Զախարովա Անդրադարձաւ Արցախի Մէջ Լիբանանահայերու Բնակեցման Լուրերուն

0
78

ԵՐԵՒԱՆ, «Արմէնփրէս».- Ռուսիոյ արտաքին գործոց նախարարութեան պաշտօնական ներկայացուցիչ Մարիա Զախարովա անդրադարձաւ Արցախի մէջ լիբանանահայերու բնակեցման լուրերուն:

«Մենք լսած ենք Լիբանանէն հեռացած հայերը բնակեցնելու՝ Լեռնային Ղարաբաղի տէ ֆաքթօ իշխանութիւններուն մտադրութեան մասին: Մենք կարդացած ենք հաղորդագրութիւններ, որ 2 լիբանանահայ ընտանիքներ Լեռնային Ղարաբաղի մէջ բնակելու փափաք յայտնած են: Դէպի Լեռնային Ղարաբաղ եւ յարակից շրջաններ լիբանանահայ գաղթականներուն հոսքին մասին ստուգուած տուեալներուն չենք տիրապետեր», յայտնեց Զախարովա:

Ան դիտել տուաւ, որ այժմ անհրաժեշտ է կեդրոնանալ Լեռնային Ղարաբաղի տագնապի լուծման վերաբերող բանակցային գործընթացի վերականգնման, ինչպէս նաեւ գաղթականներու եւ տեղահանուածներու հարցի լուծման վրայ:

Զախարովա յիշեցուց, որ ԵԱՀԿի Մինսկի խմբակի համանախագահները 14 Սեպտեմբերին հեռաձայնային հաղորդակցութիւններ ունեցան Հայաստանի ու Ատրպէյճանի արտաքին գործոց նախարարներուն հետ, անոնց փոխանցեցին միջնորդներուն առաջարկները՝ Լեռնային Ղարաբաղի տագնապի լուծման ծիրին մէջ հետագայ քայլերուն վերաբերեալ, այդ կարգին՝ իւրաքանչիւր նախարարի հետ առանձին հանդիպում կազմակերպելու: «Մենք կողմերուն դրական պատասխանին կը սպասենք», եզրափակեց Զախարովա։

LEAVE A REPLY

Please enter your comment!
Please enter your name here