Վերացման Սուրբ Խաչի Տօնը` Անթիլիասի Մայրավանքին Մէջ

0
47

Հայ եկեղեցւոյ հինգ տաղաւար տօներուն վերջինը եւ խաչի տօներուն երկրորդը` Վերացման Սուրբ խաչի տօնը այս տարի եւս Անթիլիասի մայրավանքին մէջ հանդիսաւորապէս նշուեցաւ` նախագահութեամբ Արամ Ա. վեհափառ հայրապետին:

Արդարեւ, կիրակի, 13 սեպտեմբեր 2020-ին, Անթիլիասի մայրավանքի Ս. Գրիգոր Լուսաւորիչ մայր տաճարին մէջ մատուցուեցաւ Ս. եւ անմահ պատարագ: Պատարագը մատուցեց եւ յաւուր պատշաճի քարոզեց կաթողիկոսարանի մատենադարանապետ Շահան արք. Սարգիսեան:

Պատարագիչ սրբազանը իբրեւ բնաբան ընտրած էր «Քեզմէ ակնածողներուն դրօշ մը տուիր, որպէսզի ազատին մահացու աղեղէն» (Սղ. 60.4) համարը: Ան մատնանշեց, թէ դրօշը` խաչը Տէրը Ինքն է, եւ երբ Ան ներկայ է մեր կեանքին մէջ, ուրեմն թշնամիին բոլոր յարձակումները պարտութեան կը մատնուին: Սրբազանը աւելցուց, որ խաչը անձեռագործ դրօշն է Երկինքի արքայութեան, եւ անոնք, որոնք նայեցան խաչին, փրկուեցան: Խօսելով խաչին մասին` սրբազանը յիշեցուց, թէ «Խաչ դրօշը» Աստուածաշունչին մէջ «Դրախտին մէջ անմահութեան կենաց ծառը» կը ներկայացնէ եւ «Աբրահամ հաւատքի հօր որդիին` Իսահակի զոհագործման ուսին դրուած փայտերն» ու « Մովսէսի ձեռքին Աստուծոյ գաւազանը, որով բացաւ Կարմիր ծովը, ու ժայռէն ջուր բխեցուց, եւ անոր բարձրացումով յաղթեցին ամաղեկացիներուն»:

Աւարտին, ան աղօթք վերառաքեց առ Աստուած եւ խնդրեց Ամենակալէն, որ պահէ ու պահպանէ Լիբանանը, Սուրիան եւ մեր հայրենիքը` Իր Ս. խաչին նշանով:

Յայտնենք, որ Ս. պատարագէն անմիջապէս ետք, վեհարանին մէջ վեհափառ հայրապետը «Սիլիսիա Թի.Վի.»-ին ճամբով ուղղեց իր հայրապետական պատգամը Սուրբ խաչի Վերացման տօնին առիթով:

LEAVE A REPLY

Please enter your comment!
Please enter your name here