«Կը Զօրակցինք Բնակուած Թաղերուն Մէջ Թաքցուած Զէնքերու Պահեստանոցները Ներխուժելու Ռայի Պատրիարքին Կոչին» Հաստատեց Քումաթի

0
25

Հըզպալլայի քաղաքական գործադիր խորհուրդի անդամ Մահմուտ Քումաթի երէկ յայտնեց, որ 4 օգոստոսին Պէյրութի նաւահանգիստը հարուածած հսկայական պայթումն ու անոր հետեւանքները շատ ցաւալի են:

«Պատահածը աղէտ է եւ սպանդ, եւ կը ցաւինք, որ Լիբանանը եւ լիբանանցին թիրախ դարձուցած այս պայթումը քաղաքական շահագործումի ենթակայ կը դառնայ: Այս իմաստով Հըզպալլայի դէմ ամբաստանութիւնը իրականութենէն բաւական հեռու է, մանաւանդ որ Հըզպալլա կտրականապէս ժխտած է այդ պայթումին հետ որեւէ կապի գոյութիւնը: Հըզպալլա նաւահանգիստին մէջ ներկայութիւն չէ», ըսաւ ան:

Պէյրութի նաւահանգիստի պայթումին հարցով Քումաթի կոչ ուղղեց թափանցիկ հետաքննութեան, դատավարութեան եւ պատժական արդար տնօրինումի:

Քումաթի շեշտեց, որ Հըզպալլայի զէնքերն ու սպառազինութիւնը նաւահանգիստին եւ օդակայանին մէջ չեն եւ այդ վայրերուն մէջ գործ չունին:

«Այս շրջագիծին մէջ կը զօրակցինք մարոնի համայնքի Պշարա Ռայի պատրիարքին պահանջին, որ լիբանանեան պետութիւնը պէտք է ներխուժէ բնակուած թաղերուն մէջ թաքցուած զէնքերու պահեստանոցները: Կը զօրակցինք ամէն քայլի, որ կը պաշտպանէ քաղաքացիները եւ զանոնք վտանգներէ հեռու կը պահէ ու ապահով կը զգացնէ», հաստատեց Քումաթի:

LEAVE A REPLY

Please enter your comment!
Please enter your name here