Էջմիածինի Մէջ. Պէյրութի Պայթումին Պատճառով Զոհուածներու Յիշատակին Հոգեհանգիստ

0
128

Մայր աթոռ Ս. Էջմիածինի Ս. Տրդատի բաց խորանին մօտ, 9 օգոստոսին, մատուցուած է սուրբ եւ անմահ պատարագ: Պատարագիչը եղած է Մայր աթոռի Թանգարաններու եւ արխիւի տնօրէն Ասողիկ աբղյ. Կարապետեան:

Յաւարտ սուրբ պատարագին, նախագահութեամբ Ամենայն հայոց Գարեգին Բ. կաթողիկոսի, կատարուած է հոգեհանգստեան արարողութիւն` 4 օգոստոսին Լիբանանի մայրաքաղաք Պէյրութի մէջ տեղի ունեցած ուժգին պայթումին պատճառով զոհուածներուն համար:

Մայր աթոռի տեղեկատուական համակարգի էջով հաղորդուած տեղեկութիւններուն համաձայն, սուրբ պատարագին եւ հոգեհանգստեան արարողութեան ներկայ եղած են Հայաստանի մէջ Լիբանանի արտակարգ եւ լիազօր դեսպան Մայա Տաղեր, ՀԲԸՄ-ի Կեդրոնական վարչական ժողովի անդամ, Միջին Արեւելքի եւ Հայաստանի ծրագիրներու պատասխանատու Վազգէն Եագուպեան, ազգային բարերար Գաբրիէլ Չեմպերճեան եւ լիբանանահայեր:

Ներկայ հոգեւոր դասը եւ ժողովուրդը հայոց հայրապետին գլխաւորութեամբ աղօթք բարձրացուցած է առ Աստուած` Պէյրութի պայթումի զոհերու հոգիներու հանգստութեան համար:

Հոգեհանգստեան կարգէն առաջ, Ամենայն հայոց կաթողիկոսը` յիշեալ ողբերգական իրադարձութեան վերաբերեալ իր վշտակցութեան խօսքը ուղղած է ներկաներուն:

LEAVE A REPLY

Please enter your comment!
Please enter your name here