Նախարար Տօնոյեան Հանդիպում Ունեցած Է Ռուսիոյ Պաշտպանութեան Նախարար Սերկէյ Շոյկուի Հետ

0
59

23 օգոստոսին Մոսկուայի մէջ Հայաստանի Հանրապետութեան պաշտպանութեան նախարար Դաւիթ Տօնոյեան հանդիպում ունեցած է Ռուսիոյ պաշտպանութեան նախարար, բանակի հրամանատար Սերկէյ Շոյկուի հետ: Այս մասին «Երկիր»-ին կը յայտնեն Հայաստանի պաշտպանութեան նախարարութեան տեղեկատուութեան եւ հասարակութեան հետ կապերու վարչութենէն:

Հանդիպումի ընթացքին քննարկուած են շրջանային անվտանգութեան իրավիճակին եւ երկկողմանի ռազմական համագործակցութեան վերաբերող հարցեր:

Հայաստանի պաշտպանութեան նախարարը իր գործընկերոջ տեղեկացուցած է յուլիսեան մարտական գործողութիւններէն ետք շրջանին մէջ ստեղծուած ռազմաքաղաքական իրադրութեան, ինչպէս նաեւ հայ-ազրպէյճանական պետական սահմանին եւ արցախեան-ազրպէյճանական ուժերու շփման գիծին մէջ տիրող իրավիճակին մասին:

Դաւիթ Տօնոյեան ընդգծած է, որ որոշ պետութիւններու յարձակողապաշտ հռետորաբանութիւնը եւ իրականացուող ռազմական բնոյթի քայլերը միտուած են շրջանային իրավիճակի ապակայունացման ու ռազմականացման:

Իր կարգին, Ռուսիոյ պաշտպանութեան նախարարը կարեւոր նկատած է կայունութեան ամրապնդման ուղղուած քայլերու իրականացումը բոլոր պետութիւններուն կողմէ:

Ընդգծելով հայ-ռուսական յարաբերութիւններու ռազմավարական դաշնակցային բնոյթը` նախարարները քննարկած եւ պայմանաւորուածութիւններ ձեռք բերած են ռազմական համագործակցութեան ուղղութեամբ յառաջիկայ ընելիքներուն շուրջ:

Միւս կողմէ, 23 օգոստոսին Ռուսիոյ մերձմոսկովեան «Փաթրիոթ» աւանին մէջ տեղի ունեցած է միջազգային բանակային 6-րդ խաղերու եւ «Բանակ-2020» ցուցահանդէսի բացման հանդիսաւոր արարողութիւնը, որուն ներկայ էր Հայաստանի պաշտպանութեան նախարար Դաւիթ Տօնոյեանը եւ Հայաստանի զինուած ուժերու ընդհանուր հրամանատարի տեղակալ Ստեփան Գալստեանը: Այս մասին Դիմատետրի իր էջին գրած է Հայաստանի պաշտպանութեան նախարարի մամլոյ բանբեր Շուշան Ստեփանեան:

Նախարար Տօնոյեան բացման արարողութենէն անմիջապէս ետք զրուցած է բանակային խաղերու հայ մասնակիցներուն եւ հրամանատարներուն հետ ու մաղթած յաջողութիւն մրցումներուն:

LEAVE A REPLY

Please enter your comment!
Please enter your name here