Հանրախանութներուն Եւ Դեղարաններուն Մէջ Խուճապի Մթնոլորտ Սկսած Է

0
57
Anti-government protesters chant slogans inside the Lebanese foreign ministry in Beirut, Lebanon, Saturday, Aug. 8, 2020. A group of protesters, including retired army officers, in Lebanon stormed the building of the foreign ministry during angry rallies in the capital following the destructive Beirut blast earlier this week. (AP Photo/Bilal Hussein)

Կեդրոնական դրամատան կառավարիչ Ռիատ Սալամէ երկու օր առաջ «Ռոյթըրզ» լրատու գործակալութեան յայտնած էր, թէ առեւտրական նպատակներու օժանդակելու համար Լիբանան չի կրնար օգտագործել պահ դրուած այն գումարը, որ պարտադիր է պետութեան մը համար:

«Այդ աստիճանին հասնիլը կ՛ենթադրէ կասեցնել ամէն տեսակի օժանդակութիւն եւ զօրակցութիւն կամ ֆինանսաւորում», ըսաւ Սալամէ:

Ան ընդգծեց, թէ ինք համաձայն է Ֆրանսայի նախագահ Էմանուէլ Մաքրոնի այն առաջարկին, որ Ֆրանսայի Կեդրոնական դրամատան ֆրանսացի փորձագէտներ Լիբանանի Կեդրոնական դրամատան հաշուեքննութիւն կատարեն:

«Մեր նպատակն է, որ դրամատուներուն մէջ հաշիւ ունեցողները իրենց գումարները վերստանան, սակայն ասիկա որոշ ժամանակ կ՛ենթադրէ», ըսաւ Սալամէ:

Նկատի ունենալով սննդեղէնի որոշ տեսականիի, վառելանիւթի եւ դեղորայքի համար Կեդրոնական դրամատան տրուած օժանդակութեան կասեցման հաւանականութիւնը` լիբանանցիները սկսան ուղղուիլ հանրախանութներ եւ դեղատուներ` ապահովելու համար իրենց դեղորայքն ու ուտեստեղէնի պարէնը:

Այս շրջագիծին մէջ Դեղորայք ներածողներու սենտիքայի նախագահ Քարիմ Ժպարա յայտնեց, որ դեղորայքի օժանդակութեան կասեցումը մարդկային աղէտի համազօր պիտի ըլլայ, որովհետեւ ներկայիս քաղաքացին դեղերու սակին միայն 35 առ հարիւրը կը վճարէ եւ արդէն իսկ դժուարութիւն կ՛ունենայ, «իսկ օժանդակութեան կասեցման պարագային ան կրկնապատիկը պիտի վճարէ` ստանալու համար տուեալ դեղատեսակ մը», ըսաւ Ժպարա:

Միւս կողմէ, Վառելանիւթի կայաններու սեփականատէրերու սենտիքայի նախագահ Սամի Պրաքս հարցազրոյցի մը ընթացքին յայտնեց, որ Կեդրոնական դրամատան օժանդակութեան կասեցումը կը նշանակէ, որ եթէ պենզինի թիթեղին սակը լիբանանեան դրամանիշով հաշուելու համար` 4000-ի արժէքով պիտի բազմապատկուի, ապա անիկա պիտի արժէ 60 հազար լ. ոսկի, իսկ եթէ 7500-ի արժէքով պիտի բազմապատկուի` ապա պենզինի թիթեղը աւելի քան 100 հազար պիտի արժէ:

LEAVE A REPLY

Please enter your comment!
Please enter your name here