«Կառավարութեան Կազմութեան Առումով Պիտի Համագործակցինք` Երկիրը Անիշխանութենէ Դուրս Բերելու Եւ Բարեկարգումները Գործադրելու Համար» Շեշտեց Սէյիտ Նասրալլա

0
42

Հըզպալլայի ընդհանուր քարտուղար սէյիտ Հասան Նասրալլա անցեալ շաբաթավերջին` Աշուրայի տօնին առիթով, արտասանեց պատկերասփռուած ճառ մը, որուն մէջ հաստատեց, որ Հըզպալլա պատրաստ է մասնակցելու որեւէ հանդարտ երկխօսութեան, որուն հիման վրայ կարելի պիտի ըլլայ հասնիլ քաղաքական նոր կարգավիճակի մը` պայմանով որ լիբանանեան քաղաքական բոլոր կողմերը համաձայն ըլլան:

Ներքին լիբանանեան առումով սէյիտ Նասրալլա նշեց, որ իրենք համաձայն են ամէն տեսակի բարեկարգումի` յոյս յայտնելով, որ վարչապետի նշանակումը կատարուի:

«Կառավարութեան կազմութեան առումով պիտի համագործակցինք` երկիրը անիշխանութենէ դուրս բերելու եւ բարեկարգումները գործադրելու համար: Կոչ կ՛ուղղենք մշակելու յստակ գործիքակազմեր` դրսեւորելու համար ցոյցերուն ընթացքին հնչած լիբանանցի ժողովուրդին պահանջները եւ կամ կատարելու հանրաքուէ մը», ըսաւ ան:

Սէյիտ Նասրալլա անհրաժեշտ նկատեց, որ Պէյրութի նաւահանգիստի պայթումին հետաքննութիւնը շարունակուի եւ անոր արդիւնքները յայտարարուին:

«Հարաւային Լիբանանի սահմանամերձ շրջանին մէջ պատահածը ցոյց կու տայ, թէ իսրայէլեան ուժերը ինչպիսի՛ սարսափի մէջ կ՛ապրին: Իսրայէլ պէտք է հասկնայ, որ երբ մեր մարտիկներէն մէկը սպաննէ, իր զինուորներէն մէկը պիտի սպաննենք», շեշտեց ան:

Սէյիտ Նասրալլա աւելցուց, որ Ամալ շարժումին հետ իրենց յարաբերութիւնները շատ խոր են` հակառակ Լիբանանի մէջ ոմանց հետապնդած նպատակներուն:

Ան զգուշացուց Իրաքի եւ Սուրիոյ մէջ ՏԱՀԵՇ-ը վերարտադրելու փորձերէն:

«Եմէնի դէմ մղուած պատերազմը ամերիկեան է, իսկ Սէուտական Արաբիա եւ Միացեալ Էմիրութիւններ Ուաշինկթընի եւ անոր որոշումները գործադրելու գործիքներ են», ըսաւ սէյիտ Նասրալլա` աւելցնելով, որ Դիմադրութեան առանցքը կը ներկայանայ իբրեւ արդարութիւն եւ իրաւունք` անարդարին եւ անիրաւին դիմաց, զորս կը մարմնաւորէ ամերիկեան բռնատիրութիւնը:

Ան հաստատեց, որ Իսրայէլի հետ որեւէ տեսակի հաշտութիւն խստիւ դատապարտելի է` ընդգծելով, որ իրենք կը դատապարտեն Արաբական Միացեալ Էմիրութիւններու ղեկավարութեան կեցուածքը:

LEAVE A REPLY

Please enter your comment!
Please enter your name here