«Բնաւ Չեմ Զղջար Հանրապետութեան Նախագահ Ըլլալուս Եւ Օր Մը Օրանց Պատասխանատուութենէ Չեմ Խուսափած, Այլ Մինչեւ Վերջ Յանձնառու Եղած Եմ Անոր». Նախագահ Աուն

0
67

Հանրապետութեան նախագահ զօր. Միշել Աուն ֆրանսական «Փարի Մաչ» թերթին հետ ունեցած իր հարցազրոյցին ընթացքին յայտնեց, որ ինք բնաւ չի զղջար հանրապետութեան նախագահ ըլլալուն համար:

«Ոմանք կը փափաքէին, որ երկրին դիմագրաւած այս դժուար եւ զգայուն փուլին հանրապետութեան նախագահ չըլլայի, իսկ ուրիշներ կը հաստատեն, որ այս փուլին ընթացքին իբրեւ նախագահ իմ ներկայութիւնս Լիբանանին համար աւելի նպաստաւոր է, որովհետեւ անոնք վստահութիւն ունին իմ եւ հայրենիքը փրկելու իմ վճռակամութեանս վրայ: Օր մը օրանց պատասխանատուութենէ չեմ խուսափած, այլ` մինչեւ վերջ յանձնառու եղած եմ անոր», ըսաւ նախագահ Աուն:

Փտածութեան դէմ պայքարին մասին հարցումի մը պատասխանելով` նախագահ Աուն հաստատեց, որ այդ պայքարը կ՛ըլլայ օրէնքներու գործադրութեամբ, «եւ իբրեւ սկզբնաքայլ որոշուեցաւ Կեդրոնական դրամական հաշիւները ենթարկել իրաւական հաշուեքննութեան: Նման հաշուեքննութիւն պիտի գործադրուի նաեւ պետական այլ հաստատութիւններու մէջ: Ոսկեայ տարազը հաշուեքննութիւնն է, պատասխանատուութիւններու ճշդումն ու պատժական տնօրինումը», ըսաւ ան:

Նախագահ Աուն ընդգծեց, որ ինք կ՛ընդունի, թէ կան որոշ դժուարութիւններ` բարեկարգումներու գործադրութեան առումով, «որովհետեւ կարգ մը քաղաքական ղեկավարութիւններուն մօտ կայ մտայնութիւն մը, որ բարեկարգելու աշխատանքս կը բարդացնէ: Բայց եւ այնպէս պիտի շարունակեմ պայքարիլ` իրականացնելու համար բարեկարգումները եւ վերացնելու համար անոր դիմաց ծառացող բոլոր խոչընդոտները», աւելցուց նախագահ Աուն:

Ան շեշտեց, որ իր ընտանիքի անդամներէն ոչ ոք փտածութեան մեղսակից է, «իսկ եթէ կայ նման պարագայ, ապա զայն հետաքննութեան կը փոխանցեմ», շեշտեց ան:

Պէյրութի նաւահանգիստի պայթումի հետաքննութեան մասին նախագահ Աուն շեշտեց, որ ինք նախանձախնդիր կը մնայ հաշուեքննութեան ենթարկելու այն բոլորը, որոնց բացթողումներուն իբրեւ հետեւանք այդ պայթումը պատահած է: «Երբ բոլորը կ՛ըսեմ, ոչ մէկ բացառութիւն ի մտի ունիմ, ինչքան ալ բարձր ըլլան յանցագործներուն պաշտօնները», հաստատեց նախագահ Աուն:

Ան ընդգծեց, որ ինք ամէն ջանք ի գործ կը դնէ, որ տուժողներու ընտանիքներուն հատուցումները, ինչպէս նաեւ հետաքննութեան արդիւնքները ամէնէն արագ ժամանակամիջոցին կատարուին:

«Կարեւորը այն է, որ գիտնանք ամոնիոմ նայթրէյթը ինչպէ՞ս հասած է Պէյրութի նաւահանգիստ եւ ինչո՞ւ 2013-էն ի վեր հոն մնացած է», նշեց նախագահ Աուն:

LEAVE A REPLY

Please enter your comment!
Please enter your name here