Հանրապետութեան Նախագահին Տեսակցութիւնները- Հեռաձայնային Հաղորդակցութիւն Մաքրոնի Հետ

0
62

Հանրապետութեան նախագահի տեղեկատուական գրասենեակը հաղորդեց, որ երէկ նախագահ Աուն ունեցաւ շարք մը հանդիպումներ, որոնց ընթացքին քննարկուեցան դատական, դիւանագիտական եւ քաղաքական հարցեր:

Աուն-Նաժըմ Հանդիպում

Նախագահ Աուն ընդունեց Արդարադատութեան նախարարի պաշտօնակատար Մարի Քլոտ Նաժըմը: Հանդիպումին ընթացքին քննարկուեցան ծանրաբեռնուած բանտերու հարցը լուծելու համար շարք մը բանտարկեալներու յատուկ ներում շնորհելու առաջարկը, ինչպէս այդ ուղղութեամբ առնուելիք քայլերը:

Սէուտական Արաբիոյ Դեսպան

Դիւանագիտական գետնի վրայ, նախագահ Աուն ընդունեց Լիբանանի մէջ Սուտանի դեսպան Ալի Սատիք Ալին, որ կ՛աւարտէ իր դիւանագիտական առաքելութիւնը Լիբանանի մէջ: Նախագահը շնորհակալութիւն յայտնեց դեսպանին` տարբեր մարզերու մէջ երկու երկիրներուն միջեւ յարաբերութիւններու ամրապնդման եւ զարգացման ուղղութեամբ թափած ճիգերուն համար:

Երեսփոխան Ասաատ Տըրղամ

Քաղաքական գետնի վրայ, նախագահ Աուն ընդունեց երեսփոխան Ասաատ Տըրղամը, որուն հետ քննարկեց երկրին  կացութիւնը եւ Աքքարի իրավիճակը`յատկապէս ապահովական  տեսանկիւնէն, ինչպէս նաեւ շրջանի կարիքները:

Աուն-Մաքրոն Հեռաձայնային Հաղորդակցութիւն

Հանրապետութեան նախագահը երէկ նաեւ հեռաձայնային հաղորդակցութիւն ունեցաւ Ֆրանսայի նախագահ Էմանուէլ Մաքրոնի հետ եւ քննարկեց կառավարութեան կազմութեան թղթածրարի վերջին զարգացումները: Երկու նախագահները համաձայնեցան, որ անհրաժեշտ է ջանքեր գործադրել տարբեր մակարդակներու վրայ` ամենակարճ միջոցին կառավարութեան ծնունդը ապահովելու նպատակով:

Ֆրանսայի նախագահը յոյս յայտնեց, որ նախագահ Աուն ի գործ դնէ բոլոր ջանքերը` հասնելու համար դրական արդիւնքի` նշելով, որ ինք եւս հեռաձայնային հաղորդակցութիւններ պիտի կատարէ:

LEAVE A REPLY

Please enter your comment!
Please enter your name here