ՀԱՅԱՍՏԱՆԷՆ ԵՒ ԱՐՑԱԽԷՆ ՄԱՐԴԱՍԻՐԱԿԱՆ ՕԺԱՆԴԱԿՈՒԹԻՒՆ

0
117

Կիրակի, 9 Օգոստոս 2020-ին, Լիբանանի միջազգային օդակայան հասաւ Հայաստանի կողմէ Լիբանանի պետութեան տրամադրուղ մարդասիրական օժանդակութեան առնթեր՝ Լիբանանահայութեան համար Արցախի ու Հայասատանի պետութեանց կողմէ ղրկուած մարդասիրական օժանդակութիւն փոխադրող մասնաւոր օդանաւ մը:

Օդակայանէն ներս, օժանդակութիւնը ստանձնեցին Հայաստանի հանրապետութեան դեսպան պրն․ Վահագն Աթաբէկեանին ներկայացուցիչներ՝ դեսպանատան երկրորդ քարտուղար պրն․ Դաւիթ Ալաւէրթեան եւ հիւպատոս Լէոնարտ Ապաճեան: Լիբանանի Հայոց Թեմի Առաջնորդ Գերշ․ Տ․ Շահէ Արք․ Փանոսեանի կողմէ օդակայան կը գտնուէին  Արժն․ Տ․ Յակոբ Աւ․ Քհնյ․ Պզտիկեան, Արժն․ Տ․ Միքայէլ Քհնյ․ Տէմիրճեան, Պրն․ Ռաֆֆի Տէմիրճեան եւ Պրն. Գէորգ Գատէհճեանը։

Մերօրեայ կեանքի արտասովոր պայմաններուն մէջ, ողջ Լիբանանահայութեան անունով բարձրօրէն կը գնահատենք Լիբանանի ժողովուրդին ու Լիբանանի Հայութեան համար համահայկական արժէք ու նշանակութիւն ունեցող Հայաստանի եւ Արցախի ցուցաբերած օգնութիւնն ու զօրակցութիւնը։

Յայտնենք, որ Ազգային Առաջնորդարանը յառաջիկայ օրերուն նշեալ օգնութիւնը եկեղեցիներուն ճամբով պիտի բաժնէ մեր հայրենակիցներուն։

 Դիւան Ազգային Առաջնորդարանի

 

LEAVE A REPLY

Please enter your comment!
Please enter your name here