Նախագահ Աուն Ատիպի Հետ Խորհրդակցեցաւ Կառավարութեան Կազմութեան Մասին

0
46

Հանրապետութեան նախագահ զօր. Միշել Աուն երէկ կէսօրէ ետք ժամը 4:00-ին, նախագահական պալատին մէջ ընդունեց նոր նշանակուած վարչապետ Մուսթաֆա Ատիպը:

Հանդիպումէն ետք վարչապետ Ատիպ յայտնեց, որ նախագահ Աունի հետ քննարկած է կառավարութեան կազմութեան վերաբերող մանրամասնութիւններ:

Ան նշեց, որ տակաւին կը գտնուի նախագահ Աունի հետ կառավարութեան կազմութեան շուրջ խորհրդակցութիւններու փուլին մէջ` յուսալով, որ այդ աշխատանքը հեզասահ կ՛ընթանայ:

Զօր. Տել Քոլ Կ՛այցելէ Պաապտա

Միւս կողմէ, նախագահ Աուն առաւօտեան Պաապտայի մէջ ընդունեց հարաւային Լիբանանի մէջ տեղակայուած ՖԻՆԻՒԼ-ի միջազգային խաղաղապահ ուժերու ընդհանուր հրամանատար զօր. Սթեֆանօ Տել Քոլը, որուն յայտնեց, թէ ՖԻՆԻՒԼ-ի ուժերուն պաշտօնավարութիւնը մէկ տարիով երկարաձգելու քայլը ո՛չ միայն Լիբանանի շահերուն կը ծառայէ, այլ նաեւ` 2006-էն ի վեր հարաւային Լիբանանի սահմանային շրջանին մէջ տիրող ապահովական կայունութեան պահպանումին:

Ան հաստատեց, որ հարաւային Լիբանանի մէջ ՖԻՆԻՒԼ-ի ուժերուն դերակատարութեան յաջողութիւնը զանոնք օրինակելի դարձուցած են ՄԱԿ-ի մէջ:

Հանդիպումին ընթացքին նախագահ Աուն շնորհակալութիւն յայտնեց զօր. Տել Քոլին` ՖԻՆԻՒԼ-ի ուժերուն կողմէ Պէյրութի նաւահանգիստի պայթումին պատճառած աւերները մաքրելու եւ փրկարար աշխատանքին մասնակցութեան համար, ինչպէս նաեւ յոյս յայտնեց, որ պայթումին պատճառով վնասուած ՖԻՆԻՒԼ-ի անդամ 23 զինուորները շուտով ապաքինուին:

Նախագահ Աուն մաղթեց, որ ՖԻՆԻՒԼ-ի ուժերուն թիւին 15 հազարէն 13 հազար զինուորի նուազեցումը իր ժխտական ազդեցութիւնը չ՛ունենար ՖԻՆԻՒԼ-ի ուժերուն առաքելութեան վրայ:

Նախագահ Աուն անհրաժեշտ նկատեց, որ ՖԻՆԻՒԼ-ի ուժերուն ու լիբանանեան բանակին միջեւ գործակցութիւնը ըլլայ հեզասահ եւ ՖԻՆԻՒԼ-ի ու բանակին միջեւ միացեալ հանդիպումները կրկնուին` ամրապնդելու համար միջազգային խաղաղապահ ուժերուն եւ լիբանանեան իշխանութիւններուն միջեւ գործակցութիւնը:

Նախագահ Աուն ընդգծեց հարաւային Լիբանանի մէջ կայունութիւնը պահպանելու կարեւորութիւնը` նկատի ունենալով Լիբանանի շահերն ու շրջանին կայունութիւնը:

Զօր. Տել Քոլ ցաւակցութիւն յայտնեց նախագահ Աունին` Պէյրութի նաւահանգիստի պայթումին պատճառած զոհերուն համար:

Ան իր կարգին ընդգծեց ՖԻՆԻՒԼ-ի եւ լիբանանեան բանակին միջեւ համագործակցութեան կարեւորութիւնը:

Միւս կողմէ, նախագահ Աուն Լիբանանի եւ իւրաքանչիւր լիբանանցիի անունով սրտանց շնորհակալութիւն յայտնեց բոլոր երկիրներուն, որոնք օժանդակեցին Լիբանանին` Պէյրութի նաւահանգիստի պայթումէն ետք:

Նշենք, որ նախագահ Աուն Յորդանանի Ապտալլա Բ. թագաւորին հետ հեռաձայնային հաղորդակցութեան մը ընթացքին խնդրած էր միջամտել եւ դիւրացնել «Ժապեր» անցքին վրայ գտնուող լիբանանեան փոխադրատարներուն երթեւեկը:

Նախագահ Աուն Ապտալլա Բ. թագաւորին հետ քննարկեց նաեւ լիբանանեան-յորդանանեան երկկողմանի յարաբերութիւններն ու զանոնք բարելաւելու հեռանկարները` տարբեր մարզերու պարագային:

Նախագահ Աուն շնորհակալութիւն յայտնեց նաեւ Ապտալլա Բ. թագաւորին` Լիբանան առաքուած յորդանանեան մարդասիրական օժանդակութիւններուն, դեղորայքին եւ դաշտային հիւանդանոցին համար:

LEAVE A REPLY

Please enter your comment!
Please enter your name here