Լիբանանի Մէջ «Քորոնա» Ժահրով Վարակուածներուն Թիւը Հասաւ 13.155-ի, Մահուան Պարագաներունը` 126-ի, Իսկ Ապաքինածներունը` 3684-ի

0
33

Առողջապահութեան նախարարութեան տեղեկութիւններուն համաձայն, երէկ Լիբանանի մէջ «Քորոնա» ժահրով վարակուածներուն թիւը հասաւ 13.155-ի` վերջին 24 ժամուան ընթացքին արձանագրելով 457 նոր վարակուածներ, որոնցմէ 447-ը` տեղացիներ, իսկ 10-ն` Լիբանան վերադարձած քաղաքայիններ:

Նախարարութիւնը յայտնեց, որ ցարդ «Քորոնա» ժահրով վարակուած 126 պարագաներ մահացած են, իսկ 3684 ուրիշներ` ապաքինած:

Միւս կողմէ, Պէյրութի առեւտրականներու միութեան նախագահ Նիքոլա Շամմաս յայտնեց, որ վաճառատուները կը փափաքին վաղուընէ սկսեալ իրենց դռները բանալ:

Ան պետութենէն պահանջեց վերջ տալ վաճառատուները փակ պահելու եւ այդ միջոցառումին հակառակողը հաշուետուութեան կանչելու իր որոշումին:

Շամմաս ընդգծեց, որ պետութիւնը լիբանանցիներուն տրամադրելիք եկամուտի այլընտրանք մը չունի` աւելցնելով նաեւ, որ մարդոց գումարները դրամատուներուն մէջ պահելու կողքին անկարելի է ընդունիլ վաճառատուները փակ պահելու այս որոշումը:

«Վաճառատուներու սեփականատէրերուն մօտ համախոհութիւն գոյութիւն ունի այս իմաստով: Անոնք կը փափաքին իրենց վաճառատուները ամէնօրեայ դրութեամբ նուազագոյնը 6 ժամ բաց պահել», ըսաւ Շամմաս:

LEAVE A REPLY

Please enter your comment!
Please enter your name here