«Արցախն Էր Այն Կայծը, Որից Բռնկուեց Ազատութեան Բոցը». Նախագահ Սարգսեան

0
57

ՍՏԵՓԱՆԱԿԵՐՏ, «Արցախփրէս».- Հայաստանի նախագահ Արմէն Սարգսեան Արցախի անկախութեան օրուան առիթով ուղղեց շնորհաւորական հետեւեալ խօսքը.

«Շնորհաւորում եմ Արցախի անկախութեան օրուայ առթիւ:

«1991 թ. Սեպտեմբերը ճակատագրական ու բախտորոշ էր հայ իրականութեան մէջ․ Սեպտեմբերի 2ին անկախութիւն հռչակեց Արցախը, իսկ  21 Սեպտեմբերին իր անկախութեան հանրաքուեն անցկացրեց Հայաստանը:

«Արցախն էր այն կայծը, որից բռնկուեց ազատութեան բոցը եւ տարածուեց հայկական աշխարհում: Մեր ժողովուրդը ոտքի ելաւ պաշտպանելու իր իրաւունքները եւ իր արժանի տեղը գրաւելու ժամանակակից ազգերի ընտանիքում:

Սա մեր իղձերի իրականացման եւ հնարաւորութիւնների իրացման իսկապէս պատմական ժամանակաշրջան էր, որի կարեւորութիւնը շատ լաւ էինք գիտակցում ինչպէս Արցախում, այնպէս էլ Հայաստանում:

«Անկախութեան հռչակումը դարձաւ այն արագացուցիչը, որի միջոցով Արցախում մարմին առաւ ինքնիշխան պետականութիւնը:

«Այսօր` 29 տարի անց, Արցախի Հանրապետութիւնը կայացած պետական միաւոր է` շնորհիւ այն պայքարի, որը մղւում է համահայկական ուժերով, շնորհիւ այն յաղթանակի, որը կերտուեց Արցախի, Հայաստանի ու Սփիւռքի միասնութեամբ, շնորհիւ այն կամքի, որն առաջնորդում է արցախցիներին եւ այսօր էլ նրանց յաջողութիւնների գրաւականն է:

«Ես գլուխ եմ խոնարհում բոլոր այն հերոս նահատակների առաջ, ովքեր իրենց կեանքը զոհաբերեցին յանուն անկախ ու ազատ Արցախի, երախտագիտութիւնս եմ յայտնում բոլոր նրանց, ովքեր իրենց առողջութիւնը եւ բարեկեցութիւնը նուիրաբերեցին այդ նպատակին:

«Արցախը համազգային կամքի փորձաքարն էր, այսօր էլ այն շարունակում է մնալ մեր միասնութեան առանցքը: Որպէս ժողովուրդ` հայերիս համար իւրաքանչիւր ձեռքբերում Արցախում մի քար է մեծ հայկական աշխարհի վերականգնուող պատին: Ուստի մեր միտքն ու ջանքը, մեր գործն ու խոհը պէտք է ուղղուած լինեն հայրենիքի` Արցախի ու Հայաստանի անվտանգութիւնն ու խաղաղութիւնն ամրապնդելուն, մեր ժողովրդի բարեկեցութիւնն ապահովելուն:

«Այս գիտակցումը պէտք է բարձրագոյնը լինի իւրաքանչիւրիս մէջ, որովհետեւ Արցախի լիակատար ազատութեան, մեր ժողովրդի ոտնահարուած իրաւունքների վերականգնման պայքարը դեռ աւարտուած չէ․ այն դեռ շարունակւում է:

«Կրկին շնորհաւորում եմ Արցախի Հանրապետութեան անկախութեան օրուայ առթիւ, մաղթում խաղաղութիւն, բարեկեցութիւն եւ լաւատեսութիւն»:

Նոյն օրը նախագահ Արմէն Սարգսեան հեռաձայնային զրոյց ունեցաւ Արցախի Հանրապետութեան նախագահ Արայիկ Յարութիւնեանի հետ, շնորհաւորեց զայն եւ բոլոր արցախցիները Արցախի անկախութեան հռչակման 29րդ տարեդարձին առիթով՝ մաղթելով խաղաղութիւն, բարեկեցութիւն եւ անսասան հաւատք ապագային նկատմամբ:

LEAVE A REPLY

Please enter your comment!
Please enter your name here