութիւնը գետնի վրայ գործելու իրաւասութիւն չունի», ըսաւ ան:

Նախարար Օհանեան-Գէորգեան հաստատեց, որ լիբանանեան պետութիւնը 2012-ին վաւերացուցած է երիտասարդական քաղաքականութիւնը եւ որդեգրած զայն: Այս քաղաքականութեան մէջ ներգրաւուած են շուրջ 12 նախարարութիւններ, ինչպէս` առողջապահութեան, աշխատանքի, տնտեսութեան, ելեւմուտքի նախարարութիւնները:

«Երիտասարդութեան նախարարութիւնը այսօր կը մշակէ երիտասարդական քաղաքականութեան գործադրութեան ծրագիրը` գործակցութեամբ ԵՈՒՆԻՍԵՖ-ի, «Եու. Էն. Էֆ. Փի. Էյ.»-ի եւ լիբանանեան երիտասարդական միութիւններու», աւելցուց ան:

Նախարար Օհանեան-Գէորգեան հաստատեց նաեւ, որ «Քորոնա»-ի համաճարակը իր հետեւանքները կ՛ունենայ մարմնակրթութեան մարզին վրայ: Ան ըսաւ, որ ինչպէս բոլոր մարզերը, մարմնակրթութեան մարզը եւս գործելու չափանիշներ ունի եւ նախազգուշութիւններու ցանկ մը, որ որդեգրուած է բոլորին կողմէ: «Ընդհանուր զօրաշարժը կը վերաբերի բոլորին, հետեւաբար անոր գործադրութիւնը ուղղակիօրէն կապուած է բոլորին յանձնառութեան, որուն չգոյութեան պարագային, դժբախտաբար պիտի ուղղուինք երկիրը ամբողջովին փակելու պարտաւորութեան», շեշտեց ան:

Նախարար Օհանեան-Գէորգեան նշեց, որ 2022-ին Պէյրութը պիտի ըլլայ արաբ երիտասարդութեան մայրաքաղաքը: «Ասիկա մեծ իրադարձութիւն է, որուն կազմակերպումը պէտք է սկսինք այսօրուընէ, եւ այդ իրադարձութիւնը պիտի ըլլայ պետական մակարդակով», յայտնեց ան:

Նախարար Օհանեան-Գէորգեան ընդգծեց, որ կառավարութիւնը պէտք է աւելի արդիւնաբեր աշխատանք տանի` աւելցնելով սակայն, որ կառավարութիւնը կը գիտակցի երկրին դիմագրաւած ներկայ դժուար եւ զգայուն փուլին, եւ այս իմաստով ամէն ջանք ի գործ կը դնէ նուաճումներ իրագործելու: «Արդէն իսկ կատարուած են մեծ թիւով կարեւոր նշանակումներ` յարգելով Լիբանանը բաղկացնող բոլոր շերտերուն ներկայութիւնը, ինչպէս նաեւ հիմնուելով ատակութեան եւ թափանցիկ աշխատանքի չափանիշներուն վրայ: Բարեկարգումներու գործադրութեան առումով, կառավարութիւնը տուած է Կեդրոնական դրամատան հաշիւները քննելու նպատակով իրաւական հաշուեքննութիւն կատարելու որոշումը, որ փտածութեան դէմ պայքարի եւ բարեկարգումներու գործադրութեան մայր մուտքն է», ըսաւ նախարար Օհանեան-Գէորգեան` աւելցնելով, որ իր անձնական առաջարկն էր կառավարութեան նաեւ, որ իրաւական հաշուեքննութիւն բանայ պետական բոլոր հաստատութիւններուն, ինչպէս նաեւ Լիբանանի հանրային կեանքին մէջ ծառայող ոչ կառավարական կազմակերպութիւններուն հաշիւներուն պարագային:

Նախարար Օհանեան-Գէորգեան հաստատեց, որ այս կառավարութիւնը որոշած է իր գործունէութեան առանցքը դարձնել բարեկարգումներն ու երկրին ու քաղաքացիներուն բարօրութեան համար կատարուելիք աշխատանքները` առանց բացարձակապէս զբաղելու քաղաքական տարակարծութիւններով: «Այս շրջագիծին մէջ կ՛ուզեմ հաստատել, որ կառավարութիւնը կամ նախարարները բացթողում չեն արձանագրեր իրենց ստանձնած պատասխանատուութիւններուն մէջ: Հետեւաբար Ընդհանուր ապահովութեան ընդհանուր տնօրէն հազարապետ-զօրավար Ապպաս Իպրահիմի վստահուած պարտականութիւնները այլոց բացը լեցնելու քայլեր չեն, այլ` յստակ պարտականութիւններ, որոնք Լիբանանի պատմութեան ընթացքին միշտ ալ վստահուած են Ընդհանուր ապահովութեան ընդհանուր տնօրէններուն, որոնք հիմնական դերակատարութիւն ունեցած են լուրջ հարցեր լուծելու իմաստով», ընդգծեց ան:

Ան հաստատեց, որ իր անձնական կարծիքով` Լիբանանի դիմագրաւած տնտեսական տագնապը հետեւանք է կուտակուած պարտքերու, որդեգրուած սխալ քաղաքականութեանց եւ ազատական տնտեսութեան:

Նախարար Օհանեան-Գէորգեան կոչ ուղղեց շահագործող ամէնէն փոքր առեւտրականէն մինչեւ ամէնէն մեծ ներածողը հաշուետուութեան ենթարկել:

Ան շեշտեց, որ Լիբանանի քաղաքական կեանքին մէջ կուսակցութիւններու դերակատարութիւնը ամբաստանութիւն պէտք չէ նկատել: «Անշուշտ կառավարութեան մէջ իմ ներկայութիւնս քաղաքացիական ընկերութեան ներկայութիւն է, բայց եւ այնպէս հպարտ եմ, որ լաւ յարաբերութիւններ ունիմ ՀՅԴ-ի եւ հայկական միւս կուսակցութիւններուն հետ», նշեց ան:

Նախարար Օհանեան-Գէորգեան յայտնեց, որ կառավարութեան կազմութեան բանակցութիւններուն ընթացքին լիբանանահայ համայնքը եղած է միակ կողմը, որ հաստատած է, թէ պատրաստ է ստանձնելու որեւէ նախարարութիւն, որովհետեւ անոր հիմնական նպատակը երկիրը անիշխանութենէ փրկելն է:

«Իրապէս ալ հայ համայնքին կողմէ ամէն ջանք ի գործ դրուած է` յաջողցնելու համար կառավարութեան կազմութիւնը: Եւ իբրեւ այդպիսին եւ իբրեւ կառավարութեան կրտսերագոյն անդամը, ես նախարարաց խորհուրդին մէջ կը ներկայացնեմ երիտասարդութեան ձայնը: Գիտենք որքան դժուարութիւններ կը դիմագրաւէք, գիտենք որքան յուսախաբ էք, գիտենք որքան թերահաւատ էք պետութեան եւ իշխանութիւններուն նկատմամբ, բայց Լիբանանը ձեզի կը պատկանի: Դուք պիտի մնաք երկրին մէջ, այս երկիրը ձեզի է: Իսկ քաղաքական բոլոր ուժերուն կ՛ըսեմ, որ կացութիւնը անհանդուրժելի է եւ գործակցութիւնը` անհրաժեշտութիւն», եզրափակեց նախարար Օհանեան-Գէորգեան:

LEAVE A REPLY

Please enter your comment!
Please enter your name here