Բանակը Ձերբակալեց ՏԱՀԵՇ-ի Հետեւորդ Բջիջի Մը Անդամները, Որոնք Լիբանանի Մէջ Ահաբեկչական Գործողութեան Մը Կը Պատրաստուէին

0
58

Լիբանանեան բանակի հրամանատարութիւնը շաբաթավերջին հրապարակեց հաղորդագրութիւն մը, որ կը նշէ, թէ բանակը ձերբակալած է ՏԱՀԵՇ-ի հետեւորդ բջիջի մը անդամները, որոնք Լիբանանի մէջ ահաբեկչական գործողութեան մը կը պատրաստուէին:

Բանակի հրամանատարութիւնը հաստատեց, որ ահաբեկչական այդ բջիջին պատասխանատուն` էմիրը, լիբանանեան դատական իշխանութիւններուն կողմէ պահանջուած ահաբեկիչ Խալետ Թիլաուին է, որուն ինքնաշարժը օգտագործուած էր 21 օգոստոս 2020-ին Քաֆթունի անարգ ոճիրը գործելու ընթացքին:

Լիբանանեան բանակի այս գործողութիւնը մաս կը կազմէ հիւսիսային Լիբանանի եւ Պեքաայի մէջ ահաբեկչական բջիջները հետապնդելու արշաւին:

Ըստ բանակի հրամանատարութեան, ահաբեկչական բջիջները զինուորական մարզումներ ստացած են եւ սպառազինում կուտակած, ինչպէս նաեւ աւազակութիւններ կազմակերպած` ֆինանսաւորելու համար իրենց ահաբեկչական գործունէութիւնը:

Միւս կողմէ, լիբանանեան բանակը հրապարակեց այլ հաղորդագրութիւն մը, որուն համաձայն, շաբաթ, 5 սեպտեմբեր 2020-ին, իսրայէլեան անօդաչու թռչող սարք մը ոտնձգութիւն գործած է հարաւային Լիբանանի Հուլա գիւղաքաղաքին վերեւ եւ 15 վայրկեան տեւողութեամբ թռիչք կատարելէ ետք վերադարձած պաղեստինեան բռնագրաւուած հողեր:

Բանակի հաղորդագրութեան մէջ նշուեցաւ, որ բանակի հրամանատարութիւնը այս ոտնձգութեան հարցով կը գործակցի հարաւային Լիբանանի մէջ տեղակայուած ՖԻՆԻՒԼ-ի միջազգային խաղաղապահ ուժերուն հետ:

ՆՇԵՆՔ, որ Շեպաայի եւ Արքուպի բնակիչները շաբաթ ուշ գիշերին իսրայէլեան ուժերու շարժումներ նշմարած են: Անոնք աւելցուցած են, որ իսրայէլեան ուժերը մեծ քանակութեամբ լուսաւոր ռումբեր արձակած են:

LEAVE A REPLY

Please enter your comment!
Please enter your name here