«17 Հոկտեմբերի Շարժումը Հոյակապ Էր, Եթէ Խոհեմութեամբ Շարունակուէր» Շեշտեց Նախագահ Աուն

0
42

Հանրապետութեան նախագահ զօր. Միշել Աուն երէկ ընկերային ցանցերուն վրայ կատարուած գրառումի մը ընդմէջէն յայտնեց, որ Կեդրոնական դրամատունը իրաւական հաշուեքննութեան ենթարկելու պայմանագիրը արդէն իսկ ստորագրուած է` ընդգծելով, որ անիկա բարեկարգումի ճամբուն վրայ սպասուող անկիւնադարձային քայլ է:

Նախագահ Աուն ընդգծեց, որ փտածութեան դէմ պայքարի առումով իր խոստումները պիտի գործադրէ` աւելցնելով, որ ինչպէս ինք այս հարցը հետապնդեց մինչեւ պայմանագիրի ստորագրութիւնը, նոյնպէս ալ պիտի շարունակէ հետեւողական ըլլալ` մինչեւ իրաւական հաշուեքննութեան գործադրութիւնը:

Միւս կողմէ, նախագահ Աուն անցեալ շաբաթավերջին արտասանած իր ուղերձէն ետք նախագահական պալատին մէջ ունեցած էր հարցազրոյց մը, որուն մէջ շեշտած էր, թէ ինք չէ փոխուած, այլ` նոյնն է, «սակայն ներքին եւ արտաքին առումով իրարու հետ մրցակցող ուժերն ու պետութիւնները, ինչպէս նաեւ ոմանց արտաքին յարաբերութիւնները խոչընդոտած են աշխատանքի ուղիս», ըսաւ ան:

Նախագահ Աուն հաստատեց, որ համախոհական վարչակարգը կ՛անդամալուծէ երկիրը եւ կը սառեցնէ որոշումները, որքան ալ կարեւոր ըլլան անոնք», ըսաւ ան:

Նախագահ Աուն ընդգծեց, որ երկրին մէջ ներկայիս կան քանի մը հանրապետութիւններ` աւելցնելով, որ պէտք է վերականգնել լիբանանեան միակ հանրապետութիւնը:

Ան շեշտեց, որ հակառակ անոր որ տնտեսական փլուզումը, 30 տարուան սնանկութիւնը, Սուրիոյ պատերազմին հետեւանքները, «Քորոնա»-ի համաճարակին դժուարութիւնները, իսկ վերջերս Պէյրութի նաւահանգիստին պայթումին աղէտը բոլորը իր իշխանութեան օրով պատահած են, սակայն ինք կը մնայ նոյնը:

Նախագահ Աուն հաստատեց, որ լիբանանեան ջուրերուն մէջ գտնուող 4-րդ նաւթահորին մէջ բնական կազ կայ` աւելցնելով, որ աւելի ուշ պիտի բացայայտուին քաղաքական այն պայմանները, որոնց պատճառով կազի արտաբերման աշխատանքը կասեցուեցաւ:

Պէյրութի նաւահանգիստի պայթումին մասին հարցումի մը պատասխանելով` նախագահ Աուն յայտնեց, որ այդ պայթումին վերաբերող հետաքննութիւնները գաղտնի կը կատարուին` աւելցնելով, որ այդ հետաքննութիւնը պէտք չէ սկսի այն թուականէն, երբ պայթուցիկ նիւթը հասաւ նաւահանգիստ, այլ` պէտք է յստակացնէ, թէ այդ նիւթերը փոխադրող նաւը ուրկէ՞ հասաւ Պէյրութ եւ ինչո՞ւ իր ուղղութիւնը փոխեց` նկատի ունենալով, որ անիկա այլ վայր կ՛ուղղուէր, եւ ո՞վ է այդ նաւուն պատասխանատուն:

Նախագահ Աուն հաստատեց, որ այն ղեկավարը, որ կը խուսափի պատասխանատուութիւն ստանձնելէ` արժանի չէ իշխանութեան վրայ ըլլալու:

Ան շեշտեց, որ ինք չի վախնար Պէյրութի նաւահանգիստի պայթումին հարցով լիբանանցիներուն հետ առերեսուիլ` աւելցնելով, որ իր ձեռքերն ու խիղճը մաքուր են: Ան նկատել տուաւ, որ ինք տեղեակ չէ եղած պայթուցիկ նիւթերու հարցէն` ընդգծելով, որ երբ այդ լուրը հասաւ իրեն, շատ ուշ էր արդէն:

Նախագահ Աուն նշեց նաեւ, որ 17 հոկտեմբերի շարժումը հոյակապ էր, եթէ խոհեմութեամբ շարունակուէր: Ան ըսաւ, որ այդ շարժումը կը շարունակէ ապրիլ, եթէ յաջողի ժողովուրդին համար բարեկարգում մը կատարել:

Նախագահ Աուն յայտնեց, որ Պքերքէի հետ յարաբերութիւնները բնականոն են` աւելցնելով, որ Պքերքէի քաղաքական կեցուածքները յառաջդիմական են:

Նախագահ Աուն հարցազրոյցի աւարտին փափաք յայտնեց, որ պատմութիւնը զինք յիշէ ինչպէս որ է` աւելցնելով, որ ինք միշտ կը փափաքի երիտասարդներուն հետ հանդիպիլ եւ զանոնք նախագահական պալատ կը հրաւիրէ` ուղղակի հանդիպումի եւ երկխօսութեան համար:

«Կը մաղթեմ, որ Լիբանանի երկրորդ 100-ամեակը ըլլայ յատկանշական եւ կը սկսի ժողովուրդին զարթնումով, ժողովուրդին կողմէ պատմութեան արժեւորումով, հարցերուն արմատները բացայայտելով եւ որոշ կեցուածքներ սրբագրելով` փոփոխութիւն իրականացնել կարենալու համար», եզրափակեց ան:

LEAVE A REPLY

Please enter your comment!
Please enter your name here