Նոր Կառավարութիւն Մը Կազմելու Պըրրիի Ջանքերը Կանգ Առին

0
52

Նոր կառավարութիւն մը կազմելու իմաստով խորհրդարանի նախագահ Նեպիհ Պըրրիի ջանքերը երէկ կանգ առին, երբ ան պաշտօնապէս յայտարարեց հետեւեալը. «Նոր կառավարութիւն մը կազմելու իմաստով ճիգ չխնայեցի, սակայն ի յայտ եկաւ, որ մէկ ձեռքով կարելի չէ ծափել: Հետեւաբար կը սպասեմ տեսնելու, թէ ուրիշներ ի՛նչ պիտի ընեն այս հարցով»:

Միւս կողմէ, շաբաթավերջին Պըրրի Այն Թինէի մէջ ընդունեց Հզօր Լիբանան համախմբումի մէկ պատուիրակութիւնը, որուն մաս կազմեցին Հայկական երեսփոխանական պլոքի անդամներ Յակոբ Թերզեան եւ Ալեքսանտր Մաթոսեան, ինչպէս նաեւ երեսփոխաններ Նիքոլա Սահնաուի, Անթուան Փանօ, Էտկար Թրապուլսի, Սեզար Ապի Խալիլ եւ Հիքմաթ Տիպ:

Հանդիպումէն ետք Սահնաուի յայտնեց, որ իրենք Պըրրիէն պահանջած են խորհրդարանի արտակարգ նիստ մը գումարել` վաւերացնելու համար այն օրինագիծերը, որոնք ուղղակիօրէն կապուած են Պէյրութի նաւահանգիստի աղէտին:

«Նշեալ օրինագիծերը կարեւոր են` նկատի ունենալով, որ անոնք կը վերաբերին վերաշինութեան եւ վերակառուցման, օժանդակութիւններու բաշխումին, շտապ օգնութեան, աղէտէն տուժածներու հատուցման եւ այլ: Այս օրինագիծերուն մասին պիտի յայտարարենք երկուշաբթի առաւօտեան, խորհրդարանին մէջ հրաւիրուելիք մամլոյ ասուլիսի մը ընթացքին», ըսաւ Սահնաուի:

Ան շեշտեց, որ Պըրրի ընդառաջած է այս պահանջին եւ զօրակցութիւն յայտնած այս նախաձեռնութեան, որպէսզի կարելի եղածին չափ արագ եւ գործնական ըլլան Պէյրութի ժողովուրդին մատուցուելիք օժանդակութիւնները:

Պատասխանելով կառավարութեան կազմութեան գծով Պըրրիի հետ քննարկում կատարելու մասին հարցումի մը` Սահնաուի յայտնեց, որ նման քննարկում չէ կատարուած:

Պըրրիի այցելեց նաեւ Ժողովրդավարական հանդիպում պլոքի երեսփոխան Ուաէլ Պու Ֆաուր, որ հանդիպումէն ետք մեկնեցաւ մերժելով մեկնաբանութիւն կատարել:

LEAVE A REPLY

Please enter your comment!
Please enter your name here