ՇԱՀԷ ԱՐՔ․ ՓԱՆՈՍԵԱՆ ԼԻԲԱՆԱՆԱՀԱՅ ԸՆԿԵՐԱՅԻՆ ԾԱՌԱՅՈՂՆԵՐՈՒՆ ՀԵՏ ՔՆՆԱՐԿԵՑ ԳՈՐԾԱԿՑՈՒԹԵԱՆ ԿԱՐԵԼԻՈՒԹԻՒՆՆԵՐԸ

0
126

Լիբանանի Հայոց Թեմի Առաջնորդ Գերշ․ Տ․ Շահէ Արք․ Փանոսեանին հրաւէրով,  Երկուշաբթի, 10 Օգոստոս 2020-ին, երեկոյեան ժամը 6։00-ին, Ազգային Առաջնորդարանի «Երջօ Սամուէլեան-Եռագոյն» սրահին մէջ տեղի ունեցաւ Լիբանանի հայ համայնքի ընկերային ծառայողներու միութեան անդամներու հետ հանդիպում։

Հաւաքին բարի գալուստի խօսքը արտասանեց Քրիսթին Սարգիսեան, որ շեշտեց, թէ Պէյրութի նաւահանգիստին պայթումը առաւել եւս դժուարութիւնները բարդացուց, սակայն Լիբանանահա-յութիւնը այսօր ալ պիտի վերականգնի եւ յաղթահարէ տագնապները։

Ապա խօսք առաւ նորահաստատ «Լիբանանահայութեան Վերականգնումի Մարմին»-ի ատենապետ Գառնիկ Մկրտիչեան, որ նշեց, թէ այսօր Լիբանանի համայնքը իր ամբողջ կարողականութիւնը զօրաշարժի ենթարկելու հրամայականին դէմ յանդիման կը գտնուի։ Ան աւելցուց, որ Մարմինը Ն․Ս․Օ․Տ․Տ․ Արամ Ա․ Վեհափառ Հայրապետի ճշդած առաջնահերթութեանց կարգով, այս հանգրուանին նախապատուութիւն պիտի տայ բնակարաններու եւ համայնքային վնասները արժեւորելու եւ նորոգութիւններ իրականացնելու աշխատանքներուն։ Զուգահեռաբար, ուշադրութեան պիտի արժանանան նաեւ մեր ժողովուրդի զաւակներուն մօտ յայտնւած առողջապահական կարիքները ու կրթական ոլորտը: Այս առիթով, Գառնիկ Մկրտիչեան յայտնեց, որ մարմինը այսօր գումարելով իր անդրանիկ նիստը, անմիջապէս անցած է աշխատանքի, եւ արդէն իսկ յառաջիկայ ժամերուն պիտի ունենայ իր գրասենեակը եւ հարկ եղած կապի միջոցները։

Այնուհետեւ, ներկաները քննարկեցին այս կացութիւններուն մէջ ընկերային ծառայողներու դերակատարութիւնը եւ աշխատանքներու մասնակցութեան կարելի միջոցները։ Հանդիպումը նաեւ առիթ հանդիսացաւ ծանօթանալու ծառայողական հաստատութիւններու գործունէութեանց։

Աւարտին, Գերշ․ Տ․ Շահէ Արք․ Փանոսեան ըսաւ, որ Պէյրութի պայթումը մեր իրականութեան մէջ ստեղծեց նոր կացութիւն եւ տագնապներուն վրայ աւելցուց յաւելեալ խնդիրներ, զորս դիմագրաւելու համար կարիքը ունինք մեր ընկերային ծառայողներու աջակցութեան։ Առաջնորդ Սրբազանը շեշտեց, որ Տէր եւ Տիկին Ալեքքօ եւ Անի Պէզիքեանի 3000 ընտանիքներու ուտեստեղէնի կտրօններու ցրւումի նախապատրաստական աշխատանքները իրենց աւարտին հասած են եւ գալիք օրերուն շրջան առ շրջան ընթացք կ՛առնէ կտրօններու ցրւումը։ Շահէ Արք․ Փանոսեան ըսաւ, որ Լիբանանահայութեան վերականգնումը հիմնահարց  է ողջ հայութեան համար, որուն իրականացման ի խնդիր, պարտինք ըլլալ կազմակերպ եւ ծառայողական ոգիով ու միացեալ կամքով  լծուինլ աշխատանքի, որպէսզի յաղաթահարենք մեր ժողովուրդին դիմաց գտնուող անհամեմատօրէն բարդ ու դժուարին խնդիրները։

 Դիւան Ազգային Առաջնորդարանի

 

LEAVE A REPLY

Please enter your comment!
Please enter your name here