«Յուլիսեան Յաղթական Մարտերն Ապացուցեցին, Որ Ղարաբաղի Հարցը Չունի Ռազմական Լուծում»․ Փաշինեան

0
51

ԵՐԵՒԱՆ, «Սիվիլնէթ».- Վարչապետ Նիկոլ Փաշինեանի գլխաւորութեամբ Երեւանի մէջ տեղի ունեցաւ Անվտանգութեան խորհուրդի հերթական նիստը:

Այս առիթով արտասանած իր խօսքին մէջ Նիկոլ Փաշինեան դիտել տուաւ, որ Հայաստանի Անվտանգութեան խորհուրդի հերթական նախորդ նիստին որդեգրուած Ազգային անվտանգութեան նոր ռազմավարութեան արդիականութիւնը եւ կենսունակութիւնը փաստուեցաւ կարճ ժամանակ անց: Արձանագրուեցաւ, որ խորհուրդը ճիշդ գնահատած էր երկրի անվտանգութեան սպառնալիքները։

«Մեր նախորդ նիստից յետոյ տեղի ունեցան տաւուշեան յայտնի դէպքերը` Տաւուշի յաղթական մարտերը, եւ պէտք է արձանագրել հետեւեալը. նախորդ ողջ շրջանում Ադրբեջանն ընդունել էր մի այնպիսի կեցուածք, որով Ղարաբաղի հարցի ռազմական ճանապարհով չլուծումը, իր կողմից դա չնախաձեռնելը ներկայացնում էր որպէս զիջում ե՛ւ Հայաստանի, ե՛ւ միջազգային հանրութեան համար: Եւ մենք այս ողջ ընթացքում Ադրբեջանի ղեկավարութեանը յորդորում էինք, որ պէտք չէ Հայաստանի հետ խօսել ուժի դիրքերից, ուժի լեզուով, եւ դա անհեռանկար հռետորաբանութիւն է: Եւ, ըստ էութեան, յուլիսեան յաղթական մարտերն ապացուցեցին դա եւ ապացուցեցին, որ Ղարաբաղի հարցը չունի ռազմական լուծում: Կարծում եմ` ժամանակն է, որ Ադրբեջանի իշխանութիւնը սա ընդունի, որովհետեւ նախկինում բազմիցս ասել եմ, որ եթէ Ղարաբաղի հարցն ունի ռազմական լուծում, ուրեմն Արցախի ժողովուրդը կարող է արձանագրել, որ ինքը վաղուց այդ հարցը լուծել, աւարտել է:

«Շատ կարեւոր է արձանագրել, որ Հայաստանի դիրքորոշումը Ղարաբաղի հարցում ինչպէս եղել, այնպէս էլ շարունակում է մնալ կառուցողական, եւ մեր դիրքորոշումն է, որ, այո՛, Արցախի հարցը պէտք է կարգաւորուի խաղաղ բանակցային ճանապարհով, եւ Հայաստանի Հանրապետութեան դիրքորոշումը, ըստ էութեան, միշտ էլ եղել է սա, ընդ որում` անկախ կառավարութիւնների եւ իշխանութիւնների քաղաքական ծագումնաբանութիւնից», յայտնեց վարչապետը։

Ըստ Փաշինեանի՝ յաջորդ գործօնը, որ արձանագրուած է Ազգային անվտանգութեան ռազմավարութեան մէջ եւ շատ արագ դրսեւորում ստացաւ, Թուրքիոյ ապակառուցողական քաղաքականութիւնն է մեր տարածաշրջանին եւ ընդհանրապէս աշխարհին մէջ: «Կարծում եմ, որ Թուրքիայի ապակայունացնող եւ ապակառուցողական գործունէութիւնն էական անհանգստութիւններ եւ մտահոգութիւններ է առաջացնում ինչպէս Մերձաւոր Արեւելքի, այնպէս էլ Եւրասիական տարածաշրջանի, այնպէս էլ Եւրոպական տարածաշրջանի մեր գործընկերների մօտ: Սա մի օրակարգ է, որն արդէն իսկ ձեւաւորուած է, եւ այդ օրակարգում մեր անելիքները նոյնպէս կարեւորագոյն քննարկման առարկայ պիտի դառնան Անվտանգութեան խորհրդում, կառավարութիւնում, Արտաքին գործերի նախարարութիւնում, եւ սրա հետ կապուած հարցեր նոյնպէս մենք կը քննարկենք այսօրուայ նիստում», յայտնեց վարչապետը:

Նիկոլ Փաշինեան կարեւոր նկատեց արձանագրել այն, որ Հայաստանի Հանրապետութիւնը ի վիճակի է սպասարկել անվտանգային իր մարտահրաւէրները: «Միեւնոյն ժամանակ, մենք պիտի խնդիր դնենք մեր առաջ` անվտանգային միջավայրի կառավարելիութեան մակարդակն ամէն շաբաթուայ, ամէն ամսուայ, ամէն տարուայ հետ աւելի բարձրացնելու ուղղութեամբ: Եւ Անվտանգութեան խորհուրդը հէնց այն աշխատանքային ձեւաչափն է, որտեղ այս կարգի հարցերը պէտք է քննարկուեն եւ լուծումներ ստանան», եզրափակեց Փաշինեան:

LEAVE A REPLY

Please enter your comment!
Please enter your name here