Հայաստանի Հանրապետութիւնը Երեք Ինքնաթիռով Մարդասիրական Աջակցութիւն Պիտի Տրամադրէ Լիբանանին

0
196

Վարչապետ Նիկոլ Փաշինեանի գլխաւորութեամբ տեղի ունեցաւ հերթական խորհրդակցութիւնը` Հայաստանի կառավարութեան կողմէ Լիբանանի կառավարութեան օժանդակութիւն ցուցաբերելու ուղղութեամբ իրականացուող աշխատանքներուն վերաբերեալ:

«Հաւաքուած ենք քննարկելու Պէյրութի մէջ տեղի ունեցած պայթումէն ետք եւ յատկապէս հայ համայնքին մէջ ստեղծուած իրավիճակին առնչութեամբ մեր հետագայ ընելիքները եւ յստակացնելու, թէ կառավարութեան ու ընդհանրապէս հայաստանեան տարբեր կազմակերպութիւններու գործողութիւնները ինչպէ՞ս պիտի համակարգենք, ի՞նչ տրամաբանութեամբ եւ ի՞նչ խնդիրներ պիտի ձեւակերպենք այս փուլին: Այս պահուն ծրագրուած է երեք ինքնաթիռի թռիչք: Երեքն ալ մարդասիրական աջակցութիւն պիտի ըլլայ` դեղորայք, սնունդ», նշած է վարչապետ Փաշինեան:

Փոխվարչապետ Տիգրան Աւինեան զեկուցած է, որ առաջին թռիչքը պիտի կազմակերպուի շաբաթ օրը երեկոյեան` ժամը 21:00-ին, որուն հիմնական նպատակը պիտի ըլլայ դեղորայքային աջակցութիւն ցուցաբերելը: «Յաջորդ թռիչքը կը նախատեսենք 11 օգոստոսին», նշած է Տիգրան Աւինեան:

Լիբանան պիտի այցելեն Հայաստանի Հանրապետութեան կառավարութեան, Ազգային ժողովի, «Հայաստան» համահայկական հիմնադրամի ներկայացուցիչները, որպէսզի ծանօթանան իրավիճակին, ինչպէս նաեւ Լիբանանի կառավարութեան եւ տեղւոյն հայ համայնքին հետ հանդիպումներու հիմամբ յստակացնեն, թէ այլ ի՛նչ միջոցներու կարիք կայ ինչպէս Լիբանանի կառավարութեան, այնպէս ալ տեղւոյն հայ համայնքին աջակցելու համար:

LEAVE A REPLY

Please enter your comment!
Please enter your name here