Պէյրութի Նաւահանգիստի Պայթումին Հետաքննութիւնը Կատարող Լիբանանցի Եւ Ֆրանսացի Բանակայիններուն Պիտի Միանան Նաեւ Իտալացիները

0
43
FILE - In this Aug. 6, 2020 file photo, French President Emmanuel Macron, second left, meets with Lebanese President Michel Aoun, second right, Lebanese Prime Minister Hassan Diab, right, and Lebanese Parliament Speaker Nabih Berri, left, at the presidential palace, in Baabda east of Beirut. Beirut's massive explosion fueled widespread anger at Lebanon's ruling elite, whose corruption and negligence many blame for the disaster. Yet, three weeks later, the change many hoped for is nowhere in sight. The same politicians are negotiating among themselves over a new government. (AP Photo/Thibault Camus, Pool, File)

Մինչ նոր վարչապետի նշանակման հոլովոյթը կը գտնուի սպասման վիճակի մէջ, Էլիզէի պալատը կը հաստատէ, որ Ֆրանսայի նախագահ Էմանուէլ Մաքրոն երեքշաբթի, 1 սեպտեմբեր 2020-ին պիտի այցելէ Լիբանան:

Միւս կողմէ, օտար պետութիւններու կողմէ Լիբանանին ցուցաբերուած զօրակցութեան շրջագիծին մէջ, երէկ երեկոյեան Լիբանան այցելեց Քանատայի արտաքին գործոց նախարար Ֆրանսուա Ֆիլիփ Շեմփէյնը:

Պէյրութի միջազգային օդակայանին մէջ Շեմփէյն դիմաւորուեցաւ արտաքին գործոց նախարարի պաշտօնակատար Շարպել Ուեհպէի եւ Լիբանանի մէջ քանատական դեսպանատան գործակատար Կրեկ Քալիքանի կողմէ:

Պէյրութի միջազգային օդակայանին մէջ Շեմփէյն ցաւ յայտնեց Ուեհպէին` Պէյրութի նաւահանգիստի պայթումին պատճառած աղէտին առումով եւ Քանատայի պետութեան ու ժողովուրդին զօրակցութիւնը յայտնեց Լիբանանին եւ լիբանանցիներուն:

Հանրապետութեան նախագահ զօր. Միշել Աուն երէկ առաւօտեան Պաապտայի մէջ ընդունեց Շտապ օգնութեան գերագոյն խորհուրդի պետ Մոհամետ Խէյրը, որմէ խնդրեց արագացնել պայթումին պատճառած վնասներու գնահատման աշխատանքը, յատկապէս` բնակուած թաղամասերուն պարագային, որպէսզի կարելի ըլլայ անմիջապէս օժանդակել ժողովուրդին:

Պէյրութի նաւահանգիստի պայթումին շուրջ բացուած հետաքննութեան ծիրին մէջ, Արդարութեան գերագոյն խորհուրդի նաւահանգիստի պայթումի հետաքննութեան պատասխանատու դատաւոր Ֆատի Սուուան երէկ հարցաքննեց Պէյրութի նաւահանգիստի չորս պաշտօնեաներ, որոնք են` Սամեր Ռաատ` նաւահանգիստի գործառնութիւններու տնօրէն, Մոհամետ Զիատ Աուֆ` նաւահանգիստի ապահովութեան պետ, Էլիաս Շահին եւ Խալետ Խաթիպ` Մաքսատան աւագ աժիւտաններ:

Դատաւոր Սուուան անոնց դէմ բերման գիրեր հրապարակեց: Պէյրութի նաւահանգիստի պայթումին հարցով ցարդ 16 ամբաստանեալներ կան, իսկ երեք ուրիշներ պիտի հարցաքննուին վաղը` ուրբաթ, 28 օգոստոսին:

Հետաքննութեան կողքին լիբանանեան եւ ֆրանսական բանակայիններ, որոնք կը հետեւին նաւահանգիստի հետաքննութիւններուն, երէկ յայտնեցին, որ յառաջիկայ շաբթուան ընթացքին Լիբանան պիտի հասնի իտալական ջոկատ մը, որ պիտի օժանդակէ հետաքննութեան` նաւահանգիստին հանդիպակաց կողմէն:

Քաղաքացիական պաշտպանութեան ուժերը իրենց կարգին հաստատեցին, որ պայթումին 23-րդ օրն ըլլալով իրենք տիւ ու գիշեր կը շարունակեն փրկարար եւ որոնողական աշխատանքները, որպէսզի կարենան գտնել բոլոր անյայտ կորսուածները:

Նշենք, որ մարոնի համայնքի Պշարա Ռայի պատրիարքը երէկ այցելեց Պէյրութի աղէտի գօտիի շրջանը` ծանօթանալով պայթումին գործած հսկայական աւերներուն:

Ռայի պատրիարքը այցելեց Ժմմէյզէի Մար Մարուն եկեղեցին, Ֆրերներու դպրոցը, Ուարտիէ հիւանդանոցը, Ֆրանչիսկեան միաբանութեան վանքը, Մար Մխայել փողոցը, Մար Մխայելի եկեղեցին եւ Պէյրութի հրշէջներու կեդրոնը:

Ան ընդգծեց, որ լիբանանցի պատասխանատուները Պէյրութի նաւահանգիստի պայթումին հանդէպ չեն կրնար վերաբերիլ իբրեւ փոքր միջադէպ մը:

Ռայի պատրիարքը հաստատեց, որ Լիբանան կարիքը ունի շտապի կառավարութեան` աւելցնելով, որ իրենք կը վստահին Լիբանանի դատական իշխանութիւններուն, «սակայն անոնց կողմէ արձանագրուելիք անկարողութեան եւ բացթողումներուն պարագային, պիտի ուղղուինք միջազգային դատարանին», շեշտեց ան:

LEAVE A REPLY

Please enter your comment!
Please enter your name here