Կառավարութիւնը Հրաժարեցաւ . Տիապ. «Փտածութեան Համակարգը Աւելի Մեծ Է, Քան` Պետութիւնը»

0
112

Կառավարութեան ճշդած հնգօրեայ հետաքննութեան աւարտէն ետք, երէկ Լիբանան արթնցաւ նախարարներու եւ երեսփոխաններու յաւելեալ հրաժարականներու լուրերով:

Վարչապետ Հասսան Տիապ առաւօտեան հեռաձայնային հաղորդակցութիւն մը ունեցաւ հանրապետութեան նախագահ զօր. Միշել Աունի հետ` փափաք յայտնելով, որ կառավարութեան նիստը նախագահական պալատին փոխարէն գումարուի վարչապետարանին մէջ:

Այս պահանջը ցուցանիշ էր, որ կառավարութիւնը կ՛ուղղուի դէպի հրաժարական:

Երեկոյեան ժամը 7:30-ին Տիապ վարչապետարանէն արտասանեց պատկերասփռուած ճառ մը, որուն մէջ ան հաստատեց, որ փտածութեան համակարգը աւելի մեծ է, քան` պետութիւնը, «իսկ պետութեան ձեռքերը կապկապուած են այդ համակարգով, որուն կարելի չէ դիմադրել, ինչպէս նաեւ կարելի չէ անկէ ձերբազատիլ: Այդ փտածութեան օրինակներէն մէկը պայթեցաւ Պէյրութի նաւահանգիստին մէջ», ըսաւ ան:

Տիապ հաստատեց, որ այս աղէտին տարողութիւնը հսկայական է եւ կարելի չէ նկարագրել, «սակայն ոմանք հետաքրքրուած են միայն քաղաքական կէտեր արձանագրելով եւ ամբոխահաճոյ եւ ընտրական ճառեր արտասանելով», ըսաւ ան:

Տիապ նշեց, որ իր կառավարութիւնը փորձած են պատասխանատու նկատել Լիբանանի նիւթական պարտքին եւ տնտեսական տագնապին` աւելցնելով, որ այս կառավարութիւնը փորձեց ընթացագիծ մը ճշդել` երկիրը իր տագնապներէն դուրս բերելու իմաստով:

«Լիբանանի մէջ կան մարդիկ, որոնք ճշմարտութիւնը խեղաթիւրելով, սադրանքներ նախապատրաստելով եւ ժողովուրդին արեամբ առեւտուր կատարելով կը զբաղին», հաստատեց ան:

Իր խօսքի աւարտին Տիապ կառավարութիւնը հրաժարած յայտարարեց` երեք անգամ կրկնելով «Աստուած փրկէ Լիբանանը» մաղթանքը:

Ապա Տիապ ուղղուեցաւ նախագահական պալատ, ուր ան իր կառավարութեան հրաժարականը ներկայացուց նախագահ Աունի:

Տիապ Պաապտայէն մեկնեցաւ առանց մեկնաբանութիւն կատարելու:

Հանրապետութեան նախագահութեան ընդհանուր տնօրէն Անթուան Շքէյր յայտարարեց, որ նախագահ Աուն շնորհակալութիւն յայտնած է իր հրաժարականը ներկայացուցած վարչապետ Հասսան Տիապին եւ նախարարներուն, եւ անոնցմէ խնդրած, որ ընթացիկ գործերու կառավարութիւն դառնան` մինչեւ նոր կառավարութեան կազմութիւնը:

Նշենք, որ նախքան կառավարութեան հրաժարականի յայտարարութիւնը, երէկ առաւօտեան արդարութեան նախարար Մարի Քլոտ Նաժըմ իր գրաւոր հրաժարականը զետեղեց վարչապետ Տիապի տրամադրութեան տակ:

Նաժըմ հաստատեց, որ ինք հրաժարած է Պէյրութի աղէտին եւ փողոցին մէջ ստեղծուած իրարանցումներուն պատճառով:

Երիտասարդութեան եւ մարմնակրթութեան նախարար Վարդինէ Օհանեան-Գէորգեան կէսօրին յայտնեց, որ կառավարութեան նիստին ընթացքին պիտի պահանջէ կառավարութեան հրաժարականը` Պէյրութի նաւահանգիստի պայթումին պատճառած աղէտին իբրեւ հետեւանք:

Գաղթականներու հարցերու նախարար Ղատա Շրէյմ հաստատեց, որ ինք ամէն ջանք ի գործ կը դնէ, որ կառավարութիւնը հաւաքաբար հրաժարի` աւելցնելով, որ եթէ իր ջանքերը ձախողին, ապա ինք անձամբ պիտի հրաժարի:

Ներքին գործոց եւ քաղաքապետութեանց հարցերու նախարար Մոհամետ Ֆահմի յայտնեց, որ ինք առաջարկած էր կառավարութեան հրաժարականը տալ պայթումէն անմիջապէս ետք` աւելցնելով, որ այդ աղէտէն վեց օր ետք հրաժարիլը ճնշումներու ենթարկուիլ է եւ պատասխանատուութենէ փախուստ տալ:

Կէսօրէ ետք ժամը 3:00-ին կառավարութիւնը սկսաւ գումարել իր նիստը:

Նիստին ելեւմուտքի նախարար Ղազի Ուազնի ներկայացաւ իր գրաւոր հրաժարականով, իսկ հաղորդակցութեան միջոցներու նախարար Թալալ Հաուաթ յայտնեց, որ եթէ նախարարաց խորհուրդը չհրաժարի, ապա ինք անձամբ պիտի հրաժարի կառավարութենէն:

Նշենք, որ Իրաւաբաններու Պէյրութի սենտիքայի նախագահ Մըլհեմ Խալաֆ կէսօրին հրաւիրած էր մամլոյ ասուլիսի մը եւ կոչ ուղղած կառավարութեան հրաժարելու, ինչպէս նաեւ 4 օգոստոսի Պէյրութի նաւահանգիստի պայթումին թղթածրարը անյապաղ  փոխանցելու Արդարութեան գերագոյն խորհուրդին:

Նիստին ընթացքին հրաժարեալ արդարութեան նախարարին առաջարկով 4 օգոստոսի Պէյրութի նաւահանգիստին պայթումը փոխանցուեցաւ Արդարութեան գերագոյն խորհուրդին, իսկ Պէյրութի նաւահանգիստի տնօրինման եւ յանձանձումի վարչութեան ընդհանուր տնօրէն նշանակուեցաւ Պասեմ Քայսին, որ իր նշանակումէն կէս ժամ ետք արդէն իսկ սկսաւ աշխատանքի` Լիբանան հասնող նաւերը ընդունելու եւ անոնց փոխադրած բեռները պարպելու համադրումը կազմակերպելու իմաստով:

Կառավարութիւնը որոշեց նաեւ, որ ուժանիւթի նախարարը մինչեւ 2020 տարուան աւարտը պատասխանատու ըլլայ ծովէն նաւթ գնելու:

Միւս կողմէ, հանրապետութեան նախագահութեան աղբիւրներ յայտնեցին, որ Պէյրութի նաւահանգիստի պայթումին թղթածրարը հանրապետութեան նախագահ զօր. Միշել Աունի պահանջով փոխանցուած է Արդարութեան գերագոյն խորհուրդին:

Ընդհանուր ապահովութեան ընդհանուր տնօրէն հազարապետ-զօրավար Ապպաս Իպրահիմ կէսօրէ ետք ժամը 4:30-ին դարձեալ այցելեց վարչապետարան:

Այդ այցելութենէն շուրջ 40 վայրկեան ետք առողջապահութեան նախարար Համատ Հասան դուրս եկաւ նախարարաց խորհուրդի դահլիճէն եւ ըսաւ. «Կառավարութիւնը հրաժարեցաւ»: Ան աւելցուց, որ ժողովուրդը գիտէ, թէ ո՛վ է նաւահանգիստի պայթումը գործող ոճրագործը:

Երեկոյեան ելեւմուտքի նախարարի պաշտօնակատար Ղազի Ուազնի հաստատեց, որ իրաւական հետաքննութեան որոշումը տրուած է կառավարութեան կողմէ եւ ատիկա պիտի գործադրուի` անկախ կառավարութեան հրաժարելու իրականութենէն:

Իր կարգին, հանրօգուտ շինութեանց եւ փոխադրութեան հարցերու նախարար Միշել Նաժժար յայտնեց, որ նաւահանգիստի պայթումին հետաքննութիւնը տակաւին չէ աւարտած` աւելցնելով, որ ինք Պէյրութի նաւահանգիստին մէջ գոյութիւն ունեցող վտանգաւոր նիւթերուն մասին դէպքէն 24 ժամ առաջ իմացած է:

Կառավարութեան Հրաժարականին
Վերաբերող Կեցուածքներ

Ֆրանսայի արտաքին գործոց նախարարութիւնը հաստատեց, որ Լիբանանի մէջ առաջնահերթութիւնը նոր կառավարութեան կազմութիւնն է:

Նախարարութեան համաձայն, Լիբանան` առանց բարեկարգումներու, պիտի ուղղուի դէպի փլուզում:

Արտաքին գործոց նախարարութիւնը հաստատեց, որ անհրաժեշտ է բարեկարգումներու գործադրութեան իմաստով լիբանանցիներուն պահանջներուն անսալ:

Նախագահ Աուն երէկ հեռաձայնային հաղորդակցութիւն մը ստացաւ Ֆրանսայի նախագահ Էմանուէլ Մաքրոնէն, որուն հետ քննարկեց Լիբանանի օժանդակութեան ելեկտրոնային խորհրդաժողովին արդիւնքները:

Նախագահ Աուն շնորհակալութիւն յայտնեց Մաքրոնին` անոր ջանքերուն համար:

Նախագահներ Աուն եւ Մաքրոն համաձայնեցան միասնաբար շարունակել համագործակցութիւնը:

ՄԱԿ-ի ընդհանուր քարտուղար Անթոնիօ Կութիերես հաստատեց, որ Լիբանան հզօր կամք ունի` աւելցնելով, որ միջազգային հասարակութիւնը Լիբանանը առանձին պիտի չձգէ:

Կութիերես ընդգծեց, որ այս դժուար պայմաններուն ընթացքին միջազգային ընտանիքը առատ օժանդակութիւններ պիտի տրամադրէ Պէյրութին:

Ան միաժամանակ ընդգծեց տնտեսական բարեկարգումներ իրագործելու կարեւորութիւնը:

Ընկերվար յառաջդիմական կուսակցութեան ղեկավար Ուալիտ Ժոմպլաթ յայտնեց, որ կառավարութեան հրաժարականը քաղաքական մեծ յաղթանակ է, իսկ Պէյրութի նաւահանգիստի պայթումի թղթածրարը Արդարութեան գերագոյն խորհուրդին փոխանցելը` հոյակապ քայլ:

Ժողովրդային շարժումի ցուցարարները երէկ երեկոյեան Կեդրոնական Պէյրութի մէջ ուրախութիւն արտայայտեցին կառավարութեան հրաժարականին առիթով եւ կոչ ուղղեցին նաեւ խորհրդարանի հրաժարականին:

Սակայն այս մթնոլորտը եւս վերածուեցաւ զայրոյթի, երբ ցուցարարները սկսան քարկոծել ապահովութեան ուժերը եւ փորձել խորհրդարանի մուտքերէն մէկը բանալ:

Ներքին ապահովութեան ուժերը ցուցարարները փորձեցին ցրուել արցունքաբեր կազերով եւ ապա զանոնք հեռացնել մայրաքաղաքի յատկապէս Պէյրութի քաղաքապետարանի փողոցէն:

Ցուցարարներուն եւ ապահովութեան ուժերուն միջեւ բախումները տեւեցին շուրջ երկու ժամ:

Այն Թինէի Մէջ

Խորհրդարանի նախագահ Նեպիհ Պըրրի երէկ Այն Թինէի մէջ ընդունեց Ժողովրդավարական հանդիպում պլոքի նախագահ, երեսփոխան Թայմուր Ժոմպլաթը, որ կը գլխաւորէր պլոքին մէկ պատուիրակութիւնը:

Հանդիպումէն ետք Թայմուր Ժոմպլաթ պահանջեց Պէյրութի նաւահանգիստի պայթումին գծով միջազգային հետաքննութիւն բանալ` հաստատելով, որ իրենք տեղական հետաքննութեան հանդէպ վստահութիւն չունին:

«Կը պահանջենք մահուան եւ ժողովուրդը սովի մատնելու կառավարութիւնը տապալել, ինչպէս նաեւ կազմել չէզոք կառավարութիւն եւ յառաջաձգել խորհրդարանի պաշտօնավարութեան աւարտի ժամկէտը: Այսօր ոչ մէկ խօսքով կրնանք ամոքել հարազատ կորսնցուցած լիբանանցիներուն ցաւը, չենք կրնար զանոնք մխիթարել, ինչպէս նաեւ չենք կրնար ապահով զգացնել տուն եւ հարազատ կորսնցուցած քաղաքացիները», շեշտեց ան:

Պըրրի համաձայն գտնուեցաւ Թայմուր Ժոմպլաթի հետ, այն իմաստով, որ կառավարութիւնը պատասխանատու է 4 օգոստոսին պատահած նաւահանգիստի պայթումին:

Աւելի ուշ Պըրրի նախագահեց խորհրդարանի դիւանի նիստին, որուն ներկայ գտնուեցան ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի եւ երեսփոխաններ Սամիր Ժսըր, Միշել Մուսա, Ալեն Աուն եւ խորհրդարանի ընդհանուր քարտուղար Ատնան Տահեր:

Նիստէն ետք խորհրդարանի փոխնախագահ Ֆըրզլի յայտնեց, որ խորհրդարանի դիւանը քննարկած է Պէյրութի նաւահանգիստի պայթումին հետեւանքները եւ այդ պայթումին պատճառը, որոնցմէ ամէնէն հիմնականն է անփութութիւնը:

Ֆըրզլի յայտնեց, որ որոշուած է կառավարութիւնը հարցապնդման նիստի հրաւիրել հինգշաբթի օր, «բացի եթէ կառավարութիւնը հրաժարի, ապա խորհրդարանի դիւանը համապատասխան որոշումը կ՛որդեգրէ», հաստատեց ան:

Պատասխանելով լրագրողներու հարցումներուն Ֆըրզլի յայտնեց, որ կանխահաս խորհրդարանական ընտրութիւններու կարելիութիւնը բնաւ չէ քննարկուած:

Յետմիջօրէի ժամը 3:00-ին Պըրրի ընդունեց Ընդհանուր ապահովութեան ընդհանուր տնօրէն հազարապետ-զօրավար Ապպաս Իպրահիմը: Ներկայ գտնուեցան նախկին նախարար Ալի Հասան Խալիլ եւ Ահմետ Պաալպեքի:

Շուրջ մէկ ժամ տեւած հանդիպումէն ետք Իպրահիմ մեկնեցաւ առանց մեկնաբանութիւն կատարելու:

Նշենք, որ երէկ խորհրդարանէն հրաժարեցան երեսփոխաններ Հանրի Հըլու եւ Փոլա Եագուպեան:

Ժոմպլաթ-Հարիրի Հանդիպում

Թայմուր Ժոմպլաթի գլխաւորած պատուիրակութիւնը այցելեց նաեւ նախկին վարչապետ Սաատ Հարիրիի:

Հանդիպումին ներկայ գտնուեցաւ նաեւ նախկին նախարար Ղաթթաս Խուրի:

Հարիրի երէկ հեռաձայնային հաղորդակցութիւն մը ստացաւ Լիբանանի մէջ ՄԱԿ-ի ընդհանուր քարտուղարի անձնական ներկայացուցիչ Իան Քիւպիչէն:

Հանդիպումին ընթացքին քննարկուեցան Պէյրութի նաւահանգիստի պայթումին պատճառած հետեւանքներն ու Լիբանանին օժանդակելու իմաստով ՄԱԿ-ի ի գործ դրած ջանքերը:

Ժահժահի Մօտ

Լիբանանեան ուժեր կուսակցութեան ղեկավար Սամիր Ժահժահ երէկ Մեհրապի մէջ ընդունեց Ժողովրդավարական հանդիպում պլոքի մէկ պատուիրակութիւնը, որ գործուղուած էր Ընկերվար յառաջդիմական կուսակցութեան ղեկավար Ուալիտ Ժոմպլաթի կողմէ:

Պատուիրակութեան մաս կազմեցին երեսփոխաններ Աքրամ Շեհայէպ, Նաամէ Թոհմէ եւ Հատի Ապուլ Հասան:

Հանդիպումէն ետք Ժահժահ յայտնեց, որ կառավարութեան հրաժարականը զիրենք չի հետաքրքրեր` աւելցնելով, որ քանի մը ժամ ետք լուրջ կեցուածքով մը հանդէս պիտի գան:

«Կառավարութեան հրաժարականը եւ նման տեսակի կառավարութեան մը կազմութիւնը ոչ մէկ տարբերութիւն կամ փոփոխութիւն կրնայ յառաջացնել: Մենք պէտք է հարցը իր արմատէն լուծենք, այլ խօսքով` խորհրդարանէն», շեշտեց Ժահժահ:

Որոնողական Աշխատանքներն Ու
Հետաքննութիւնը Կը Շարունակուին

Պէյրութի նաւահանգիստի պայթումին պատճառած զոհերուն թիւը հասաւ 160-ի, վիրաւորներունը մնաց շուրջ 6000, եւ տակաւին կան 20 անյայտ կորսուածներ:

Լիբանանի մէջ Ֆրանսայի դեսպան Պրունօ Ֆուշէ երէկ այցելեց աղէտի գօտիի վերածուած Պէյրութի նաւահանգիստը, ուր ստուգեց քրէական փաստահաւաքներու ոստիկանութեան ֆրանսական խմբաւորումին աշխատանքները` ներկայութեամբ ընդհանուր դատախազ Ղասսան Օուէյտաթի:

Միւս կողմէ, Օուէյտաթ երէկ յանձնարարեց, որ Զուքի ելեկտրակայանին մէջ գտնուող վտանգաւոր նիւթերը փոխադրուին բացօթեայ վայրեր եւ հոն փճացուին` առանց որեւէ մէկուն վնաս պատճառելու:

Վերադատ ատեանի աւագ քննիչ դատախազ Ղասսան Խուրի երէկ սկսաւ հարցաքննութիւններ կատարել Պէյրութի նաւահանգիստի պայթումի թղթածրարին շրջագիծին մէջ:

Խուրի երէկ հարցաքննեց Պետական անվտանգութեան ընդհանուր տնօրէն հազարապետ-զօրավար Թոնի Սալիպան:

Ժամեր տեւած հարցաքննութենէն ետք դատախազ Խուրի որոշեց ազատ ձգել Թոնի Սալիպան` զայն աւելի ուշ դարձեալ հարցաքննելու պայմանով:

Գետնի վրայ որոնողական աշխատանքը շարունակուեցաւ նաեւ երէկ: Յետմիջօրէին լիբանանեան բանակի հրամանատարութիւնը հրապարակեց հաղորդագրութիւն մը, որ կը նշէ, թէ որոնողական աշխատանքներուն շնորհիւ կարելի եղած է պայթումի վայրէն 5 այլ դիակներ գտնել:

Հաղորդագրութեան մէջ ընդգծուեցաւ, որ որոնողական աշխատանքը պիտի շարունակուի:

Պէյրութի նահանգապետ, դատախազ Մարուան Ապպուտ Պէյրութի քաղաքապետարանի ոստիկանութեան պարտականութիւն տուաւ իրենց բնակիչներէն պարպել այն շէնքերը, որոնք փուլ գալու ենթակայ են:

Միւս կողմէ, լիբանանեան բանակի հրամանատար զօր. Ժոզեֆ Աուն երէկ բանակի գաղտնի սպասարկութեան տնօրէնութեան, ինչպէս նաեւ սպայակոյտի քարտուղարութեան յղեց նամակ մը, որուն մէջ արգիլեց հանգստեան կոչուած գնդապետ-զօրավար Ժորժ Նատերի եւ անոր ընտանիքի անդամներուն մուտքը լիբանանեան բանակի զօրանոցները:

LEAVE A REPLY

Please enter your comment!
Please enter your name here