Մեծ Լարուածութիւն` Լիբանանեան Ուժեր Եւ Ազգային Ազատ Հոսանք Կուսակցութիւններու Համախոհներուն Միջեւ

0
56

Երէկ գիշեր Միրնա Շալուհի շրջանին մէջ Ազգային ազատ հոսանք կուսակցութեան Ընդհանուր քարտուղարութեան կեդրոնատեղիին առջեւ մեծ լարուածութիւն ստեղծուեցաւ, երբ հոն հասաւ Լիբանանեան ուժեր կուսակցութեան համախոհներու թափօր մը եւ սկսաւ կարգախօսներ արձակել: Ասիկա պատճառ դարձաւ, որ Ազգային ազատ հոսանք կուսակցութեան ապահովական տարրեր օդը կրակեն, մինչ լիբանանեան բանակէն ջոկատներ շրջան հասան` կանխարգիլելու համար կացութեան վատթարացումը:

Այս ծիրին մէջ զինուորական աղբիւրներ «Էլ. Պի. Սի. Այ.» պատկերասփիւռի կայանին հաղորդեցին, որ բանակը միջոցառումներու կը դիմէ` գրգռութիւնները արգիլելու եւ լարուածութիւնը մեղմացնելու համար: Բանակը մարդկային պատնէշ մը ստեղծեց Լիբանանեան ուժերու եւ Ազգային ազատ հոսանքի համախոհներուն միջեւ` արգիլելու համար անոնց միջեւ շփումը:

Աւելի ուշ Ազգային ազատ հոսանք կուսակցութեան տեղեկատուական կեդրոնական յանձնախումբը հրապարակեց հաղորդագրութիւն մը, որուն մէջ նշեց, թէ կատարուածը անընդունելի ոտնձգութիւն է իր կեդրոնատեղիին եւ համակիրներուն նկատմամբ: Այս արարքը պատճառ դարձաւ, որ Ազգային ազատ հոսանքի համախոհները ինքնաբուխ կերպով դէմ դնեն յարձակումին: Ազգային ազատ հոսանքը հանրային կարծիքին ուշադրութիւնը կը հրաւիրէ այս երեւոյթին վրայ եւ կը պահանջէ բանակէն ու ապահովութեան ուժերէն պատասխանատուութիւն ստանձնել եւ արգիլել այս զարտուղի երեւոյթը:

LEAVE A REPLY

Please enter your comment!
Please enter your name here