Շինքըր. «Միացեալ Նահանգներ Ֆրանսայի Հետ Համաձայն Են` Լիբանանի Մէջ Բարեկարգումները Գործադրելու Հարցով»

0
96

Միացեալ Նահանգներու արտաքին գործոց նախարարի Մերձաւոր Արեւելքի հարցերով օգնական Տէյվիտ Շինքըր շաբաթավերջին հանդիպում մը ունեցաւ լիբանանեան բանակի հրամանատար զօր. Ժոզեֆ Աունի հետ` ներկայութեամբ Լիբանանի մէջ ամերիկեան դեսպանատան գործավար Ուին Տէյթընի եւ դեսպանատան զինուորական կցորդ գնդապետ Ռապըրթ Մէյնի:

Հանդիպումին ընթացքին քննարկուեցան լիբանանեան իրադարձութիւններն ու լիբանանեան եւ ամերիկեան բանակներուն միջեւ գործակցութեան հեռանկարներու ամրապնդումը:

Լիբանան այցելութեան առիթով Շինքըր հարցազրոյցի մը ընթացքին յայտնեց, որ Մակնիցքի օրէնքի շրջագիծին մէջ կը մշակեն շարք մը պատժամիջոցներ, որոնք թիրախ պիտի դարձնեն լիբանանցի անձնաւորութիւններ:

«Միացեալ Նահանգներ Ֆրանսայի հետ համաձայն են` Լիբանանի մէջ բարեկարգումները գործադրելու հարցով, եւ կը գործակցին անոր հետ», ըսաւ Շինքըր` հաստատելով, որ ամերիկեան օժանդակութիւնները պիտի հասնին լիբանանցիներուն` բարեսիրական միութիւններու ճամբով:

Ան նկատել տուաւ, որ քաղաքացիներուն Լիբանանէն կատարած արտագաղթին պատճառը երկրին տնտեսական կացութիւնն է, ինչպէս նաեւ Պէյրութի նաւահանգիստի պայթումին յառաջացուցած ցնցումներուն հետեւանքները:

«Մենք կը փափաքինք օժանդակել կառավարութեան, սակայն ատիկա չենք կրնար կատարել, եթէ կառավարութիւնը ինքն իրեն չօգնէ», շեշտեց Շինքըր:

Միւս կողմէ, «Ախպար» օրաթերթը իր երէկուան թիւին մէջ գրած էր, թէ Շինքըր հանդիպում մը ունեցած է խորհրդարանի նախագահ Նեպիհ Պըրրիի տեղեկատուական հարցերու խորհրդական Ալի Համտանի հետ, որուն հետ քննարկած է Լիբանանի եւ բռնագրաւուած Պաղեստինի ծովային սահմանագծումին թղթածրարը:

Նոյն օրաթերթը, իր տեղեկութիւնները քաղելով վստահելի աղբիւրներէ, կը գրէ, թէ հանդիպումը դրական չէ եղած, եւ Շինքըր նեղացած դուրս եկած է, որովհետեւ Լիբանան կը շարունակէ կառչած մնալ իր նախապայմաններուն` առանց ընկրկելու Միացեալ Նահանգներու կողմէ առաջադրուած զիջումներու երթալու պահանջին դիմաց:

LEAVE A REPLY

Please enter your comment!
Please enter your name here