Նախագահ Սարգսեան Հեռաձայնային Զրոյց Ունեցաւ Ազգային Հերոսի Կոչման Արժանացած Բժիշկին Հետ

0
70

ԵՐԵՒԱՆ, «Արմէնփրէս».- Հայաստանի Հանրապետութեան նախագահ Արմէն Սարգսեան հեռաձայնային զրոյց ունեցաւ Հայաստանի Հանրապետութեան Ազգային հերոսի կոչման արժանացած եւ «Հայրենիքի շքանշան»ով պարգեւատրուած վաստակաշատ բժիշկ, սրտաբոյժ Հրայր Յովակիմեանի հետ:

Հայաստանի Հանրապետութեան նախագահի աշխատակազմի հասարակութեան հետ կապերու վարչութենէն յայտնեցին, որ՝ խորհրդանշական նկատելով այն, թէ Հրայր Յովակիմեան առաջին բժիշկն է, որ կ՛արժանանայ Ազգային հերոսի կոչման, նախագահ Սարգսեան շնորհաւորեց մեծահամբաւ բժիշկը եւ անոր մաղթեց առողջութիւն ու նորանոր յաջողութիւններ:

Նախագահը բարձր գնահատեց Հրայր Յովակիմեանի մատուցած ծառայութիւնները հայրենիքին ու ժողովուրդին եւ անոր՝ իբրեւ սրտաբոյժ մասնագիտական-մարդասիրական նուիրեալ աշխատանքը, որուն իբրեւ արդիւնք փրկուած են բազմաթիւ կեանքեր:

Հանրապետութեան նախագահը յիշարժան նկատեց շուրջ երեք տասնամեակ առաջ Հրայր Յովակիմեանի գալուստը Հայաստան, անոր մասնակցութեամբ 1993ին Երեւանի «Նորք-Մարաշ» բժշկական կեդրոնին մէջ մանկական սրտային վիրաբուժութեան բաժանմունքին, իսկ 1996ին՝ չափահասակներու սրտային վիրաբուժութեան բաժանմունքին բացումը: Հայաստանի մէջ բժիշկ Յովակիմեանի գործունէութեան շնորհիւ երկրորդ կեանք ստացան բազմաթիւ երեխաներ:

Նախագահ Արմէն Սարգսեան նշեց, որ Հրայր Յովակիմեանին շնորհուած Հայաստանի Ազգային հերոսի կոչումը նաեւ այդ երեխաներուն եւ անոնց ընտանիքներուն երախտագիտութեան խօսքն է մեր մեծ հայրենակիցին:

Տաղանդաշատ բժիշկը ըսաւ, որ այսօր իր հիմնական նպատակն է գիտելիքներու եւ փորձառութեանն փոխանցումը երիտասարդ սերունդին, որպէսզի երիտասարդ, կիրթ, հմուտ մասնագէտներու շնորհիւ ապահովուին բաժանմունքին շարունակական զարգացումը եւ յաջողութիւնները:

Իր հայրենակիցներուն եւ անձամբ իր անունով շնորհակալութիւն յայտնելով բժիշկ Յովակիմեանին հայրենանուէր գործունէութեան ու մարդասիրութեան համար՝ Հանրապետութեան նախագահը յայտնեց, թէ յոյս ունի, որ յառաջիկային կարելիութիւնը կ՛ունենայ Երեւանի մէջ հանդիպելու անոր եւ յանձնելու հայրենիքի բարձրագոյն պարգեւը:

LEAVE A REPLY

Please enter your comment!
Please enter your name here