Արցախի Մէջ Կը Նախատեսուի Բջիջային Կապի Եւ Համացանցի Ծառայութեան Գիներու Նուազում

0
62

ԵՐԵՒԱՆ, «Լրագիր».- Արցախի նախագահ Արայիկ Յարութիւնեան «Ֆէյսպուք»ի իր էջին վրայ գրած է, թէ 4 Սեպտեմբերին ընդունեց «Ղարաբաղ Տելեկոմ» ընկերութեան գլխաւոր տնօրէն Գարեգին Օտապաշեանը:

Ան դիտել տուաւ, թէ զրոյցի նիւթ եղած է այն, որ բարձր արագութեամբ «3 ճի.» կապը արդէն իսկ հասանելի է մայրաքաղաքին եւ Շուշիի մէջ, յառաջիկայ օրերուն ալ հասանելի պիտի դառնայ մնացած մեծ բնակավայրերուն մէջ: Այս առումով կ՛իրականանան վերջին գիտարուեստական աշխատանքներ, որոնք, ըստ գլխաւոր տնօրէնին, պիտի աւարտին մէկ շաբաթուան ընթացքին:

Մինչեւ տարեվերջ նոր «3 ճի.» ծածկոյթի տակ պիտի ըլլան ներհանրապետական գլխաւոր ճանապարհները, Հայաստանին կապող միջպետական մայրուղիները:

Մինչեւ 2022 էականօրէն պիտի նուազին մատուցուող ծառայութիւններուն սակերը. արդէն 1 Յունուարէն սկսեալ պիտի կատարուի առաջին շօշափելի վերանայումը:

Ըստ ընկերութեան գլխաւոր տնօրէնին՝ նոր տարիէն սկսեալ պիտի գործեն նաեւ նոր փաթեթներ, որոնք աւելի մատչելի պայմաններ պիտի առաջարկեն բաժանորդներուն:

Նախագահը եւ տնօրէնը համաձայնեցան, որ մինչեւ Յունուար 2022 ընկերութիւնը մատուցող ծառայութիւնները եւ անոնց գիները պիտի համապատասխանեցնէ Հայաստանի մէջ գործող կապի ընկերութիւններուն կողմէ մատուցուող ծառայութիւններուն եւ սակերուն: «Խոստանում եմ, որ իշխանութիւններն այս հարցում խիստ հետեւողական են լինելու», գրած է Արցախի նախագահը:

LEAVE A REPLY

Please enter your comment!
Please enter your name here